Кавказ Ищхъэрэм мэкъумэшымкIэ дыщынэхъыфIщ

2030 гъэм ирихьэлIэу Къэбэрдей-Балъкъэрым и мэкъумэш-промышленнэ комплексым псори зэхэту продукцэу къыщIигъэкIым и куэдагъым и уасэр сом меларди 180-м нагъэсын мурадхэр щыIэщ. 2023 гъэм яхузэфIэкIам нэхърэ ар хуэдитIкIэ нэхъыбэщ.

Иужьрей илъэситIым къызэрагъэлъэгъуамкIэ, республикэм и зыужьыныгъэм проценти 10-кIэ хигъахъуэурэ макIуэ. НобэкIэ, Урысейм СтатистикэмкIэ и къэрал управленэм къызэритамкIэ, щIыналъэм и мэкъумэш-промышленнэ комплексым къыщIигъэкI продукцэм и куэдагъым и уасэр сом мелард 96 - 97-м нызэрохьэс.

Абы къыдэкIуэу, республикэм и мэкъумэш IэнатIэм хэлъхьэныгъэфI хуещI КъБР-м и щIыналъэ валовэ продуктым – процент 16,3-рэ. Псалъэм папщIэ, 2023 гъэм мэкъумэш продукцэу къыщIагъэкIащ сом мелард 96-рэ и уасэ, АПК-м и продукцэм и индексыр проценти 110,1-рэ хъуащ.

А псом нэмыщI, зы цIыхум къылъысу мэкъумэш продукцэу къыщIагъэкIым и куэдагъымкIэ: проценти 104,9-рэ иIыгъыу, Къэбэрдей-Балъкъэрым Кавказ Ищхъэрэм и щIыналъэхэм япэ увыпIэр щиIыгъщ.

                   ХЬЭЩЫКЪУЕЙ Олег.