Спорт хъыбархэр

Грэпплинг

Европэм кIуэну Iэмал ягъуэт

Мэзкуу областым и Наро-Фоминск къалэм щекIуэкIащ Урысейм и Кубокыр грэпплинг, грэпплинг-ги спорт бэнэкIэ лIэужьыгъуэхэмкIэ къэхьыным хуэунэтIа зэхьэзэхуэ. Абы хэтащ къэралым и щIыналъэ зэхуэмыдэхэм я спортсмен 300-м нэблагъэ. 
Къэбэрдей-Балъкъэрым СпортымкIэ и министерствэм и пресс-IуэхущIапIэм къызэритамкIэ, ди республикэм и лIыкIуэу зэпеуэм хэтащ бэнакIуитху. Грэпплинг-ги лIэужьыгъуэмкIэ и хьэлъагъ елъытауэ зыхэта гупым япэ увыпIэр къыщихьащ Хьэсанэ Мурат. ГрэпплингымкIэ дыщэ медаль къихьащ Урыс Мухьэмэд.
Абыхэм я егугъуныгъэм IэмалыфI къыпэкIуащ - а спорт лIэужьыгъуэхэмкIэ Европэм мыгувэу щекIуэкIыну чемпионатым хэтынущ ди щIалэхэр. Хьэсанэмрэ Урысымрэ я тренерыр Шыхъуэстэн Русланщ. 

Каратэ

Зэныбжьэгъугъэм и Кубокым щIобэн

Къэбэрдей-Балъкъэрым СпортымкIэ и министерствэм и пресс-IуэхущIапIэм къызэритамкIэ, щэкIуэгъуэм и 3 - 6-хэм Тольятти къалэм щекIуэкIащ «Зэныбжьэгъугъэм и Кубокыр» каратэмкIэ къэхьыным хуэунэтIа урысейпсо зэхьэзэхуэ. Абы кърихьэлIащ къэралым и щIыналъэ 43-м, Къэзахъстаным я командэхэр - псори зэгъусэу цIыху 1500-м нэблагъэ. 
Къэбэрдей-Балъкъэрым и щIыхьыр яхъумэу зэпеуэм хэтащ каратист ныбжьыщIэ 35-рэ икIи зэфIэкIыфI зэраIэр утыкушхуэм къыщагъэлъэгъуащ. Ди щIалэхэм медаль 15 абы къыщахьащ: 6-р дыщэу, 3-р дыжьыну, 6-р домбеякъыу. 
Щхьэзакъуэ зэхьэзэхуэм къыдэкIуэу, республикэм и спортсмен цIыкIухэр хэтащ гуп-гупурэ ирагъэкIуэкIа зэпэщIэтыныгъэхэми икIи зэрымыхуэмыхур абыи наIуэ къыщащIащ. 
КъБР-м и командэм и тренерхэр Гуэбэшы Аслъэн, КIэмпIарэ Рустам, Мэш Азэмэт, Юнусов Владимир, Щомахуэ Владимир, Губырэ Беслъэн сымэщ. 
 

Алыдж-урым бэнэкIэ

Дыщэ медалхэр къытхуахь

Къэбэрдей-Балъкъэрым СпортымкIэ и министерствэм и пресс-IуэхущIапIэм зэбгрыригъэха хъыбарым къызэрыщыгъэлъэгъуамкIэ, щэкIуэгъуэм и 4-5-хэм Киров къалэм щекIуэкIащ Киров Сергей и саугъэтыр алыдж-урым бэнэкIэмкIэ къэхьыным хуэунэтIа урысейпсо зэхьэзэхуэ. Абы кърихьэлIащ Урысей Федерацэм и щIыналъэхэм, Узбекистаным, Къэзахъстаным, Белоруссием я спортсмену 100-м нэблагъэ.
Ди гуапэ зэрыхъущи, ди республикэм щыщ щIалэхэу зэхьэзэхуэм хэтахэм хъарзынэу зыкъыщагъэлъэгъуащ а фэеплъ зэпеуэм. Килограмм 67-рэ хъухэр щыбанэ Локьяев Жамболэт зыхэта гупым япэ увыпIэр къыщихьащ. Апхуэдуи дыщэ медалыр зыIэригъэхьащ Хьэхъуокъуэ Темыркъан, ар зыхэтыр килограмм 97-рэ хъухэр щызэпеуэ гупырщ.
ЩIалэхэм я тренерхэр Локьяев Юрэрэ Къардэн Анзоррэщ.

Тай бокс

Бахъсэндэсхэм лъагъуэр хаш

Быф Жэмал и цIэр зэрихьэу Бахъсэн къалэм дэт спорт еджапIэм илъэс иримыкъущ сабийхэр тай боксымкIэ (муай-тай) ягъэсэн зэрыщыщIадзэрэ. ЦIыкIухэм я тренерыр дунейпсо классымкIэ спортым и мастер, дунейпсо чемпионатхэм тIэу щытекIуа, Урысей Федерацэм щэнейрэ и чемпион, Дагъыстэным 15-рэ и чемпион хъуа Бекбулатов Рашидщ. 
Дагъыстэн республикэм пашэныгъэр къыщыхьыным хуэунэтIауэ иджыблагъэ Каспийск къалэм муай-таймкIэ щекIуэкIа зэIущIэ зэIухам щыIащ Бахъсэн икIа спортсмен ныбжьыщIэхэр. Апхуэдэуи абы кърихьэлIащ къэралым и адрей щIыналъэхэм я лIыкIуэу цIыху 600-м нэблагъэ. 
ГуащIэу икIи удэзыхьэхыу екIуэкIа зэхьэзэхуэм медалибл къыхахащ бахъсэндэсхэм. «А» классым зыкъыщызыгъэлъэгъуа, илъэс 12 -13 хъухэр зыхэт гупым я деж щызауэ Бекбулатов Мухьэмэд (кг 58-рэ) япэ увыпIэр къихьащ.
 «Б» классым хэта Уэркъуасэ Мухьэмэди зэпеуэм и дыщэ медалыр къыщихьащ килограмм 67-рэ хъухэм я деж. ЕтIуанэ увыпIэр мыбы щаубыдащ Тумгоев Абдулмалик (кг 57-рэ), Джаурджий Ратмир (кг 67-рэ), Къуэныкъуэ Алий (кг 45-рэ) сымэ. Ещанэ хъуахэщ Нэгъуей Ашэмэзрэ (кг 48-рэ) Къатинэ Идаррэ (кг 51рэ). 

Зауэ самбэ

Зэхьэзэхуэм къыщыхожаныкI

Ставрополь крайм и Грачевкэ къуажэм дэт «Лидер» спорт комплексым иджыблагъэ щекIуэкIащ зауэ самбэмкIэ зэхьэзэхуэ зэIуха. Ар траухуауэ щытащ ЦIыхубэ зэкъуэтыныгъэм и махуэр гъэлъэпIэным. 
Зэпеуэм къыщыхэжаныкIащ Май щIыналъэм и бэнакIуэхэр: Филатов Матвейрэ Фазиев Алийрэ домбеякъ медалыр къахьащ, Балъкъэр Руслан етIуанэ хъуащ. 
ЩIалэхэм зыщагъасэр «Пересвет» спорт клубырщ, я тренерыр Гаввэ Дмитрийщ.