Самбэм нэхъри зиужьын папщIэ

  Налшык къалэм и «Гладиатор» спорт комплексым иджыблагъэ щекIуэкIащ самбэмкIэ зэхьэзэхуэ. Ар хуэунэтIауэ щытащ Урысей Федерацэм ШынагъуэншагъэмкIэ и органхэм я лэжьакIуэм и махуэр гъэлъэпIэным. Абы щызэпеуащ къэралым и щIыналъэ 13-м я спортсмен ныбжьыщIэу, илъэс 13-15-хэм къриубыдэу, 120-м щIигъу.

Зэхьэзэхуэм ипэ къихуэу УФ-м и ФСБ-м и управленэу КъБР-м щыIэм и унафэщIым и къуэдзэ Вятлов Андрей къызэхуэсахэм псалъэ гуапэкIэ зэхуигъэзащ икIи зэпеуэм хэтхэм ехъуэхъуащ ехъулIэныгъэфIхэр къагъэлъэгъуэну, самбэм адэкIи зрагъэужьыну. Апхуэдэуи спортым щIалэгъуалэм я дежкIэ иIэ мыхьэнэм теухуауэ къэпсэлъащ Къэбэрдей-Балъкъэрым и Правительствэм и УнафэщIым и къуэдзэ - КъБР-м и министр Къуэшырокъуэ Залым. Зэпеуэм  кърихьэлIат КъБР-м и гъэзэщIакIуэ властым, муниципалитетхэм, ветеран, спорт зэгухьэныгъэхэм я лIыкIуэхэр, спортсмен цIэрыIуэхэр. 

Зэпеуэр къыщызэIуахым ирихьэлIэу нэгъуэщI Iуэху гуапи екIуэкIащ -  Къэбэрдей-Балъкъэрым щIалэгъуалэм я IуэхухэмкIэ и министр Лу Азэмэт, «Пэрытхэм я зэщIэхъееныгъэ» щIыналъэ къудамэм и унафэщI Шыпш Азэмэт, республикэм СамбэмкIэ  и федерацэм и тхьэмадэ Бабыгуей Олег сымэ адэкIэ зэрызэдэлэжьэну щIыкIэм теухуа лъэныкъуищ зэгурыIуэныгъэм Iэ щытрадзащ абдеж.

         ГъэщIэгъуэну икIи удэзыхьэхыу екIуэкIа зэхьэзэхуэм кърикIуахэр зэхалъхьэжа нэужь наIуэ къызэрыхъуамкIэ, Къэбэрдей-Балъкъэрым и бэнакIуэхэм псори зэхэту медаль 21-рэ къахьащ - 6-р дыщэу, 4-р дыжьыну, 11-р домбеякъыу.

Зэхьэзэхуэм къыщыхэжаныкIахэм  иратащ медалхэр, кубокхэр, щIыхь тхылъхэр. Абы нэмыщI, нэхъыфIу зыкъэзыгъэлъэгъуахэм саугъэт щхьэхуэхэр спонсорхэм хуагъэфэщащ.

КъБР-м СамбэмкIэ и федерацэм и тхьэмадэ, дуней псом и чемпион Бабыгуей Олег зэрыжиIамкIэ, зэхьэзэхуэр къызэрагъэпэщащ езым и унафэ щIэт IуэхущIапIэм, «Пэрытхэм я зэщIэхъееныгъэм» и щIыналъэ къудамэм, КъБР-м СпортымкIэ и министерствэм, республикэм ЩIалэгъуалэм я IуэхухэмкIэ и министерствэм.

                                                        ХЬЭЩЫКЪУЕЙ Олег.