11 сентября, 2021 - 06:20
КъБР-м и Iэтащхьэр хэтащ УФ-м и Правительствэм щIыналъэ зыужьыныгъэмкIэ и комиссэм и штабым и зэIущIэм. Ар иригъэкIуэкIащ УФ-м и вице-премьер Хуснуллин Марат.
ЗэIущIэм щыхэплъащ школхэр капитальнэу зэгъэпэщыжынымкIэ программэр гъэзэщIэным пыщIа Iуэхухэм. Программэр гъэхьэзырынымкIэ зэфIагъэкIхэм ятеухуауэ къэпсэлъащ «Урысей зэкъуэт» партым и Совет Нэхъыщхьэм и секретарь Турчак Андрей, «Сириус» егъэджэныгъэ центрым и унафэщI, Урысей Федерацэм и Президентым и деж ЩIэныгъэмрэ егъэджэныгъэмкIэ щыIэ советым и президиумым хэт Шмелевэ Еленэ, УФ-м егъэджэныгъэмкIэ и министр Кравцов Сергей, щIыналъэ зыбжанэм я Iэтащхьэхэр.
Хуснуллин Марат зэIущIэм щыжиIащ япэ илъэситIым къриубыдэу Урысейм курыт еджапIэ минищ нэхърэ мынэхъ мащIэ нэгъэсауэ зэрыщызэрагъэпэщыжынур. Урысейм и Президент Путин Владимир мэкъуауэгъуэм и 19-м «Урысей зэкъуэт» партым и съездым къыщыщыпсалъэм къигъэувахэм япкъ иткIэ илъэситхум тещIыхьа зыхуэфащэ программэ мы зэманым ягъэхьэзыр. Къэрал Советым и президиумым и зэIущIэм Президентым щыдиIыгъащ школхэр капитальнэу зэгъэпэщыжынымкIэ программэр комплекснэу егъэкIуэкIыным теухуауэ Шмелевэ Еленэ къыхилъхьар. НэгъуэщIу жыпIэмэ, еджапIэхэм я унэхэр зэрызэрагъэпэщыжынум къыдэкIуэу пэшхэри зыхуеину унэлъащIэкIэ, иджырей IэмэпсымэхэмкIэ къызэрагъэпэщынущ.
«Урысей зэкъуэт» партым бадзэуэгъуэ мазэм и кIэухым УФ-м ЕгъэджэныгъэмкIэ и министерствэм и унафэщIхэм яхуигъэхьащ капитальнэу зэгъэпэщыжын хуей школ 7200-рэ зэрыт реестр. ЕджапIэхэр зэгъэпэщыжыным и лъэныкъуэкIэ проектхэр зэрызэхалъхьэм щегъэжьауэ IуэхущIапIэхэр нэсу зыхуей хуагъэзэху кIэлъыплъынущ министерствэмрэ адэ-анэхэмрэ ящIыгъуу партым и къудамэхэм къызэрагъэпэща лэжьакIуэ гупхэр. Мы программэм хэхуэн папщIэ бжыгъэ псори щыгъэтэмэмыжа заявкэхэр щIыналъэхэм жэпуэгъуэм и 10-м фIэмыкIыу зэхалъхьэн хуейщ.
ЩIыналъэм и бюджетым, «Къуажэ щIыналъэхэм комплекснэу зегъэужьыныр» программэм и хьэкъкIэ мы гъэм республикэм Дзэлыкъуэкъуажэ поселкэмрэ Пролетарскэ къуажэмрэ я еджапIэхэр капитальнэу щызэрагъэпэщыжащ, апхуэдэу мы илъэсым къриубыдэу Шэрэдж Ищхъэрэ, Малкэ къуажэхэм я школхэр зыхуей хуагъэзэну я мурадщ. Иджыпсту ухуакIуэхэр йолэжь Каменномост къуажэм и школым и унащхьэр зэгъэпэщыжыным. Абы зэраныгъэ иритащ иджыблагъэ щыIа жьапщэшхуэм.
ЗэIущIэм зэпкърыхауэ щытепсэлъыхьащ лъэпкъ проектхэр гъэзэщIэнымкIэ щIыналъэхэм щызэфIагъэкIхэм. КъызэрагъэлъэгъуамкIэ, «ФIагъ лъагэ зиIэ гъуэгу шынагъуэншэхэр» лъэпкъ проектым ехьэлIа контрактхэр гъэхьэзырынымкIэ, гъуэгу ухуэныгъэхэр егъэкIуэкIынымкIэ, къалэ псэупIэхэр егъэфIэкIуэнымкIэ, къуажэ щIыналъэхэм гъуэгу инфраструктурэм зыщегъэужьынымкIэ Къэбэрдей-Балъкъэрыр щIыналъэ нэхъ пашэу 5-м яхэтщ. Республикэр апхуэдэу яхэтщ 2019 - 2021 гъэхэм унэ кхъахэм щIэсхэр гъэIэпхъуэнымкIэ программэр нэхъ нэгъэсауэ зыгъэзэщIахэм, къалэ хьэблэхэр зэIузэпэщ щIынымкIэ урысейпсо конкурсым щытекIуахэм. Апхуэдэу ди республикэр псэупIэ ухуэнымкIэ ипотекэр нэхъыфIу щат щIыналъэу 10-м яхэтщ. Дызэрыт илъэсым щыщу блэкIа зэманым ипотекэ щIыхуэу республикэм сом меларди 7-м нэблагъэ щатащ икIи блэкIа илъэсым и апхуэдэ зэманым елъытауэ ар процент 77,5-кIэ нэхъыбэ ящIащ.