Налшык къалэм дэт Къэрал концер гъэлъэгъуапIэм «Псалъэр гум щынэскIэ…» фIэщыгъэ дахэр зиIэ хэгъэгупсо литературэ зэпеуэм и бжьыгъуэ зэфIэхьыр щекIуэкIащ.
Илъэс къэс екIуэкI а Iуэхугъуэшхуэм мы гъэм хуабжьу зэрызиубгъуар хэта ныбжьыщIэм я куэдагъымкIэ къапщIэрт. Ар фэеплъ хуащIат усакIуэ цIэрыIуэ Къэшэж Иннэ, абы къыдэкIуэуи КъБР-мрэ КъШР-мрэ я цIыхубэ усакIуэ Ацкъан Русланрэ КъБР-м и цIыхубэ усакIуэ Беппаев Мут1алипрэ я махуэщIхэм ирагъэхьэлIат.
КъБР-м тхылъыр фIыуэ зылъагъу и щIэджыкIакIуэхэм я зэгухьэныгъэм къызэригъэпэща зэпеуэм мы гъэм цIыхуи 100-м щIигъу хэтащ. Зэгухьэныгъэм и унафэщI Шинкарёвэ Наталье зэрыжиIамкIэ, хэхъуар зэпеуэм къыхьэхэм я бжыгъэм и закъуэкъым, атIэ утыку кърахьэ литературэ тхыгъэм и къеджэкIэм, абы халъхьэ зыхэщIэныгъэм фIыуэ зиужьащ. «Къалэмыр къэзыщтар зытетхыхь дунейр щхъуэкIэплъыкIэщ, дахагъэмрэ къабзагъэмрэ щопэкIу, фIым ухуеущий. Иджыпсту къыщыщIэдзауэ сабийхэм тхылъыр Iэпэгъу яхуэдмыщIмэ, абыхэм я зэхэщIыкIым щыщIагъэшхуэ игъуэтынущ. Ар къэмыхъун папщIэщ мыпхуэдэ зэпеуэхэр щIызэхэтшэр, зэныкъуэкъухэр къызэдгъэпэщурэ еджэкIэ зэмылIэужьыгъуэхэм ныбжьыщIэхэр щIыщIэдгъэдэIур. Дунейм и дахагъыр къэзыIуатэ усакIуэм е тхакIуэм я IэдакъэщIэкIми пщIэ егъуэт, цIыхум деж нос, зыхуэгъэпса пщэрылъ нэхъыщхьэри зэщIа мэхъу», – жиIащ Шинкарёвэм.
Бжьыгъуэ зэфIэхьым и утыкум къихьэну цIыкIухэм едэIуэну зэхуашэса КъэпщытакIуэ гупым и нэхъыщхьэр Ацкъан Руслант. Абы къищынэмыщIауэ, гупым хэтащ КъБР-м Тхылъыр фIыуэ зылъагъухэм я зэгухьэныгъэм и советым и унафэщI, КъБР-м и Iэтащхьэм и Администрацэм и УнафэщIым и секретариатым и пашэ Бекъул Аслъэнбэч, КъБР-м щэнхабзэмкIэ щIыхь зиIэ и лэжьакIуэ, Кавказ Ищхъэрэм ГъуазджэмкIэ и институтым и доцент Боттаев Мурат, тхакIуэ, УФ и ТхакIуэхэм икIи и Журналистхэм я зэгухьэныгъэхэм хэт, КъБР-м щэнхабзэмкIэ щIыхь зиIэ и лэжьакIуэ Мусукаевэ Сакинат, усакIуэ, журналист Мазуренкэ Маринэ, «Горянка» газетым и лэжьакIуэ, журналист Щэрдан Лилианэ, «Солнышко» сабий журналым и унафэщI Щомахуэ Дарье, нэгъуэщIхэри.
КъэпщытакIуэ гупым хэтхэр еплъырт зэпеуэм хэтхэм къыхаха усыгъэр е тхыгъэр зыхуэгъэпсам, ар ныбжьым зэрыхуэкIуэм, къабзэу къызэригъэIум, щыуагъэ къыхэмыкIыу зэрызэкIэлъигъакIуэм, утыку къызэрихьэм, екIуу зэритым, гъэхуауэ къызэреджэм, зэрызыхищIэм. Абы къищынэмыщIауэ, пкъыбзэми мыхьэнэшхуэ къэпщытакIуэхэм иратащ – абыкIэ къапщIэрт литературэм къыхиха тхыгъэр сабийм и дуней зыхэщIэм къызэрищтар, ар къедаIуэхэм деж зэрынихьэсыфыр.
Ипэрей илъэсхэм хуэмыдэу, мыгъэрей бжьыгъуэ зэфIэхьым балл лей хуагъэувырт анэдэлъхубзэкIэ усэ е тхыгъэ къеджэ сабийм. «Си гуапэу къыхэзгъэщыну сыхуейт мы гъэм анэдэлъхубзэхэм – адыгэбзэмрэ балъкъэрыбзэмрэ – гулъытэшхуэ зэрагъуэтар. Усэ къеджахэм я нэхъыбэр а бзэхэмкIэ утыкур ягъэбжьыфIащ. Адыгэбзэмрэ балъкъэрыбзэмрэ зымыщIэхэм урысыбзэкIэ зэрадзэкIа Ацкъан Руслан и тхыгъэхэр къащтэри къеджат. Ар гулъытэшхуэу къысщохъу, гъэсэныгъэ дахэм и щапхъэуи къызолъытэ, зы лъэныкъуэкIэ, нэгъуэщI лъэныкъуэкIэ укъыбгъэдыхьэмэ – мы илъэсым зи махуэщI дахэр зыгъэлъапIэ Ацкъан Руслан дежкIи гуапагъэщ», – къыхигъэщащ Шинкарёвэ Наталье.
Зэпеуэр нэхъыбэу зытегъэщIар Къэшэж Иннэ и усыгъэхэрат, абы и фэеплъу къызэрызэрагъэпэщар къапщIэу и усэ куэди къэIуат. «ГъэкIэ едгъэкIуэкI зэпеуэм усакIуэм и къалэмыпэ къыщIэкIа тхыгъэ цIэрыIуэхэм, куэдым яцIыху усэхэм нэхъыбэр къеджэу щытамэ, мы гъэм апхуэдэтэкъым. Къэшэж Иннэ и усыгъэр адыгэбзэкIи урысыбзэкIи щыIэ зэрыхъуам и фIагъыр зыхэтщIащ – цIыкIухэр къызэджэ усэхэр зытеухуакIи зэщхьэщыкIырт, зэрагъэзащIэ щIыкIэкIи зэтехуэртэкъым – Къэшэжым и усыгъэр плъыфэу зэрыщытыр зэпеуэм наIуэ щыхъуащ. Си гуапэщ щыуагъэкIэ уемыджэнуми, ипэ илъэсхэм щыIа щыщIэныгъэхэр адэ-анэхэм, гъэсакIуэхэм, егъэджакIуэхэм зэраузэхужар», – жиIащ Шинкарёвэм.
Бжьыгъуэ зэфIэхьым къыхэжаныкIахэр куэд дыдэ мэхъу. Апхуэдэу зи ныбжьыр илъэси 10-м нызэрыхьэс цIыкIухэм ящыщу зэпеуэм къыщыхэжаныкIащ Бозий Софие, Джэбар Месум, Чочаевэ Эльнарэ сымэ. Мы гупым щыщу Гран-прикIэ зэджэ тыгъэ лъапIэр хуагъэфэщащ Уэсмэн Даринэ.
Зи ныбжьыр илъэс 12-м фIэмыкI гупым щыщу пашэныгъэр зыIэрагъэхьащ Егъуэж СулътIанрэ Джаппуевэ Самирэрэ. Гран-прир хуагъэфэщащ Узденовэ Iэзинэ.
НыбжьыщIэ нэхъыжьыIуэхэр зыхэт гупым къыхэжаныкIащ Къумыкъу Каринэ, Кумыщ Сафие, Радостевэ Варварэ сымэ. Гран-прир ихьащ Жубоев Сулеймэн.
Бжьыгъуэ зэфIэхьым хэтахэм ящыщу зи сэнаущыгъэкIэ, зи утыку итыкIэкIэ, зи усэ къеджэкIэ къыхагъэщахэр мащIэкъым. Абы къищынэмыщIауэ, «УсакIуэм и гъэфIэн» фIэщыгъэр зиIэ фIыщIэ тхылъхэри куэдым яIэрыхьащ.
Дахагъэм щIэблэр щIэпIыкIыныр пщэдейрей махуэхэм утелажьэм ещхьщ – хэпсэ жылэр фIыгъуэщи, абы хуэгъэза дэтхэнэ жэрдэмри игъуэщ. Зэпеуэм къигъэлъэгъуащ къытщIэхъуэ щIалэгъуалэр анэдэлъхубзэм зэрыхуэныкъуэр, абы дебгъэхьэхмэ, и IэфIагъыр зыхебгъащIэмэ, ар мыухыж пшыналъэу къишэрэшыкIыу зэрыхуежьэнур. ФIыщIэшхуэ ябгъэдэлъщ къызэгъэпэщакIуэхэм.
