«Локомотив»-м и Кубокым щIэбэну

Налшык къалэм и «Гладиатор» спорт комплексым иджыблагъэ щекIуэкIащ «Локомотив» спорт зэгухьэныгъэм и кубокыр дзюдомкIэ къэхьыным хуэунэтIа зэхьэзэхуэ.  Абы щызэпеуащ УФ-м и федеральнэ округи 7-м я спортсменхэмрэ Азербайджаным къикIа хьэщIэхэмрэ, псори зэхэту хъыджэбзи 150-рэ щIалэу 645-рэ.

Зэпеуэр зэрекIуэкIым кIэлъыплъащ КъБР-м и Парламентым и УнафэщIым и къуэдзэ Къардэн Мурат, КъБР-м спортымкIэ и министр Хьэсанэ Ислъам, «Экологистика»-м и унафэщI КъуэщIысокъуэ Рустам, УФ-м ДзюдомкIэ и федерацэм и тхьэмадэ Соловейчик Сергей, «Локомотив» спорт зэгухьэныгъэм и унафэщI Голдобин Сергей сымэ, нэгъуэщIхэри.

Къэбэрдей-Балъкъэрым и дзюдоист ныбжьыщIэхэм ящыщу япэ увыпIэр къахьащ Унэж Амирлан, Абазэ Самир, Молей Алий, Щад Дилианэ сымэ. ЕтIуанэ хъуахэщ Теммоев Алан, Азэмэт Къантемыр, Срыкъуэ Ахьмэд сымэ. Абазэ Сэлим, Къудей Беслъэн, Алиев Исрэфил, Нэхущ Радимэ, Акимовэ Дарье, Хуламханов Рустам, Сыжажэ Мансур, Джафаров Инал, Къунаш Дамир, БищIо Даянэ, Низамовэ Камилэ сымэ ещанэщ.

                                                                   ХЬЭЩЫКЪУЕЙ Олег.