Футболым дихьэххэр зэрыщыгъуазэщи, мы джэгукIэ дахэм и хэкур Инджылыз къэралыгъуэрщ. Ауэ абы зэман кIэщIым мы дунеишхуэр зэщIищтащ икIи джэгукIэ лIэужьыгъуэхэм бжьыпэр щиубыдащ. Ди Къэбэрдей-Балъкъэр Республикэм и «Спартак» командэ пашэр къыщызэрагъэпэща I935 гъэм хуахь футболыр ди деж къэсу цIыху минипщIхэр щыдихьэхар икIи спортым я щхьэ щыхъуар. Мы гъэм илъэс 65-рэ ирокъу ди командэ пашэр къэрал утыкушхуэм ихьэу, Совет Союзым и зэхьэзэхуэм зэрыхыхьэрэ. Абы ипэкIэ зэпымыууэ зыхэтар ди республикэ кIуэцI зэхьэзэхуэхэрщ. Сыхуейт футболым дихьэххэм нэхъыбэрэ ягу къагъэкIыжхэмрэ журналист лэжьыгъэм и фIыщIэкIэ си нэгу щIэкIахэмрэ си тхыгъэ кIэщIхэм сакъыщытеувыIэну. Пэублэу, зи ехъулIэныгъэ инхэмкIэ ди щIыналъэ спорт щIыхьыр лъагэу зыIэтахэм я цIэр дигу къэдгъэкIыжмэ, нэхъ тэмэму къыщIэкIынщ.
Къэбэрдей-Балъкъэрым, сыт щыгъуэ зэмани, спортым пщIэ лей щыхуащIу къокIуэкI. Дэ диIащ икIи ноби диIэщ бэнэкIэ зэмылIэужьыгъуэхэмкIэ, атлетикэ псынщIэ, хьэлъэ, шы спорт, нэгъуэщI спорт джэгукIэхэмкIэ дунейпсо, Олимп, къэрал кIуэцI, нэгъуэщI зэпеуэшхухэм текIуэныгъэ, саугъэт лъапIэ, увыпIэ лъагэ къыщахьамкIэ цIэрыIуэ хъуауэ дызэрыгушхуэхэр. Ди щхьэр лъагэу дызыгъэIэта спортсменхэщ Шыхъуэ Борис, Къардэн Мурат, Хъущт Аслъэнбэч, Мудрэн Беслъэн, Махуэ Билал, Тау Хьэсэнбий, Джэду Iэниуар, Урыш Анзор, Джэданэ Алим, УнэшхуэлI Аслъэн, Къуэдзокъуэ Сосрыкъуэ, Гъэунэ Анзор, Жаным Аслъэн, ТIэхъуш Заур, Гаджиев Алим, Анаев Аслъэн, Аккаев Хьэжмурат, Мэзыхьэ Ризуан, КIэмпIарэ Марат, Кабалоев Виталий, Настуев Мусса, Акименкэ Михаил, Туменов Биберт, Ласицкене Марие, Курамагомедов Заур, Нэгуэр Айданэ, Адыгэунэ Маирбэч, Лефлер Артем, Сэбаншы Мартин, Мэжджыхь Эдуард, Узденов Марат, Ботвин Иван, Мырзэкъан Азэмэт, Беслъэней Нурмухьэмэд сымэ, нэгъуэщIхэри.
Иджы дыкъытеувыIэнщ цIыху нэхъыбэ дэзыхьэх, спортым япэ увыпIэр быдэу щызыIыгъ футболым. Илъэс I4 дэкIауэ аращ ди «Спартак-Налшык» командэ нэхъыщхьэм нэхъ ехъулIэныгъэшхуэ щиIар. Хэт игугъэнт Красножан Юрий япэ дивизионым етIуанэ увыпIэр къыщихьу, Урысей чемпионатым и гуп пашэм хэхуэну, илъэсихкIэ текIуэныгъэшхуэхэмкIэ дигъэгуфIэу, бжьыпэр щиIыгъыни къэхъуну. Республикэ цIыкIум и командэм мылъкушхуэ зэрыбгъэдэмылъар, футболист цIэрыIуэхэмкIэ къызэгъэпэщауэ зэрыщымытар къэплъытэмэ, еханэ увыпIэр къыщыпхьыныр икъукIэ ехъулIэныгъэшхуэу къэплъытэ хъунут. Къэралым къыщыдэкI газетхэм, телевиденэ нэхъыщхьэм, радиом я каналхэм щылажьэ журналистхэм, футболым хуэлажьэхэм ар зыхуахьынур ямыщIэу яфIэтелъыджэт. «Чемпионатым щыпашэр «Спартак»-рщ, ауэ дызэса, ди гугъа «Спартак»-р аракъым». Апхуэдэ фIэщыгъэ иIэу тхыгъэшхуэ къытехуат «Спорт-Экспресс» газет цIэрыIуэм. «Хэт хъуну Красножан Юрий?», «Хэт сымэ щыджэгур «Спартак-Налшыкым»?» тетт адрей газет пашэхэм.
Хьэмэрэ ди командэр утыкушхуэм иджыри нэмысауэ, япэ дивизионым иджыри щыджэгуу Урысейм и Кубокым щIэбэну Мэзкуу и «Динамо» командэ цIэрыIуэр 2:0 бжыгъэкIэ зэрыхигъэщIамрэ Узденов Роман хьэрхуэрэгъухэм я гъуэм дигъэкIа топитIымрэ зи нэгу щIэкIа дэщIакIуэхэм пхуащыгъэгъупщэн?
Гуапэу дигу къинэжа ехъулIэныгъэхэу ди футболистхэм яIар куэд мэхъу. Командэм и унафэщIуи, гъэсакIуэуи, футболистуи дызыгъэгушхуа, дызыгъэгуфIа ди мащIэкъым. ЩысыпIэ дэнэ къэна, щытыпIэ стадионым щыгъуэтыгъуейуэ цIыху мин I5-м нэс екIуалIэу щытащ. Ауэ, ди жагъуэ зэрыхъунщи, ар тхыдэу къэнэжащ. НобэкIэ нэщIщ республикэм и стадион нэхъыщхьэр, езы ди командэри ещанэ гуп нэхъ махэрщ зыхэтыр. Футболым мылъкур щытепщэ зэрыхъурэ, ди тепIэн елъытауэщ ди лъэр зэрытхуэукъуэдийр.
Иджы, республикэ кIуэцI гъэмахуэ, щIымахуэ чемпионатхэм ятеухуауэ. Гуапэ пщымыхъуу къанэркъым иужьрейуэ екIуэкIа зэхьэзэхуэм Налшык и «Спартак» ныбжьыщIэ командэр зыми хухэмыгъащIэу чемпион зэрыщыхъуар. Абы фIым ущегъэгугъ. Ди щIалэгъуалэм къахэкIыу щытащ футболист цIэрыIуэхэу Iэпщэ Александр, Беляев Владимир, Хьэпэ Заур, Алдышев Анатолэ, Ещтрэч Владимир, Бэч Руслан, ТыIэщ Хьэсэнбий, Настаев Шамиль, Биджиев Хьэсан, Исаев Шамиль, Алчагиров Алий, Наурыз Басир, Гъубж Вячеслав, Балэ Владимир, Iэхъуэбэч МуIэед, Кокорин Николай, Хьэнцэ Аслъэнбэч, Лобжанидзе Георгий, Ашэбокъуэ Руслан, нэгъуэщIхэу зи джэгукIэ дахэмкIэ дызыгъэгуфIэу щытахэм хуэдэхэри.
ИтIанэ, гуапэ пщымыхъуу къанэркъым, сыт щыгъуи хуэдэу, зэфIэкI зиIэ, екIурэ-ещхьу джэгу къуажэ командэхэр зэрынэхъыбэр. Сыту жыпIэмэ, ипэ увыпIэхэм, кIэщI-кIэщIурэ, яхыболъагъуэ джэгукIэкIэ зэфIэкI яIэми, джэгупIэ дыдэ зимыIэ. Апхуэдэу щытми, ипэ зэманхэм елъытауэ, ди джэгупIэ губгъуэ дагъуэншэу къызэгъэпэщахэм хуэдэ зимыIэ къэралыгъуэхэр зэрымымащIэр интернетым иболъагъуэ. Абы щыгъуи а джэгупIэхэр фаджэрэ щхъуантIагъэм хуэхейуэ.
Дэ инэхъыбэм димыIэрщ дызытепсэлъыхьыр. Ауэ пхужыIэнукъым ди футболыр зыхуей-зыхуэфIхэмкIэ апхуэдэу мыхьэнэншэу къызэгъэпэщауэ. Апхуэдэу щыщыткIэ, дыщыгугъынщ иджыри а джэгукIэ дахэмкIэ ди футболистхэм мымащIэу дагъэгуфIэну.
