♦Адэ къуэш-адэ шыпхъухэм, анэ дэлъху-анэ шыпхъухэм я дунейпсо махуэщ
♦Эсперантэ бзэм и махуэщ. I887 гъэм Варшавэ (Польшэ) урысыбзэкIэ къыщыдэкIащ эсперантэ бзэр зэрырагъэджыну япэ учебникыр.
♦Урысейм щагъэлъапIэ парашютистым и махуэр
♦Кубэм и лъэпкъ зэщIэхъееныгъэм и махуэщ
♦1770 гъэм, Урыс-Тырку зауэм и зэманым, генерал Репнин Николай зи пашэ дзэм Измаил быдапIэр къащтащ.
♦1805 гъэм Везувий вулканыр къибыргъукIри, Неаполь къалэм и зэхуэдитIым нэхърэ нэхъыбэр зэтрикъутащ. А гузэвэгъуэм цIыху мин 26-м нэблагъэ хэкIуэдауэ щытащ.
♦1908 гъэм США-м къыщызэрагъэпэщащ ЩIэпхъаджагъэхэр зэхэгъэкIынымкIэ федеральнэ бюрор.
♦1946 гъэм Москва къыщызэIуахащ СССР-м ФинансхэмкIэ и министерствэм и Гознак управленэм и типографиер. Иджыпсту ар УФ-м ФинансхэмкIэ и министерствэм и Гознакым и типографиерщ, урысей ахъшэхэр щытрадзэрщ.
♦1953 гъэм Кубэм цIыхухэр къыщызэрыIэтащ, Батистэ Фульхенсио къэралым щызэрихьэ залымыгъэхэр ямыдэу. Лъэпкъ зэщIэхъееныгъэм и пашэр уэчыл щIалэ Кастрэ Фидельт. ТекIуэныгъэр къахьа иужькIэ ар Кубэм и унафэщIу щытащ илъэс 30-м щIигъукIэ.
♦1957 гъэм СССР-м дунейм щыяпэу гъуэгуанэшхуэ зэпызычыф баллистическэ ракетэр иутIыпщащ.
♦1963 гъэм Горький дэт автозаводым щызэпкъралъхьащ хьэлъэзешэ автомобиль лIэужьыгъуэщIэр - «ГАЗ-53»-р.
♦1963 гъэм Югославием и Скопье къалэм щIыр щыхъейри, ухуэныгъэ куэд зэтрикъутащ, цIыху миным щIигъуи хэкIуэдащ.
♦1971 гъэм СССР-м и кинотеартхэм гъэлъэгъуэн щыщIадзащ «Офицерхэр» фильмыр. Совет кинематографым и ехъулIэныгъэшхуэу, абы и дыщэ гъэтIылъыгъэхэм ящыщу иужькIэ къалъыта фильмым цIыху мелуан 53-рэ еплъат. Фильмым ди зэманми мыхьэнэшхуэ зэриIэм и щыхьэту, абы хэт лIыхъужь нэхъыщхьэхэм 20I3 гъэм Москва фэеплъ щыхуагъэувауэ щытащ.
♦1993 гъэм Урысейм пщIэ щамыIэж хъуащ СССР-м къыщыдагъэкIа ахъшэхэм. 1961 - 1992 гъэхэм зекIуа совет ахъшэхэм я пIэ къиуващ урысей сомыр.
♦1856 гъэм къалъхуащ инджылыз тхакIуэ, драматург, Нобель и саугъэтыр зрата Шоу Бернард.
♦1936 гъэм къалъхуащ тхакIуэ, тхыдэдж-архивист, КъБР-м щэнхабзэмкIэ щIыхь зиIэ и лэжьакIуэ Опрышкэ Олег.
♦1941 гъэм къалъхуащ физико-математикэ щIэныгъэхэм я доктор, профессор, РАЕН-мрэ ЩIДАА-мрэ я академик Къумахуэ Мурадин.
♦1943 гъэм къалъхуащ Тыркум щыщ актёр, сценарист, тхакIуэ, жылагъуэ лэжьакIуэ цIэрыIуэ Онер Четин (ГъуэгулI).
♦1946 гъэм къалъхуащ КъБР-м и цIыхубэ усакIуэ, КъБР-м щэнхабзэмкIэ щIыхь зиIэ и лэжьакIуэ Бицу Анатолэ.
♦1954 гъэм къалъхуащ къэрал лэжьакIуэ, КъШР-м и Правительствэм и УнафэщIу щыта Къардэн Алик.
♦1962 гъэм къалъхуащ урысей къэрал къулыкъущIэ, политик, УФ-м и Президентым и Администрацэм и УнафэщIым и япэ къуэдзэ Кириенкэ Сергей.
♦1964 гъэм къалъхуащ США-м щыщ актрисэ цIэрыIуэ, «Оскар», «Дыщэ глобус» саугъэтхэр зыхуагъэфэща Буллок Сандрэ.
♦1970 гъэм къалъхуащ КъБР-м щIыхь зиIэ и артист Iэщын Руслан.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ, пIалъэ-пIалъэкIэрэ уэшх къыщешхынущ. Хуабэр махуэм градус 25 – 27-рэ, жэщым градус 19 - 21-рэ щыхъунущ.
Лъэпкъ Iущыгъэ:
Нэгум щIэтыр нэм хуэдэщ.