Ласицкене Марие лъагапIэхэр и щIэщыгъуэжкъымУрысейм и «ГЦОЛИФК» спорт университету Мэзкуу къалэм дэтым иджыблагъэ щекIуэкIащ атлетикэ псынщIэмкIэ урысейпсо зэхьэзэхуэ. Ар къызэрагъэпэщат Дьячков Владимиррэ Озолин Николайрэ я фэеплъу. Зэхьэзэхуэм хэтащ Къэбэрдей-Балъкъэрым и гъэсэн, Олимп джэгухэм я чемпион Ласицкине (Кучинэ) Марие икIи лъагапIэхэм елъэнымкIэ екIуэкIа зэпеуэм дыщэ медаль къыщихьащ. Спортсмен цIэрыIуэм хузэфIэкIащ метр 1,90-рэ лъагагъым щхьэпрылъыкIын. ЕтIуанэ хъуащ Королёвэ Кристинэ, ещанэ увыпIэм къыщыувыIащ Ермаченковэ Татьянэ - абыхэм тIуми метр 1,87-р къахуэщтауэ аращ. Иджы Ласицкине Марие къыпэщылъщ цIыхухъухэмрэ цIыхубзхэмрэ зэхэту ирагъэкIуэкI «Битва полов» урысейпсо зэпеуэм хэтыну. Абы къыхашэнущ Белоруссием и спортсменхэри. Фигу къэдгъэкIыжынщи, илъэсым зэрыщIидзэрэ ди хэкуэгъу бзылъхугъэр зэхьэзэхуищым хэтати, зыщIыпIи медалыншэ щыхъуакъым – япэ увыпIэу тIурэ зы ещанэрэ зыIэригъэхьащ.
ХЬЭЩЫКЪУЕЙ Олег.
Поделиться:
Читать также:
03.05.2024 - 17:48 →
Спортсмен цIэрыIуэм и фэеплъу
03.05.2024 - 16:51 →
Алим кIэух зэпеуэм хэтынущ
03.05.2024 - 15:27 →
ЕтIуанэ увыпIэр къахь
03.05.2024 - 09:58 →
Балъкъыз Камилэ дыщэ медаль къехь
02.05.2024 - 16:33 →
Гуп зэпеуэм щыяпэщ
|