Пушкин Александр
XXXII
Хэмылъу шэч, къыхуэлъэгъунут
Зыхуейм Татьянэ и пIейтейр,
Хуэдгъэгъу ар щхьэдэIуххэм хъунут:
Ягуэшырт-тIэ дэлэн ин Iейр
(ЖытIэнти пэжыр, шыугъэIуэр);
Сагъызу я щхьэтепIэ щIыIур,
Бащырбэхэм цимлянскэр итщ,
Ефэнур, IэфIыр къахьыр, хуитщ;
Къахьащ абдж бгъузэ, ар зракIэ,
Бгы псыгъуэхэм сигу къагъэкIыж
Зизи; сэ си псэм хэмыкIыж,
Уезгъэщхьырт уэ абдж псынщIэ
щхъуакIэм;
ФIылъагъуныгъэм и абдж щыкъу,
Узэрыслъагъур сримыкъут.
XXXIII
МэпщIыпщI шагъырыр; макъ нэхъ ищIу,
Пхъэмыфыр лъагэу драгъэлъей;
Къотэджыр зигъэпагэу, зищIу,
ТепыIэншагъэм дрихуейр:
Трике – зэдгъэцIыхуар. КъэкIуахэр
Щэху хъуащ, хьэзырщ дэIуэну ахэр,
Татьянэ псэ хэтыж къудейщ,
ИIыгъыу тхьэмпэр, абы дей
Зегъазэр, нотэхэр мыпэжми,
Едзыгъуэр жеIэр. Iэгу еуащ
Щысахэр; щхьэщэ къыхуащIащ;
УсакIуэ инти, ар ищIэжми,
Трике зыкъыфIэмыщIыжа:
И тхьэмпэр тыгъэу итыжащ.
XXXIV
ЩIадзащ жаIэн фIэхъусхэр, хъуэхъухэр,
Татьянэ хэти фIыщIэ хуещI,
Евгений и чэзур къос, мэхъур
Хъыджэбзыр плъыжь, щэху дыдэ зещI;
Зэрезэшам, и Iэнкуныгъэм
ЗэщIигъэстащ гущIэгъуныгъэр,
Евгений щхьэщэ къыхуищIащ
Татьянэ, гуапэу ар къеплъащ;
Щабагъэ хэту а и плъэкIэм,
Ар и псэм къикI гурыщIэ пэжт,
Е фэрыщIагъэти, ищIэжт?
Хуэмейми, и гурыщIэ хэкIми,
Татьянэ къигъэпсэужащ,
Хъыджэбзым и гур къеуэжащ.
XXXV
ХьэщIэщым хуокъу, шэт игъэкIуатэу,
Ефэн, шхэн Iуэху зыгъэзэщIар,
ЖыпIэнщ, къолъэтри и бжьэматэм,
КъокI зэрызехьэу бжьэ къэпщIар.
Хуэарэзыхэщ хьэщIэгъашхэм,
Псэлъэнухэм я бзэгур машхэ:
Фыз къом пэшхьэкум деж тIысащ,
Хъыджэбзхэр жыжьэу зэхуэсащ;
СтIол, щэкI удзыфэ зытебзахэм,
Дахьэх куэзыр джэгуну хуейр,
Бостон е ломбер жьы нэхъ хъуахэм
ЯфIэфIщ, ящIэжыр вист хуэм Iейр;
Джэгу псори зы унагъуэу ттхынщ,
Нэпсей езэшхэр зэрыбынщ.
XXXVI
Еянэ робберыр яухыр
Вист джэгухэм. Яхъуэжащ еней
Здэщыс тIысыпIэхэр. Хуаухуэр
Шей Iэнэ, къахь здэщысхэм дей;
ДыкIэлъоплъыф зэман зэрыкIуэм,
Шхэн Iуэхур зэрызэкIэлъыкIуэм,
Дэ дышхэм къуажэм, дефэм шей,
Ди шхалъэ бжэм сыхьэт хуэмей;
Зыкъэзумысыжынщи сэри,
Едзыгъуэ Iэджи IэфIу стхащ,
Гурыхь къысфIэщIу тезухуащ
Ефэн-ешхэным, стхыри, сщIэри,
Сещхьынщ зритам Тхьэм и бжьамийр:
Илъэс минищым ядж Омир!
XXXVII. XXXVIII. XXXIX
Шейр кърахьэкI, хъыджэбзхэм защIу,
Ар тепщэч цIыкIухэм иракIащ;
ЗэIуахри бжэр пэш кIыхьым, занщIэу
КъанцIу макъамэр къыкъуэкIащ,
Абы накъырэхэр хыхьэжу;
Къэфэным ежьэхэр гуфIэжу,
Тэджащ, къэнакъым и пIэм ис,
Къуажэ гъунэгъухэм я Парис,
Зызыгъэбацэ Петушковыр
Бгъэдохьэр Ольгэ; къыбгъэдэтщ
Татьянэ Ленскэм; зрегъэIэт
Тамбов усакIуэм Харликовэр;
Буянов Пустяковэр хех,
ЩIидзауэ, балым зыкърех.
XL
ЩыщIэздзэм щыгъуэ мы романым
(Си япэ Iыхьэм зэ феплъам)
ФIыт ар, зезгъэщхьу сэ Альбаным,
Нэхъ куэд Петербург бал щхьэ стхам;
Яхъуэжт хъуэпсапIэхэм унафэр,
Е гукъэкIыжым сыхилъафэрт,
Сэ лъакъуэ цIыкIухэм ситт яужь
Сылъыхъуэрт ахэм я лъэужь.
Е лъакъуэ цIыкIухэ! Сыщхьэрыуэу,
СыщIалэу хъурт сыфкIэлъыущ,
Иджы сыхъуамэ тIэкIу нэхъ Iущ,
Сытхэн хуейщ, куэдрэ сыщымыуэу;
Дэфтэр етхуанэр – зысIыгъынщ -
Iуэхугъуэм сытемыкIыу, стхынщ.
XLI
Макъамэ псори зэщхь къыпфIэщIу,
УщыджэрэзкIэ, уи щхьэр фIех,
Сыт щыгъуи щIалэщи, къафэщIэу
Вальс дахэм дэни зыкърех.
Онегин къращIар ищIэжу,
Мурад ищIари игъэпэжу,
Бгъэдохьэ Ольгэ. Зы вальс тур
Къызэдэфа нэужь а тIур,
Кърешыж утыкум, егъэтIысыр,
Йопсалъэ кIыхьу, мэгуфIэж,
Зы вальс аргуэру къыдофэж,
Къэхъуар ямыщIэу, мыр зищIысыр,
КъэкIуахэр къоплъэ, зочэнджэщ,
Илъагъур Ленскэм мыхъу и фIэщ.
XLII
Мазуркэм щIедзэ. Уафэгъуагъуэу,
СощIэжыр ар зэрыщытар,
Лъэдакъэр лъэгум емызагъыу,
Пхъэм къыхэлъэтт къуэщIий къутар;
Щхьэгъубжэ сысым, абдж кIэзызхэм
КърахуэкIырт лъыр. Иджы дещхьщ
фызхэм,
ДимыIэ лъэкI, дыцIантхъуэ фIэкI;
Мазуркэ щхьэ - къалащхьэм дэкI!
Уагъэлъэгъунщ ар къуажэм, хъумэ,
Е къалэ цIыкIухэм къыщофэф:
Долъей, допкIей, ямыщI гулъэф,
Лъэдакъэр, вакъэр ямыхъумэ.
ХьэлыщIэхэр дэ ди ерущ,
ЩIэблэщIэм имыIэж къару.
XLIII. XLIV
Буянов, а си къуэш жыджэрым,
Зэшыпхъухэр къыщыбгъэдишам
Онегиным, абы аргуэру
Утыкум Ольгэ иришащ;
ТIэкIу цIантхъуэ хуэдэу, емыгугъуу,
Зигъэщхъыу, щабэу, къыдэщIыгъум
Iущащэу жриIэм хэлъщ еIуэкI,
Екъузыр Iэр, хуэмей афIэкI:
ЩхьэхуэфIыныгъэу, гуфIэ нэгуу,
Къохъу Ольгэ тхъуэплъ; ди Ленскэм ар,
Елъагъу, хуэшэчкъым илъагъуар;
Зэгуэпу, ису мафIэ жьэгум,
Мазуркэр иухыху ежьащ,
Котильон къафэм ириджащ.
XLV
«Укъызэджами, хъун сынакIуэ?
Онегин псалъэ сэ естащ»,
- Сыт псалъэ, Ольгэ?
- «Къафэ къакIуэм”.
- Сэ си тхьэ, укъысщхьэщытащ…
Зэхэсхыр пэж? КъикIа къудейуэ
И гущэм, щытщ фэрыщI щIыкIейуэ,
Уэ плъагъум, хуокIуэр мыр хьилагъ,
АфIэкI сиIэжкъым бэшэчагъ! -
Хуэмышэчыжу а удыныр,
ЦIыхубзхэр зэрыхьилашыр,
ЩIокIыжыр, къыбгъэдашэр шыр,
ЩIоцIывэр. Зымыгъэпудыну
Иджы къыхуэнэр кIэрахъуитIщ,
ПщIэм гъащIэр пэщIилъхьэну хуитщ.
