КхъухьлъатэхэмкIи зызэпащIэ

КъБР-м курортхэмрэ туризмэмкIэ и министр ЩоджэнцIыкIу Мурат лэжьыгъэ Iуэху­кIэ Тэтэрстаным кIуауэ щыIэщ. Тэтэр­с­тан Республикэм ТуризмэмкIэ и комитетым иригъэблэгъащ ди хэгъэгум и лIы­кIуэхэр, КъБР-мрэ ТР-мрэ зэпызыщIэ ­кхъухьлъатэ къызэрытрагъэувам и щIыхькIэ. 

ЩоджэнцIыкIу Мурат зригъэлъагъунущ Къэзан и щIыпIэ дахэхэр, зыплъы­хьа­кIуэхэр дэзыхьэххэр. Абы хэгъэрейхэр щигъэгъуэзэнущ ди щIыналъэр зэрыбей псоми. КъБР-м курортхэмрэ туризмэмкIэ и министрымрэ Тэтэрстаным ТуризмэмкIэ и къэрал комитетым и унафэщI Иванов Сергейрэ тепсэлъыхьащ щIыналъитIым я зэ­пыщIэныгъэр зэрыпхуегъэфIэкIуэну Iэмалхэм. Апхуэдэуи «Тэтэрстан Республикэм и къалэхэм зегъэужьынымкIэ институтым» и фондым хыхьэ департаментым и Iэтащхьэ Саргинэ Оксанэрэ министрымрэ къытеувыIащ зэрызэдэлэжьэнум ехьэлIауэ хэгъэгу­хэм гу зылъатапхъэхэм. 
«Тэтэрстаным и къалэ туризмэм фIыуэ зиу­жьащ. ЦIыхухэм ди къуршхэм зэрызыщагъэпсэхуфынум къыдэкIуэу, Iэмал ядот я узыншагъэри санаторэхэм щрагъэфIэкIуэну. КъищынэмыщIауэ, дэ ди лъэпкъхэр гурэ псэкIэ зэпэгъунэгъущ, хабзэ дахэхэр дэтхэнэми къыддогъуэгурыкIуэ. Ди цIыхухэр нэхъыбэу зэпыщIа хъуным сэбэп хуэхъунущ Къэзан - Налшык - Къэзан авиарейсыр накъыгъэм и 4-м къыщыщIэдзауэ шыщхьэуIум и 31 пщIондэ щэбэт къэс лъатэу зэрыщытынур, - жиIащ ЩоджэнцIыкIу Мурат. 
Тэтэрстан Республикэм ТуризмэмкIэ и къэрал комитетым щекIуэкIа зэхыхьэм щагъэлъэгъуащ Къэбэрдей-Балъкъэрым и зыгъэпсэхупIэхэр зыхуэдэмрэ щIыналъэм и санаторэ-курорт Iэмалхэмрэ. Абы теухуа хъыбар дигъэщIащ КъБР-м зыгъэпсэхупIэхэмрэ туризмэмкIэ и министерствэм и къудамэм и унафэщI Погребняк Ольгэ