Ибукэ Масару 1908 гъэм мэлыжьыхьым и 11-м Токио километрищэкIэ пэIэщIэ Никко къалэм къыщалъхуащ. Электростанцым инженеру щылажьэ абы и адэм машинэ къыжьэхэуэу, щIалэ цIыкIур зеиншэ щыхъуам, илъэситI фIэкIа и ныбжьтэкъым. Масару и анэм щIалэ цIыкIур и гуащэ-тхьэмадэм къахуигъанэри езым унагъуэщIэ иухуэжат. Адэшхуэ-анэшхуэм лъэпкъ хабзэхэм щIапIыкIа сабийм зэрыцIыкIурэ фIэхьэлэмэтт Iэмэпсымэхэр зэрызэпкърылъ щIыкIэр.
Курыт еджапIэр къиуха нэужь, Масару Вэсэдэ университетым и электротехническэ факультетым щIотIысхьэри фIы дыдэу щоджэ, къыдеджэхэм «гений-IэщIагъэлI» къыфIащауэ. 1933 гъэм университетыр къэзыух ныбжьыщIэм и диплом лэжьыгъэм Париж щекIуэкIа гъэлъэгъуэныгъэм саугъэт къыщихьауэ щытащ. 1933 - 1936 гъэхэм Масару щылэжьащ сурэтымрэ макъымрэ зытх Iэмэпсымэхэм щелэжь фотохимическэ IуэхущIапIэм. 1946 гъэм Ибукэ зрегъэцIыху япон физик цIэрыIуэ Моритэ Акио. Абыхэм яку къыдэхъуа зэныбжьэгъугъэм и Iэужьщ зэман дэкIа нэужь «Sony» фIэщыгъэмкIэ дуней псом цIэрыIуэ щыхъуа фирмэр. Магнитофонхэр, япэ дыдэу дунейм къытехьа сурэттех лIэужьыгъуэщIэхэр, CD-Iэмэпсымэхэр, ноутбукхэр, макъым зэредаIуэ тхьэкIумэIулъхьэхэр, дискхэр, кIэщIу жыпIэмэ, ди нобэрей гъащIэм хэмыту къызыфIэдмыгъэщIыф нэгъуэщI Iэмэпсымэ куэди къыщIигъэкIырт а фирмэ лъэрызехьэм. Ибукэщ зыунэтIар IуэхущIапIэр зытемыкIыну гъуэгур: «Дэ хабзэншагъкIэ зэи мылъку хьэрэм зэтхьэлIэнукъым. ЦIыхухэм я сэбэп къызэрыкIын Iэмэпсымэхэм ди къару къызэрихькIэ делэжьынущ. КъыщIэдгъэкI Iэмэпсымэхэр механическэрэ электроннэкIэ дымыгуэшу, ди щIэныгъэр зэуэ лъэныкъуитIми къызэрыщысэбэпынум дыхущIэкъунущ. Къыддэлажьэ IуэхущIапIэхэр я щхьэ хуитыжу, ди зэпыщIэныгъэхэр едгъэфIакIуэ зэпыту щытынущ. Ди лэжьакIуэхэр я Iэзагъымрэ хьэл-щэнымрэ елъытауэщ къызэрытщтэнур. Ди лэжьапIэм мыхьэнэ зимыIэ IэнатIэ хэтынукъым. Ди лэжьакIуэхэм яхузэфIэкIым къыпэкIуэу ахъшэ саугъэтхэр яхуэтщIынущ, ди къаруи деблэжынукъым, абыхэм я псэукIэр едгъэфIэкIуэн папщIэ».
«Илъэсищ ирикъуамэ - гуващ» тхылъыр Ибукэ сабий цIыкIу дыдэхэм я гъэсэныгъэм триухуа тхылъщ. ТхакIуэм къызэрыхигъэщымкIэ, ар езым и гуныкъуэгъуэр щхьэусыгъуэ зыхуэхъуа лэжьыгъэщ: Масару и щIалэ нэхъыжьым и узыншагъэр иригъэфIэкIуэн папщIэ, гъэсэныгъэ Iуэхухэм куууэ хэт, дунейм щыцIэрыIуэ япон шыкIэпшынауэ (скрипач) Сузуки Шиничи чэнджэщэгъу ищIат. Абы ижь къызэрыщIихуар и лъабжьэщ Ибукэ «ЗэчиифIэхэр щагъасэ» школ къызэрызэIуихами «Сабийм пасэу зыщрагъэужь зэгухьэныгъэ» Японием къызэрыщызэригъэпэщами.
Зы щIалэрэ хъыджэбзитIрэ иIэу, илъэс пщIейрэ ебгъуанэм иту Ибука Масару 1997 гъэм дыгъэгъазэм и 19-м Токио дэт и унэм дунейм щехыжащ. Нобэ тыдодзэ нэхъ пасэу зи гугъу фхуэтщIа «Илъэсищ ирикъуамэ - гуващ» тхылъым щыщ Iыхьэхэр.
Ибукэ Масару
Илъэсищ ирикъуамэ - гуващ
ЦIыкIухэр сабий садым гъэсэн щыщIэбдзэныр кIасэIуэщ
Хэти ищIэж къыщIэкIынщ школым щыщIэсым щыгъуэ, я классым псоми япэ ищыныр зыкIи къызытемыхьэлъэ, адрейхэм къахэжаныкI еджакIуэ зэрыщIэсар. Апхуэдэ дыдэу гупым яхэст сыт хуэдизу емыIэми, «емыджэфхэм» къахэмыкIыф еджакIуи.
Сэ школым сыщыщIэса зэманым егъэджакIуэхэм дызэрытрагъэгушхуэ хабзэу щытар мы псалъэхэмкIэщ: «Губзыгъагъри акъылыншагъри цIыхум къыдалъхуркъым, псори зэлъытар уэ узэрызэлIэлIэжырщ». ИтIани си нэгу щIэкIым IупщIу къигъэлъагъуэрт «отличник»-р сыт щыгъуи зэры-отличникыр, «емыджэфыр» сыт щыгъуи зэремыджэфыр. Акъылым и Iуэхум ухэмыIэбэфыну къысфIэщIырт. Дауэт гу зэрылъумытэнур апхуэдэ зэщхьэщыкIыныгъэшхуэм?!
Иджы сызыхуэкIуа гупсысэращ: цIыхум бгъэдэлъ Iэзагъри хьэл-щэнри узыхэмыIэбэфыну щыткъым, абыхэм я нэхъыбэр ныбжь гуэрым диту зыхыдолъхьэ. Куэд щIауэ зодауэ: цIыхум псори къыдалъхурэ, хьэмэрэ бгъэдэлъ хьэлымрэ щIэныгъэмрэ гъэсэныгъэм е егъэджэныгъэм елъыта? Нобэр къыздэсым а зэдауэхэм жэуап пыухыкIа езытыфын теорие нэгъэса щыIэкъым. Щхьэ куцIым и лэжьэкIэм теухуа къэхутэныгъэхэмрэ сабийм дэплъагъумрэ уи фIэщ ящI акъылым пасэу зебгъэужьыным и щэхур щхьэ куцI налъэхэм уэру зыщаужь япэрей илъэсищым зэрыщыгъэпщкIуар. «Гений хьэзыруи» «акъылыншэ дыдэуи» зы сабий къалъхуркъым. Псори зэлъытар япэрей илъэсхэм щхьэ куцIыр зэрагъэлажьэ щIыкIэрщ. Абы хиубыдэр сабийр дунейм къыщытехьам щегъэжьауэ япэрей илъэсищырщ. Гъэсэныгъэр сабий садым щыщIэбдзэну кIасэIуэщ.
Дэтхэнэ сабийри фIыуэ еджэфынущ, псори зэлъытар зэрырагъаджэ Iэмалырщ
Тхылъеджэм фIэгъэщIэгъуэнынкIи хъунщ сэ - инженерым, IуэхущIапIэ абрагъуэм и президентым, цIыхур пасэу гъэсэн щIэдзэн зэрыхуейм и Iуэху зесхуэн щIыщIэздза щхьэусыгъуэхэр. Абыхэм я зы Iыхьэр цIыхубэм епхащ: сэ къысфIэмыIуэхуу щыткъым нобэрей ди щIалэгъуалэм къигъэхъу Iэуэлъауэхэр. СызоупщIыж: сыт хуэдизкIэ нобэрей егъэджэныгъэр къуаншэ а щIалэхэр гъащIэм зэрыхуэмыарэзымкIэ? Си щхьэкIи щхьэусыгъуэ схуэхъуа гукъеуэ сиIэщ: си сабийр акъылкIэ и ныбжьхэм ялъэщIыхьэртэкъым.
Си къуэр цIыкIуху, пэжу ебгъаджэу щытми, абы адрейхэм хуэдэ цIыху еджа къыхэкIыну си фIэщ хъуртэкъым. Си нэр къэзыгъэплъэжар Сузуки Шиничи профессорырщ. Абы жеIэ: «Сабий къыкIэрыхуа щыIэкъым - псори зэлъытар зэрырагъаджэ Iэмалырщ».
Сузуки «ЗэчиифIэхэр зэрагъасэ» зыфIища Iэмалым и фIыгъэкIэ къехъулIахэр, цIыкIунитIэхэр шыкIэпшынэ (скрипкэ) зэрырагъауэр япэу щыслъагъум, адэм и пщэрылъым ипкъ иткIэ, си сабийр и чэзум бгъэдэслъхьапхъэм зэрыхэзгъэкIыжам сыхущIегъуэжат.
Япэ дыдэ студент ныбжьыщIэхэм къагъэхъей зэрызехьэхэм я щхьэусыгъуэр зэхэзгъэкIыну сыщыхуежьэм, си фIэщу егъэджэныгъэм и мыхьэнэм сегупсысурэ зыгурызгъэIуэну сыхэтащ ди зэхэтыкIэм апхуэдиз игъуэджэрэ мыарэзыныгъэрэ къыхэзыхьэр. ЯпэщIыкIэ сигу къэкIащ игъуэджэр университетым ирит щIэныгъэм къыхэкIыу. АрщхьэкIэ нэхъ куууэ сыхэгъуэзэху, гу лъыстащ ардыдэм курыт еджапIэми узэрыщыхуэзэм. ИтIанэ пэщIэдзэ школми сеплъащ. ИкIэм сызыхуэкIуаращ: сабий садым кIуэн щIэзыдза сабийр бгъэсэжыну ухуежьэмэ, укъыкIэрыхуауэ аращ. ЗэрымыщIэкIэ а си гупсысэр профессор Сузукирэ абы и лэжьэгъухэмрэ зэрахуэ Iуэхум епхауэ къыщIэкIащ.
Сузуки и метод гъуэзэджэр илъэс щэщI хъуауэ къегъэсэбэп. ИпэкIэ абы къекIуэкI хабзэ егъэджэныгъэ IэмалхэмкIэ пэщIэдзэ классхэмрэ еджакIуэ нэхъыжьхэмрэ иригъаджэу щытащ. Профессорым гу лъитащ еджакIуэ нэхъыжьхэм я деж еджэфхэмрэ емыджэфхэмрэ егъэлеяуэ зэрыщызэщхьэщыкIыр. Арати, абы япэщIыкIэ мурад ещI сабий нэхъыщIэхэр иригъэджэн щIидзэну, итIанэ - нэхъ цIыкIухэр. Профессорыр хуэм-хуэмурэ хуэкIуащ нэхъыщIэ дыдэхэр иригъэджэным. Сузуки сабийхэр шыкIэпшынэ еуэкIэ щIригъасэр езыр шыкIэпшынауэти арат. А Iэмалыр егъэджэныгъэм и къудамэ псоми къыщыбгъэсэбэп зэрыхъунур къыщызгурыIуэм, сэри «сабийхэр пасэу егъэджэн» Iэмалым нэхъ куууэ селэжьын щIэздзащ.
«Сабийхэр пасэу егъэджэн» Iэмалым абыхэм цIыхушхуэ къахищIыкIын мурад иIэкъым
ЦIыхухэр куэдрэ къызоупщI: сабийм пасэу зебгъэужьмэ, абы «гений» къыхэкIыну? Жэуап язот: «Хьэуэ!» Акъыл куурэ Iэпкълъэпкъ узыншэрэ къезытын щIэныгъэ хыупщэу, цIыхуфIрэ акъылыфIэу къэбгъэхъун щхьэкIэщ сабийм пасэу зегъэужьын щIыхуейр.
ЦIыху къэс къыдалъхуауэ IэпкълъэпкъкIэ щыщIэныгъэ имыIэмэ, нэхъыбэр зэхуэдэщ. ИужькIэ сабийхэр делэрэ губзыгъэу, еудыхарэ бзаджэу щIызэхадзыжымкIэ къуаншэр гъэсэныгъэращ. Дэтхэнэ зы сабийми и чэзум хуэфащэ гулъытэ, щIэныгъэ игъуэтмэ, абы цIыху Iущ, зэпIэзэрыт къыхэкIынущ.
Сэ сызэреплъымкIэ, цIыкIунитIэм пасэу зегъэужьын щIэдзэн щIыхуейр сабий насыпыншэ щымыIэн папщIэщ. Ар макъамэ дахэ щIрагъэдаIуэр, хьэмэ шыкIэпшынэ щIрагъауэр абы макъамэтх гъуэзэджэ къыхащIыкIын папщIэкъым. Хамэбзэ щIрагъащIэри ар бзэ щIэныгъэлI ящIын щхьэкIэкъым, уеблэмэ «садикыфIым» кърагъэщтэн мурадкIэкъым. Мыхьэнэ зиIэр сабийм къыдалъхуа, гъунэ зимыIэ Iэзагъ зэмылIэужьыгъуэхэм гъуэгу етынырщ, нэрыбгэ цIыкIум и гъащIэми езы дунейми гуфIэгъуэр нэхъ щыбэгъуэн хуэдэу.
Адэр сабийхэм нэхъыбэрэ ядэуэршэрын хуейщ
Балигъ дыхъуа нэужь, куэдрэ гу лъыдотэ ди бынхэм махуэшхуэ гуэр я нэгу къыщIыхьэжым ещхьу, «папэ и гъусэу» ирахьэкIа сыхьэт IэфIхэр ягу къызэрагъэкIыжым. Унагъуэм апхуэдэ куэдрэ къыщыхъуркъыми аращ абы и щхьэусыгъуэр. Си къуэ нэхъыжьым нобэми ещIэж зэгъусэу тщIа псори: псалъэм папщIэ, зэгуэр кхъуафэжьейкIэ хым дызэрытетар, дыкъыщыкIуэжым джэш плъыжь зэрытшхар... Сэ сщIэжыххэркъым ар, къыщыхъуар илъэс щэщI ипэкIэщи.
Хабзэ хъуауэ, адэм унагъуэм «мыдэн» IэнатIэр щрехьэкI. Ар псори зытетыпхъэм зэрытетыным кIэлъоплъ, махуэкъэс гъащIэм зэрыхэIэбэр зэзэмызэххэщ. Сабийм и адэр зи чэзу шхыдэгъуэр къыщысым деж фIэкIа имылъагъумэ, ар абы хамэу, зыгуэр къыщыхъуам деж къраджэ дохутырым ещхьу къыфIэщIынущ. Хамэгу-хамащхьэу къэхъу сабий зыгъэгусэрейм адэр фIыуэ илъагъуу къыщыщIэкIыр закъуэтIакъуэххэщ. Адэ ткIийм игъэса сабийм «гений» къыхэкIыу цIэрыIуэ хъунри хэлъщ, ауэ ар хьэлыншэрэ еудыхыгъуафIэу къэтэджынущ. Мыдрей лъэныкъуэкIэ уеплъми, адэр ефэреймэ, и щхьэгъусэм хуэпхъашэмэ, гъэсэныгъэ Iуэху зэримыхуэххэмэ, абы къыщIэхъуэ быныр дэхуэхыпэу щIэпхъаджащIэ хъункIи хъунущ. Апхуэдэхэри мащIэкъым.
Егъэджэнри гъэсэнри анэм нэхъ къытохуэ
Абы сэ къизгъэкIыркъым адэхэм гъэсэныгъэ Iуэхур зэрыщыту я щуIэгъэхэм я пщэ далъхьэн хуейуэ. Щхьэгъусэм ныбжьэгъу пэжрэ дэIэпыкъуэгъурэ хуэхъун - аракъэ лIым и унагъуэм ирилъхьэну зыхуей гъэсэныгъэм гъуэгу езытынур? Унэм унагъуэ узыншэ зыхэхъукI зэхущытыкIэ щыухуэныр анэм и къару закъуэкIэ зэфIэкIын Iуэхукъым.
Зымахуэ автобусым сису зы унагъуэ гу ялъыстащ. Илъэсищ зи ныбжь хъыджэбз цIыкIур дихьэхауэ и адэм еуэршэрылIэрт. ТIури зытепсэлъыхьым итхьэкъуат. Анэри абдеж дыдэм щытт, зыри зэхимых нэпцI зищIауэ, журнал гуэр зэтридзу. Гу лъыстэрт адэр уэршэр къудей мыхъуу, мыхьэнэшхуэ зиIэ Iуэху гуэрым теухуауэ и пхъум зэрепсалъэр, мамэр къыхэIэбэртэкъым. А хъыджэбз цIыкIум бзылъхугъэ телъыджэ къызэрыхэкIынур сигу къэкIащ абдеж. Балигъым зыри къызэрымыкI уэршэру къыфIэщIым сабийм гурыфIыгъуэшхуэ хех.
Гъэсэныгъэр зэрыщыту анэм и пщэ дэлъу, адэр зэзэмызэ, анэр къыщелъэIум деж фIэкIа хэмыIэбэмэ, унагъуэм шэч къытумыхьэжу цIыхуфIкIэ узэджэн нэрыбгэ щыпхуэгъэсэнукъым. Зэман зэрамыIэри зэрешари щхьэусыгъуэ яхуэхъун хуейкъым мамэхэмрэ папэхэмрэ я сабийхэм ядэпсэлъэну.
Сабийхэр нэхъыбэху, нэхъыбэрэ зопсалъэ
Иджырей Японием хабзэ щыхъуащ зэрышагъащIэхэр адэ-анэми благъэхэми япэIэщIэу щхьэхуэу псэууэ, сабиищ нэхъыби ямыIэу. Сэ унагъуэм сыщысабий закъуэт, а зэманым апхуэдэхэр закъуэтIакъуэххэт. Къуэшрэ шыпхъурэ зиIэ си ныбжьэгъухэм сехъуапсэрт. Сыт щыгъуи сабийхэр хуабжьу щызэрыгъэкIий, щыджэгу, Iэуэлъауэшхуэ зэрылъ унагъуэхэм сихьэным сыхуэпабгъэрт. ГъэщIэгъуэнщ япэу унагъуэм къихъуэ быныр фIыуэ яхуэгъасэми, ар гъащIэм и фIэщу щыгуфIыкI сабий нэжэгужэ зэрымыхъур. Си ныбжьэгъу зэкъуэшищым я курытыр къимыкIуэту, игурэ и щхьэрэ зэтелъу, уеблэмэ хуэбзаджэу щытт, и къуэшхэм и жагъуэ къащIми, зэи гъыртэкъым. Сэ си закъуэтэкъым апхуэдэхэм гу лъызытэр.
ИтIани сыт зы адэ-анэм къыщIэхъуа сабийхэр апхуэдизу хьэлрэ зэфIэкIкIэ щIызэхуэмыдэр? ЕтIуанэри ещанэри япэрей сабийр зэрагъафIэм хуэдэу ягъафIэркъым адэ-анэм, абы къыхэкIыу абыхэм я щхьэ Iуэху нэхъ зэрахуэжыфу мэхъу.
Сабий нэхъыжьым и къэухьым зебгъэужьыну сыт хуэдизу уемылIалIэми, абы зэи игъуэтынукъым етIуанэмрэ ещанэмрэ къызэралъхуу ягъуэт гъусэхэм хуэдэ. Пэжщ, ахэр сытым дежи нэхъыжьым пеуэн хуей мэхъу, ауэ абы и фIыгъэкIэ къарууфIэу, гъащIэр я щIэщыгъуэу къотэдж. А щытыкIэр нэхъри щынэхъ IупщIщ ещанэ, еплIанэ сабийхэм я деж. Ахэр IэпкълъэпкъкIи жану, псэкIи быдэу къыдэкIуэтеину езы гъащIэм ирехулIэ.
Гу лъатащ, псалъэм пащIэ, сабийр шыкIэпшынэм щрагъасэ дерсхэм кIуэмэ, къуэш е шыпхъу щыдеджэкIэ ар нэхъыфIу зэреджэм. Унагъуэ тхьэмыщкIэхэм къыщыхъуа сабий зэчиифIэхэр ехъулIэныгъэ лъагэхэм лъоIэсыф. Адрей щхьэусыгъуэхэм къадэкIуэу, апхуэдэ сабийм къызэрымыкIуэ Iэзагъ къызыкъуихыныр сабий куэд зэрыс, абы и фIыгъэкIэ дэтхэнэ зыми къыдалъхуа фIым тыншу зыщиужь унагъуэм нэхъ къыщохъулIэ.
Адэшхуэ-анэшхуэхэм сабийм и зыужьыныгъэр ирагъэфIакIуэ
Куэдрэ къохъу унагъуэщIэр щхьэхуэу щыпсэум деж, адэшхуэ-анэшхуэхэр гъэсэныгъэ Iуэхуми езы унагъуэм и гъащIэми пэIэщIэу къыщынэ, къащыхэIэбэкIи ар зэраныгъэ къэзышэ Iуэхуу щалъагъу. Ди жагъуэ зэрыхъущи, дызэрыт лъэхъэнэм ар хабзэ щыхъуащ. Иныкъуэхэм къафIощI дадэ-нанэхэм сабийр ягъэфIэIуэу IэубыдыпIэншэ ящIу.
Апхуэдэ гупсысэкIэр нэхъ зи хьэлыр зэманым декIуу, щIэуэ къежьэр зыIэщIамыгъэкIыу къызыщыхъуж анэхэращ. Сэ соцIыху фэтэр цIыкIунитIэм щIэс унагъуэ, Iуэху ящIу я унагъуэшхуэм къахэкIауэ. Адэшхуэ-анэшхуэхэм ядэпсэумэ, я сабийхэр фIыуэ яхуэмыгъэсэну къащохъу абыхэми.
Iэмалыншэу пIэрэ ар, унагъуэ узыншэ бухуэн папщIэ? Сабийхэм я гъэсэныгъэм и гугъу пщIымэ, Iуэхум узэреплъщ. Пэжщ, Японием нобэми уащрохьэлIэ нысэхэм чэнджэщ ират хуэдэурэ я щхьэр щIезыгъэхьэ гуащэхэм, япэрей къуэрылъхур ягъэудафэрэ унагъуэм ис адрей цIыхухэр къафIэмыIуэхуххэу. Апхуэдэ пасэрей хабзэжьхэри кIуэдыжакъым. ИтIанэми шэч хэлъкъым ныбжьитI-щы щызэтрихьэ унагъуэхэм зыщIыпIи щумыгъуэтын фIыгъуэ зэрилъым. Дадэ-нанэхэращ хабзэ, Iущыгъэ зэхозыгъэлъхьэфынур, ныбжь зыбжанэм я зыхущытыкIэм цIыху гумащIэ уамыщIынкIэ Iэмал иIэкъым. Сабийр сэхъункIэ зэрыхъунур хокIуэдэж абы игъуэтыну лъагъуныгъэм, таурыхъхэм, хъыбархэм, гукъэкIыжхэм, гъащIэр щIэщыгъуэ зыщI нэгъуэщI Iуэхугъуэ куэдым къыздахьыну фIым.
Япон щIэныгъэлI Кайэ Сейджи къеIуэтэж и сабиигъуэм нэхъыбэ дыдэу зижь къыщIихуар адэшхуэ-анэшхуэрауэ зэрыщытыр. Къуажэ тхьэмадэу щыт адэшхуэр апхуэдизкIэ ткIийти, зэрыпсчэу сабийм гъын щигъэтырт. ТкIийт адэшхуэр, ауэ захуэт. ЩIэныгъэлIым и гур илъу, IэпкълъэпкъкIи къарууфIэу къэтэджащ. И гъащIэ псом цыкIуэкIым бгъэдэса и анэшхуэр бзылъхугъэ Iэсэлъасэт. Ара къыщIэкIынщ щIалэр тэмакъкIыхь, набдзэгубдзаплъэ зыщIар: хадэ ипщIэмэ, зы удзыжь хадэм къимынэжыху игу загъэртэкъым. Психолог Таго Агирэ гу лъитащ Кайэ Сейджи дуней псом щыцIэрыIуэ цIыху щэныфIэ зыщIар и плъапIэм къимыкIуэту хуеIэф хьэл зэтет къызэрыхалъхьам и фIыгъэу.
Гуащэ хьэпшыпхэр куэдыIуэмэ, сабийр гулъытэншэ мэхъу
Си гугъэмкIэ, Японием сабийхэм гуащэ хьэпшып куэдыщэ щрат. Куэдрэ тыкуэнхэм гу щылъызотэ игу ирихьа джэгуалъэр къызыхуамыщэху сабийр дунейр къигъачэу щыгъуэгкIэ адэ-анэм ар зыщIэлъэIур яхуэмышэчу къыхуащэхуу. АрщхьэкIэ цIыкIунитIэхэм ядэлажьэ гъэсакIуэхэм ящыщ куэдым сабийр зыхуей псор хуумыщIэныр нэхъ яфIэигъуэщ, абы къикIыркъым ар фIыуэ умылъагъуу. Психолог куэдми зэрабжымкIэ, сабийм ихъуреягъкIэ зэрыджэгун хьэпшып куэдыIуэ щилъагъумэ, и гулъытэр зэтокъутэри, зыри къыхухэгъэщхьэхукIыркъым. Псом нэхърэ нэхъыфIу сабийр зэрыджэгур зы хьэпшып закъуэщ, а зым джэгукIэ зэмылIэужьыгъуэхэр къыхуигупсысу. Абы и нэгум пхъэ къутахуэри шейнычым и щхьэтепIэ ныкъуэкъачэри псысэм щыщ унэ е гуэл телъыджэу къыщIэувэнкIи хъунущ, тыкуэным къыщащэхуа гуащэм нэхърэ куэдкIэ нэхъ хьэлэмэту.
Аращи, сабийр гупсысэу евгъэсэну фыхуеймэ, зыщIэлъэIу псори къыхуэвмыщэху. Фи мурадым абы нэхъ фытригъэIэбэнущ, фикIуэту фызыщымыгугъа гугъуехь фыIумыуэжу.
Губжьымрэ фыгъуэмрэ сабийм ищIэнур зэримыщIэр къагъэлъагъуэ
ЦIыкIунитIэм зыхищIэр псалъэкIэ къыхуэIуатэркъым. Адэ-анэр абы и нэкIум «къеджэфу» щытын хуейщ, и гум щекIуэкIыр къащIэн папщIэ.
Шэчышхуэ къытызохьэ анэхэм езыхэм къазэрыфIэщIым хуэдэу сабийхэр къазэрыгурыIуэм. «Iуэху ящIэурэ» сабийм зыхищIэр къазэрыфIэIуэхупхъэм хуэдэу къащыфIэмыIуэху, ар къыщIэгубжьар е къыщIызэфIэзэрыхьар щамылъагъу куэдрэ къохъу.
Сабий психолог, Токио университетым и профессор Ямашитэ Тошио сабийр къэзыгъэгубжь щхьэусыгъуэу мыхэр къыхигъэщхьэхукIащ:
1) IэпкълъэпкъкIэ зыгуэр къоуз;
2) МэмэжалIэ е ешащ;
3) И гур хэзыгъэщIа е зыгъэшына гуэрым и ужькIэ гузавэм иубыдащ;
4) Зэрырикъун хуэдизкIэ Iэпкълъэпкъыр игъэхъейркъыми, къыпкърымыкIа къарур «мэныкъуакъуэ»;
5) Зыхуейр пхигъэкIыну хэтщ;
6) Адэ-анэ тэмакъкIэщIхэм ядоплъей;
Мы къебжэкIым къегъэлъагъуэ сабийм гузэрыдзэ езыгъэщI щхьэусыгъуэхэр абы и Iэгъуэблагъэм къыщылъыхъуэн зэрыхуейр. Къэзыгъэгубжьар зыгурывмыгъаIуэу фешхыдэмэ е гу лъывмытэххэмэ, сабийр абы нэхъри нэхъ щхьэзыфIэфI, ерыщ ищIыну къудейщ.
Адэ-анэм къафIэщIынкIи хъунущ я сабийр «къагурыIуэу», ауэ щыхъукIэ езым абыхэм япэIэщIэу зилъытэжу, абы и гур хигъэщIу. Адэ-анэм мыхьэнэ зиIэ хуэныкъуэныгъэр щхьэзыфIэфIагъым хамыгъэгъуащэу къыхацIыхукIын хуейщ. Апхуэдэ ткIиягъ узыншэ здэщымыIэ унагъуэм сабийр хьэлыншэ щохъу.
ЕфыгъулIэныгъэр сабийм илъэситI хуэдэхэм деж зыхещIэ. Абы и щхьэусыгъуэнкIи хъунущ къуэш е шыпхъу зэригъуэтар. Псом хуэмыдэу ар дыболъагъу сабий нэхъыжьым: изакъуэху абы псори ейт. А сабийм уеблэмэ адэмрэ анэмрэ щызэпсалъэкIэ, зыр адрейм ирифыгъулIэнкIи хъунущ. Абы къыхэкIа гузэрыдзэр сабиягъыу убжыныр щыуагъэщ.
КIэщIу жыпIэмэ, сабийр щхьэусыгъуэншэу къытехьэркъым. Абы зыхищIэм уемыгупсысу, уешхыди ущытхъуи хъунукъым. Адэ-анэм я къалэныр щхьэусыгъуэр ягъэкIуэдынращ, ар ирагъэгъэпщкIунракъым.
Усэ гукIэ зэгъэщIэным сабийхэр нэхъ гурыхуэ ещI
Тхьэрыкъуэр зытес
къудамэм телъ уэсыр мэткIу.
Еплъыт, джэду цIыкIур сакъыу тоувэ
бжьыхьэ тхьэмпэ пыщэщахэм.
Сабийми къепщыхь, мэдыхьэшх,
Нышэдибэ илъэситI ирикъуащ ар.
Мыр «хайку» жыхуаIэ япон усэхэм ящыщщ курыт лIэщIыгъуэхэм псэуа усакIуэ Кобаяси Исса итхауэ.
Сабийм къыдалъхуа Iэзагъхэр щрагъэфIакIуэ ди еджапIэм гурыхуагъым зрагъэужьын папщIэ, апхуэдэ усэхэр щызрагъащIэ. Хайку усэ лIэужьыгъуэр абыкIэ къэбгъэсэбэпыну фIыщ. Ахэр, япэрауэ, кIэщIщ, зэгъэкIуащи, гум иубыдэгъуафIэщ. КъищынэмыщIауэ, ахэр сабий усыгъэр зэрыщытыпхъэ мардэми нос: «гукIэ зрагъэщIэну къыхах усэхэм сабийр щэныфIэ ящIын хуэдэу дахэу, гурыщIэ хэIэтыкIахэр зыхыуагъащIэу, гъащIэм и кIыхьагъкIэ гум щыпхъумэну зыхуэфащэу щытын хуейщ».
ЯпэщIыкIэ сабийхэм махуэ къэс зы усэ зрагъащIэ. КъыкIэлъыкIуэ махуэм ар зытеухуам яхутопсэлъыхьри, усэщIэ зрагъэщIэну кърат. Апхуэдэ щIыкIэу ар нэхъ гурыхуи мэхъу, игури хохъуэ. ЩыщIидза къудейм усэр игу ириубыдэн папщIэ ар абы пщIэнейрэ едэIуэн хуеямэ, етIуанэ, ещанэ зэгъэщIэгъуэм усэм щэ е плIэ зэредаIуэу, я гум къонэ, уеблэмэ зэ закъуэ зэхахмэ щрикъуи къохъу. Сэ къызэрызжаIамкIэ, сабийм зы илъэсым Исса и усэу 170-рэ зрегъэщIэф.
Къэпщытэжыныр зэгъэщIэным и лъабжьэщ. Ар шэч зыхэмылъ хабзэщ. Зы сатыр щыгъупщэжамэ, зэрыусэу игу кърырегъэкIыж. Апхуэдэ щIыкIэу гурыхуэ хъуа сабийм псысэ псо плIэ е тхуэ къызэреджэу игу ириубыдэфу мэхъу. Тхылъеджэ гуэрхэм шэч къытрахьэнкIи хъунщ мы Iэмалым сабийр гурыхуэ зэрищIым. Сэри си гугъат Исса и хайкухэр сабийхэм къагурымыIуэну. АрщхьэкIэ апхуэдэ дерсхэм я мурадыр гукIэ зрагъэщIэн къудейкъым, цIыкIухэм дахагъэм и пщалъэхэр егъэцIыхунри, и акъылым зегъэужьынри, езым къыдалъхуа Iэзагъхэр къызыкъуихын гукъыдэж етынри я плъапIэщ.
Сабий щхьэ куцIым усэ кIэщIу щэ е щитI хуэIыгъынущ. Ауэ гурыхуагъми, къыумыгъэсэбэпмэ, кIэроху. Нэхъыбэрэ къэбгъэсэбэпыху, нэхъри зеужь. Сабийм и гурыхуагъым зебгъэужьыну щынэхъыфIыр абы зэджам е зэдэIуам къытригъэзэжыну фIэфIыхущ.