12 сентября, 2021 - 06:29
Республикэм законхэр къыдэзыгъэкI и орган нэхъыщхьэм и зи чэзу зэIущIэр иджыблагъэ иригъэкIуэкIащ КъБР-м и Парламентым и УнафэщI Егоровэ Татьянэ.
Депутатхэр хэплъащ «УФ-м и субъектхэм я бюджетхэм я счетхэм къина ахъшэм хущIагъуа бюджет кредитхэр япшыныжын папщIэ ират бюджет кредитхэр федеральнэ бюджетым къыхэкIыу КъБР-м и бюджетым хухэхынымкIэ ЗэгурыIуэныгъэм щIагъуж зэгурыIуэныгъэр къэщтэным и IуэхукIэ» КъБР-м и законым и проектым. КъБР-м и Парламентым БюджетымкIэ, налогхэмкIэ, финанс рынокымкIэ и комитетым и унафэщI АфэщIагъуэ Михаил зэрыжиIамкIэ, мы зэгурыIуэныгъэ гуэдзэныр теухуащ федеральнэ бюджетым къыхэкIыу КъБР-м и бюджетым хухахауэ щыта бюджет кредитыр щапшыныжыну пIалъэхэр зэхъуэкIыным.
Федеральнэ законодательствэм ипкъ иткIэ зэхалъхьащ «КъБР-м щрагъэкIуэкI турист лэжьыгъэм теухуауэ» КъБР-м и Законым зэхъуэкIыныгъэхэр хэлъхьэным и IуэхукIэ» КъБР-м и законым и проектыр. Абы ипкъ иткIэ хагъахъуэ туризмэм и IэнатIэм ехьэлIауэ ди щIыналъэм и къэрал властым и органхэм ирата полномочиехэм. Апхуэдэ хуитыныгъэхэм ящыщу документым къыщигъэлъэгъуащ дунеяплъэ къакIуэ гупхэр къезышэкI экскурсоводхэм, зыгъэпсэхуакIуэхэм ядэлажьэ адрей цIыхухэм я IэщIагъэр къэзыпщытэ, апхуэдэ IэщIагъэлIхэр федеральнэ реестр зэгуэтым изытхэ комиссэ къызэгъэпэщыныр. Апхуэдэу зэхъуэкIын хуейуэ къалъытэ зыгъэпсэхуакIуэхэм ядэлажьэ организацэхэм, хьэрычэтыщIэхэм, цIыху щхьэхуэхэм ящыщу налогхэр хабзэ хэхахэм тету зытхэм ехьэлIа щIыналъэ къэрал кIэлъыплъыныгъэр къызэрызэрагъэпэщ щIыкIэр.
Законопроектхэр зыхуэфащэ органхэмрэ IуэхущIапIэхэмрэ елэжьын папщIэ ягъэхьащ. Нэхъ иужькIэ ахэр КъБР-м и Парламентым и зэIущIэм къыщыхалъхьэну я мурадщ.
ЗэIущIэм утыку къыщрахьащ федеральнэ законхэм я проекту, законхэр къыдэгъэкIынымкIэ жэрдэму УФ-м и адрей субъектхэм я парламентархэм ягъэхьэзырахэр. Ахэр ятеухуащ мафIэсым и шынагъуэм зэрыпэщIэтым, сабий зэрыс унагъуэхэм къэрал дэIэпыкъуныгъэ зэрыратым, мэкъумэш продукцэ къэзылэжьхэм зэрызыщIагъакъуэм, нэгъуэщIхэми.
Къапщтэмэ, КъБР-м и Парламентым и депутатхэм даIыгъащ «УФ-м и «Къалэ лIыхъужь» цIэ лъапIэм и IуэхукIэ» федеральнэ законым и проектыр Къэрал Думэм къыщыхэлъхьэным теухуа жэрдэмыр. Ар къезыгъэхьар Смоленск областым и Думэрщ. Депутатхэм къыхагъэщхьэхукIащ «Къалэ лIыхъужь» цIэ лъапIэр зыфIаща къалэхэм я статусыр нобэм къэс законым зэрызэблимыгъэкIыр. Законопроектыр зыхуэгъэза мурад нэхъыщхьэр 1941 - 1945 гъэхэм екIуэкIа Хэку зауэшхуэм лIыгъэрэ хахуагъэрэ къыщызыгъэлъэгъуа къалэ лIыхъужьхэм я статус хэха гъэувынырщ.
Социальнэ мыхьэнэ ин зэриIэм къыхэкIыу КъБР-м и Парламентым и депутатхэм апхуэдэу даIыгъащ сабийхэр щрагъаджэ IуэхущIапIэхэм медицинэ лэжьыгъэ щезыгъэкIуэкIхэр жьыгъэкIэ нэхъ пасэу пенсэм кIуэну хуитыныгъэ зиIэхэм яхэбжэным и IуэхукIэ Астрахань областым и Думэм къэралым и унафэщIхэм зэрызыхуагъазэр.
ИкъукIэ игъуэу къалъытащ егъэджэныгъэмкIэ IуэхущIапIэхэм шынагъуэншагъэ къыщызэгъэпэщыным хуэгъэзауэ УФ-м и хабзэ мардэхэр зэхэлъхьэным теухуауэ Удмурт Республикэм и Къэрал Советым УФ-м и Правительствэм и УнафэщI Мишустин Михаил зэрызыхуигъазэр. Ар теухуащ еджапIэхэм шынагъуэншагъэ къыщызэгъэпэщынымкIэ лэжьыгъэхэм ятекIуэдэну ахъшэр федеральнэ бюджетым къыхэгъэкIынымкIэ программэ щхьэхуэ зэхэлъхьэным.
ЗэIущIэм и кIэухым депутатхэм зэакъылэгъуу къащтащ IэнатIэ зэмылIэужьыгъуэхэм щапхъэ щызыгъэлъагъуэ лэжьакIуэхэм КъБР-м и Парламентым и ЩIыхь тхылъыр етыным теухуа унафэ.
КъБР-м и Парламентым и пресс-IуэхущIапIэ.