РСФСР-мрэ КъБАССР-мрэ щIыхь зиIэ я артист Жыгун Тимэ къызэралъхурэ илъэси 110-рэ ирикъуащ.
Жыгун Тимэ 1914 гъэм мэлыжьыхьым и 7-м Налшык быдапIэм (иджы Налшык къалэ) къыщалъхуащ. Курыт еджапIэ нэужьым ар Налшык Ленин еджапIэ къалэ цIыкIум (ЛУГ-м) и театр студием щIэтIысхьащ. 1935 гъэм абы и щIэныгъэм щыпищащ Театр гъуазджэхэмкIэ къэрал институт Луначарскэм и цIэр зезыхьэм.
ВКП(б)-м и Къэбэрдей-Балъкъэр обкомым художественнэ гупхэр зэхэшэным теухуа унафэ къищтауэ щытащ икIи 1933 гъэм театреплъ ныбжьыщIэм и театррэ Ленин еджапIэ къалэ цIыкIум актёрхэр щагъэхьэзыр къудамэрэ къызэрагъэпэщащ. Абы щIагъэтIысхьахэм ящыщщ Жыгун Тими. Республикэм и щIалэгъуалэр лъэпкъ фащэр ящыгъыу Москва кIуат. Абыхэм Европэ щыгъынкIэ заригъэхуэпэн щхьэкIэ, Къалмыкъ БетIал ахъшэ яхуигъэхьат. Ауэ къапэщылъ гугъуехьхэм псори пхыкIыфакъым. МазитI дэкIри, еджапIэм цIыху 12 къыщIэкIыжащ. 1940 гъэм институтыр къаухри, къагъэзэжащ Жыгун Тимэ, Шэрий Азрум, Сибэч Быхуэ, Къумахуэ Хужьэ, Балъкъэр Калисэ сымэ, нэгъуэщIхэми. Ахэращ Къэбэрдей къэрал драмэ театрыр къызэзыгъэпэщар.
Ар ящыщщ КъБР-м и профессиональнэ театр гъуазджэм и лъабжьэр зыгъэтIылъахэм, ЩоджэнцIыкIу Алий и цIэр зезыхьэ Къэбэрдей къэрал драмэ театрыр зэфIэзыгъэувахэм. Бомарше и «Женитьба Фигаро» (Граф Альмавивэ), Островскэм и «Таланты и поклонники» (Дулабов), КъардэнгъущIым и «Къанщобийрэ Гуащэгъагърэ» (Хъаныкъуэ) пьесэхэм къытращIыкIа диплом спектаклхэм щигъэзэщIа ролхэр щыхьэт тохъуэ актёр щIалэщIэм театр гъуазджэм щиIа зэфIэкIхэм.
Адыгэ лъэпкъ театрым и зыужьыныгъэм Жыгун Тимэ хуищIа хэлъхьэныгъэхэр къэлъытэгъуейщ. Илъэс 50-кIэ хуэлэжьащ ар ЩоджэнцIыкIу Алий и цIэр зезыхьэ Къэбэрдей къэрал драмэ театрым. Жыгуным игъэзэщIащ театр классикэ лэжьыгъэу ялъытэ роль гукъинэж 200-м щIигъу. Ар ящыщщ Къэбэрдей-Балъкъэрым и театр гъуазджэм и лэжьакIуэ цIыхубэр нэхъ зэрыгушхуэхэм.
Сыт хуэдэ роль пщэрылъ къыщащIами, классикэ, иджырей драматургием щыщ, гушыIэ е драмэ, роль нэхъыщхьэ е къызэрыгуэкI ирехъуи, Жыгун Тимэ жэуаплыныгъэ ин пылъу бгъэдыхьэрт икIи ар уи фIэщ хъууэ къехъулIэрт. И лэжьэгъухэми пщIэшхуэ къыхуащIу, езыми абыхэм хузэфIэкI яхуищIэу щытащ Тимэ.
