Тхылъ тыкуэным

- Тхылъыр гъэтIылъ! 

 Налшык зэрынэсыжу, тхылъ тыкуэным блэкIрэ пэт щIэпкIа Iэсият зыгуэр къызэрепсалъэр занщIэу къыгурыIуакъым. Шанэ здыпэплъэм, психологием теухуахэр зыдэлъ дапхъэм бгъэдэлъэдати, зэи имыужэгъу Фромм итха гуэрым дихьэхауэ ирожэ. 

 - Тхылъыр гъэтIылъ! – къоIу аргуэру. 

 - Сеплъу арат, - дыгъу къаубыдам и макъкIэ зеумыс хъыджэбзми, IэщIэлъ тхылъыр жыIэщIэу зэтрепIэж. Я Алыхь! Нобэ сыт махуэ?! Зеплъыхь. 

Зи макъ зыхихыр къыхуэлъагъуркъым. 

 - Уеплъу аракъым уэ абы, уоджэ! 

 Ар жызыIэ тыкуэнтет щIалэм пкIэлъей зэгуэтым тету ищхьэ телъхьэпIэхэр зэлъыIуех. Iэсият и лъэгу щIагъым лэч плъыжь къыщыпхиуда фIэкIа умыщIэну, и кIыхьагъкIэ къоуцIыплъ. Тыкуэным иджыри цIыху зыбжанэ щIэтщ. 

 - Си ныбжьэгъум сыпэплъэху сыкъыщIыхьауэ арат, кхъыIэ, къысхуэвгъэгъу, - гупэкIэ зыкъигъазэри, зыухейуэ къыфIэщI псалъэхэр къызыжьэдишыжащ хъыджэбзым, тхылъри игъэтIылъыжащ. 

 ПкIэлъейм тетыр къеплъыххэкъым: 

 - Мыр зэIупэфIэгъу зэхуэзапIэкъым, тыкуэнщ!

Тхылъыр къищэхуну зэрыхагъэзыхьыр занщIэу къызыгурымыIуа хъыджэбзыр ахъшэ къыдихыну щыIэбэм, - гъаргуэ! НапIэ дэхьеигъуэ ипэкIэ унащхьэ лъабжьэм къыщызылъэтыхьа щIалэр хьэмбыIурэ хьэлъакъуиплIу и пащхьэм къыщотIысэх. Насып иIэти, унэ лъэгум алэрыбгъу илът.

 - Къысхуэгъэгъу, Тхьэм щхьэкIэ, си къуэш, пылым ещхьу сыбжьэхэуащ! - тхылъхэм хэпэщэщыхьу къуэгъэнапIэм иджыри къэс къуэта щэхуакIуэ гуэрым тыкуэнтетыр къызэфIегъэувэж. 

 - УеIунщIри къебгъэхуэхащ, сэ гу лъыстащ! – жеIэ компьютерым бгъэдэсу лажьэ, нэгъуджэ зыIулъ пщащэ сырыхум. И лэжьыгъэри зэпигъэукъым.

 - Уи фIэщ щIы, си вакъэм теслъхьэнми, сщIэкъым, сылъэпэрапэри… - урысыбзэ ирикъукIэ убзэурэ, щIалэм и дамащхьэхэр дрегъэуей, тыкуэныр зейм телъэщIыхьыни иухкъым. Пщащэ сырыхури, пианинэ еуэ нэхъей, хьэрфхэм нэхъ хуабжьыжу тобэрэбэныхь, «сэ зэрысщIэщ ар» жыхуиIэу. Ауэ щIалитIым афIэкIа яхэIэбэкъым. Iэсияти ищIэнур ищIэкъым. 

 - Дапщэ тхылъым и уасэр? – зызэман къыпахыну зыхуейм и щхьэр хуокIуэри, бохъшэм мэIэбэ. 

- И щIыбагъым тетхащ, - зигъэгусаифэу зосэбауэ тыкуэнтетыр. 

- Дапхъэм-щэ? – щIоупщIэ ар пкIэлъейм къезутIыпщхьэхар. 

- Сыту? 

- Абдежым телъ тхылъ псоми? 

- Къэбжын хуейщ… Тхылъ тIощIрэ зытхух хуэдиз дэлъынщ. Сом щитху нэхърэ нэхъыбэ зи уасэ яхэткъым. 

 Iэсият екIуэкIыр къыгурыIуащэкъым. И тхылъыр IэщIахыу ара, хьэмэ сыт? 

Зэуэ тхылъ тIощIым щIигъу зэращэхур къызыгурыIуа тыкуэнтетым псэ къыхыхьэжащ. ЖэрыжэкIэ кассэм бгъэдэлъэдауэ, мабжэ: 

- Сом минибгъурэ щитхурэ. 

 Пылым зыкIи емыщхь щIалэ къуапцIэ щхьэпэлъагэм ахъшэ зэрыхатыкI картэр кърех. 

- Тхылъхэр ууейщ, ди шыпхъу! – къыщхьэпрыплъ щIыкIэу, ауэ зыхуэгъэзар зэры-Iэсиятыр гурыIуэгъуэу жеIэри, щIокIыж. 

- Дэ унэм яхуэзышэ диIэкъым, - и Iупэр зэтехьэжкъым пкIэлъейм къелъэтэхам. 

 Iэсият и Фроммыр IэщIэлъу утыкум итщ. Тыгъэр апхуэдизкIэ къызэрымыкIуэщи, ар уэ къыпхуащIын дэнэ къэна, апхуэдэ гукъэкI зиIэ цIыху дунейм зэрытетым уи лъэтэн къегъакIуэ. И пIэм ижыхьа хъыджэбзыр щIалэм кIэлъыжэнуи кIэлъымыжэнуи мэукIытэ. Зимыгъэхъейуэ щытыжыфтэкъыми, IэкIэ икъуз тхылъыр абдеж дыдэм щыт Iэнэм трилъхьэри, тыкуэным щIэкIыжыну ежьащ. 

- Девушкэ! Къэхъуар къыбгурымыIуауэ ара? – хъыджэбз сырыхур къыкIэлъоджэ. – Мо щIалэм Генэ къызэропсэлъар игу ирихьатэкъыми, пкIэлъейм къридзыхри, уи пащхьэм лъэгуажьэмыщхьэу иригъэуващ, къысхуэгъэгъу къыбжиIэ щIыкIэу. Абы щхьэусыгъуэ хуэхъуа тхылъри ар зыдэлъа дапхъэм телъа псори къыпхуищэхуащ. Тхылъ тIощIрэ тху – сом минипщIкIэ. Иджыри упщIэ уиIэ?

- Таня! Япэрауэ, къызэIунщIакъым, сэ езым зэпэшачэр сфIэкIуэдри сыкъехуэхащ. Унащхьэми сыкъелъэну сыхьэзырщ, абы щхьэкIэ зэуэ тхылъ тIощIрэ тхурэ ящэхунумэ, - щIалэр къэпцIыхужынтэкъым.

- ЕтIуанэрауэ, ди клиентым дэтлъэгъуар и хьэл къудейуэ къыщIэкIынкIи мэхъу, - Iэсият нэбгъузкIэ къеплъурэ, Генэ и гупсысэм зрегъэубгъу. - Хъыджэбзым и гулъытэ къилъыхъуэу щытамэ, тхылъыр хуишэжын зэрыхуейр щхьэусыгъуэ ищIынти, телефон, адрес хуэдэ гуэрхэмкIэ къеупщIынт. Мор щIэкIыжри ежьэжащ. Дэри унэм яхуедгъэшэж ди хабзэкъым. 

- Машинэ сисщ сэ, - жиIащ Iэсият зыкъищIэжа иужь. – Си ныбжьэгъур къыIухьэнущ иджыпсту. 

Генэрэ Танярэ тхылъхэр дапхъэм къытращыпыкIри пакетхэм ирагъэзэгъащ. Шанэ иджыпсту къэсынущ. 

Тхъэгъуэ! Хэт ар зи фIэщ пхуэщIынур? Куэд щIауэ апхуэдэу и гур къигуфIыкIакъым Iэсият. ЩIэгуфIэр сом минипщI зи уасэ тхылъ къызэрыхуащэхуам и закъуэтэкъым. Зэ Iуплъэгъуэм и гум къитIысхьа адыгэ Дон Кихотым зэритхьэкъуаратэкъым икIи. Сымаджэщым медшыпхъуу щолажьэ пщащэр. Ауэ зыкъом щIауэ психологием зритыпэну и мурадщ, зэрылажьэм хуэдэурэ университетыр къиухыжащ. И гъусэу еджа и ныбжьэгъумрэ езымрэ зыми зыкърамыгъащIэу, психолог IуэхущIапIэ къыщызэIуахыну унэ къалъыхъуэ. Иджыпсту дыди зи ужь итыр аращ. Жэщ кIуам чэнджэщэгъу нэхъыщхьэу иIэ истихъарэ нэмэзыр ищIат Iэсият. ЩIалэ мыцIыхум апхуэдиз тхылъ къызэрыхуищэхуар абы къызэрырикIуам шэч къытрихьэкъым иджы. ФIыщIэ хуимыщIу щыттэкъым, итIани, хэт и фIым и кIуэкIэм Iуплъэну къызыхуихуэри, зи жагъуэри?!