ЩэкIуэгъуэм и 4, бэрэжьей
♦Урысейм щагъэлъапIэ ЦIыхубэ зэкъуэтыныгъэм и махуэр
♦Украинэм и гъущI гъуэгу лэжьакIуэм и махуэщ
♦Армением и социальнэ лэжьакIуэм и махуэщ
♦Тыркумэным и таможнэ IэнатIэм и лэжьакIуэм и махуэщ
♦Италием щагъэлъапIэ зэкъуэтыныгъэмрэ IэщэкIэ зэщIэузэда и къарухэмрэ я махуэр
♦1742 гъэм адыгэпщ Черкасский Алексей дунейм ехыжащ.
♦Череповец къалэм и махуэщ. Абы и лъабжьэр 1777 гъэм ягъэтIылъащ.
♦1879 гъэм дунейм щыяпэу кассэ аппарат къигупсысащ икIи абы и патент къыIихащ США-м щыIэ Дейтон къалэм щыпсэу, шхапIэ цIыкIу зыгъэлажьэ Ритти Джеймс.
♦1890 гъэм дунейм щыяпэу Лондон къыщызэIуахащ токкIэ лажьэ метром и къудамэ. Метро транспорт лIэужьыгъуэр къыщагупсысари лэжьэн щыщIидзари Инджылызым и къалащхьэрщ. 1863 гъэм щIы щIагъым щызекIуэу хуежьащ гъэсыныпхъэкIэ лажьэ мафIэгухэр.
♦1812 гъэм къалъхуащ куржыпщым ипхъу, урыс драматург икIи дипломат Грибоедов Александр и щхьэгъусэу щыта Чавчавадзе Нино.
♦1942 гъэм къалъхуащ тхыдэ щIэныгъэхэм я доктор, КъБКъУ-м и профессор, КъБР-м щIэныгъэмкIэ щIыхь зиIэ и лэжьакIуэ, Къэбэрдей-Балъкъэрым и Къэрал саугъэтым и лауреат, къэрал, жылагъуэ лэжьакIуэ, политик Думэн Хьэсэн.
♦1956 гъэм къалъхуащ совет музыкант, уэрэджыIакIуэ, уэрэдус Тальков Игорь.
Дунейм и щытыкIэнур
«pogoda.yandex.ru» сайтым зэритымкIэ, Налшык уфауэ щыщытынущ. Хуабэр махуэм градус 12 - 13, жэщым градуси 7 - 8 щыхъунущ.
ЩэкIуэгъуэм и 5, махуэку
♦Урысейм Дзэ тIасхъэщIэхым и махуэр щагъэлъапIэ
♦Армением и дзэ тIасхъэщIэх гупхэм я махуэщ
♦1922 гъэм Налшык щызэхэтащ Къэбэрдей-Балъкъэрым и цIыхубзхэм я япэ съезд.
♦1929 гъэм Москва СССР-м щыяпэу планетарий къыщызэIуахащ. Ар дунейм щыепщыкIущанэт. ГъэщIэгъуэнщ пщIыр а зэманым Германием зэрыщыIар.
♦1940 гъэм США-м и президент хэхыныгъэхэм щытекIуащ Рузвельт Франклин Деланэ. Ар а къулыкъум ещанэ пIалъэкIи хахыжауэ арат.
♦1941 гъэм ВКП(б)-м и Къэбэрдей-Балъкъэр обкомым унафэ къищтащ республикэм зыхъумэжыныгъэмкIэ быдапIэхэр щыухуэным теухуауэ.
♦1957 гъэм Болгарием совет зауэлI-щхьэхуитщIыжакIуэхэм я фэеплъ къыщызэIуахащ. Европэм псори зэхэту дзэ мемориал миниплIым нэблагъэ щыIэщ, етIуанэ дунейпсо зауэм хэкIуэда совет зауэлIрэ офицеру мелуанитIрэ ныкъуэм щIигъу щыщIалъхьауэ.
♦1967 гъэм Москва щатащ «Останкино» телецентрыр. Ар яухуащ архитекторхэу Баталов Леонид, Бурдин Дмитрий, конструктор Никитин Николай сымэ я проекткIэ.
♦1913 гъэм къалъхуащ инджылыз актрисэ цIэрыIуэ, Оскар саугъэту тIу зыхуагъэфэща Ли Вивьен.
♦1934 гъэм къалъхуащ совет режиссёр, сценарийхэр зытхыу щыта, Украинэм и цIыхубэ артисткэ Муратовэ Кирэ.
♦1938 гъэм къалъхуащ франджы уэрэджыIакIуэ, композитор цIэрыIуэ Дассен Джо.
♦1942 гъэм къалъхуащ сурэтыщI-график Къып Мухьэмэд.
♦1949 гъэм къалъхуащ Физико-математикэ щIэныгъэхэм я доктор, КъБКъУ-м и профессор Журт Арчыл.
♦1981 гъэм къалъхуащ журналист, теленэтынхэр езыгъэкIуэкI, политик Собчак Ксение.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градуси 11 - 14, жэщым градуси 4 - 6 щыхъунущ.
ЩэкIуэгъуэм и 6, мэрем
♦Дыкъэзыухъуреихь дунейм и хъугъуэфIыгъуэхэр зауэ щекIуэкIым деж къэмыгъэсэбэпыным и дунейпсо махуэщ
♦Тэтэрстаным и Конституцэм и махуэщ
♦Таджикистаным и Конституцэм и махуэщ
♦1492 гъэм Колумб Христофор и нэгу щIэкIащ гъэщIэгъуэн дыдэ къыщыхъуа Iуэху - индейцхэр тутын ефэу илъэгъуащ. ИлъэсиплI нэхъ дэмыкIыу тутыныр Европэми щащIэу хуежьащ, ауэрэ дуней псом щызэлъащIысащ. Урысейм ар 16-нэ лIэщIыгъуэм и япэ Iыхьэм кърашащ.
♦1731 гъэм Урысейм и Министрхэм я Кабинет къызэрагъэпэщащ. Абы хагъэхьат Черкасский Алексей (адыгэщ).
♦1736 гъэм Ломоносов Михаил Германием и Марбург университетым щIэтIысхьащ.
♦1887 гъэм Шотландием и «Селтик» футбол клубыр къызэрагъэпэщащ.
♦1930 гъэм Москва лажьэу щаутIыпщащ автомобиль щызэпкъралъхьэ заводыр.
♦1941 гъэм, Утыку Плъыжьым щекIуэкIыну парадышхуэм и пэ къихуэу, Сталиным совет цIыхубэм захуигъэзащ, къэралыр нэмыцэ-фашист зэрыпхъуакIуэхэм ящыхъумэным къыхуриджэу.
♦1957 гъэм Ленинград и Марс губгъуэ жыхуаIэ щIыпIэм деж щыпагъэнащ СССР-м щыяпэ МафIэ мыужьыхыр.
♦1943 гъэм Украинэм и къалащхьэ Киев нэмыцэ зэрыпхъуакIуэхэм къыIэщIагъэкIыжащ. Советыдзэхэр икIуэту ар бийм иратын хуей хъуат 1941 гъэм фокIадэм и 26-м.
♦1991 гъэм РСФСР-м и Президент Ельцин Борис и унафэкIэ КПСС-мрэ Урысей Федерацэм и Компартымрэ зэхуащIыжауэ щытащ.
♦2012 гъэм США-м и президент Обамэ Барак къэралым и унафэщI къулыкъум етIуанэу хахыжащ.
♦1494 гъэм къалъхуащ Уэсмэн пащтыхьыгъуэм и сулътIан Сулеймэн Езанэр.
♦1857 гъэм къалъхуащ Уэсмэн пащтыхьыгъуэм и дзэ къулыкъущIэ, маршал, зыхъумэжыныгъэмкIэ, хамэ къэрал IуэхухэмкIэ министру щыта Абыкъуэ Ахьмэд-пэщэ.
♦1936 гъэм къалъхуащ совет, молдаван кинорежиссёр, тхакIуэ, РСФСР-м и цIыхубэ артист Лотяну Эмиль.
♦1936 гъэм къалъхуащ уэрэджыIакIуэ, УФ-м щIыхь зиIэ и артист ПащIэ Ахьмэд.
♦1940 гъэм къалъхуащ урысей кинорежиссёр цIэрыIуэ, сценарийхэр зытх, УФ-м и цIыхубэ артисткэ Суриковэ Аллэ.
♦1953 гъэм къалъхуащ филологие щIэныгъэхэм я доктор, КъБКъУ-м и профессор, ЩIДАА-м и академик Быж Зарэ.
Дунейм и щытыкIэнур
«pogoda.yandex.ru» сайтым зэритымкIэ, Налшык уфауэ щыщытынущ. Хуабэр махуэм градус 13 - 15, жэщым градуси 6 - 7 щыхъунущ.
Лъэпкъ Iущыгъэ:
УлIмэ, уи щхьэ ущымытхъу - уфIмэ, жылэр къыпщытхъунщ.
