Интернетымрэ афиянымрэ

Австрием щыщ дохутыр цIэрыIуэ Яцди Курош къелъытэ Интернетыр афияным хуэбгъадэ хъуну. Абы зэрыжиIэмкIэ, социальнэ сетьхэм, Интернет-джэгукIэхэм цIыхур зэрыдихьэхыр узыфэ нэхъ шынагъуэ дыдэхэм ещхьщ. Твиттерым е Фейсбукым ихьэныр къыппаубыдыныр нэхъ Iейуэ къалъытэ абыхэм афияным хагъэкIыжын нэхърэ. 
Пэжщ абы жиIэр. Интернетым дихьэха цIыхум и акъылым къыщыхъухэр афиян зэзыхьэлIэ, фадэ, тутын ефэхэм ейм ещхьыркъабзэщ, езыхэм я хьэл-щэнхэри зэтохуэ. Виртуальнэ дунейм «щыпсэум» и Iэпкълъэпкъым къылъыс лейр нэхъ мащIэщ, ауэ и акъылыр Iейуэ зэIегъэхьэ. 
Я хьэл-щэным зэрыкIэлъымыплъыжыр Интернет-джэгуакIуэхэм нэхъ ядыболъагъу, афиян зэзыхьэлIэхэм нэхърэ. 
Компьютерым «ирисымаджэхэм» ящыщу нэхъ «хьэлъэр» Интернет-джэгукIэхэм дихьэххэрщ, социальнэ сетьхэм «исхэр» абыхэм къакIэлъокIуэ. Ауэ лIэужьыгъуитIри куэдкIэ нэхъ хуабжьу дехьэх а Iуэхум афияным зэрызыIэщIиубыдэм нэхърэ. 
Сэ си IэнатIэм сызыщрихьэлIэ IуэхугъуэкIэ сывдэгуэшэфынущ. Псалъэм папщIэ, иужьрей илъэсхэм зи быныр компьютерым къахуIумыкI адэ-анэу си деж къэпсалъэхэм я бжыгъэр тIукIэ хэхъуащ, ахэр куэдкIэ нэхъыбэщ афияныр зи пэщIэщIэгъу хъуахэу тхьэусыхэхэм нэхърэ. Абы и лъэныкъуэкIэ адэ-анэхэм чэнджэщ ептыну хуабжьу гугъущ. 
Ауэ итIани, захуэзгъэзэну сыхуейщ. Фи сабийхэм нэхъыбэрэ фадэуэршэр, ахэр дэзыхьэхым зыщывгъэгъуазэ, фадэлажьэ. ИкъукIэ щыуагъэшхуэщ фадэ ефэу уэрамым дэткъым жыфIэу фыщыгуфIыкIыу, фи быныр компьютерым къыIумыкIыу жэщи-махуи Iувгъэсыныр. 
Виртуальнэ дунейр икъукIэ пхъашэщ. Абы цIыхур жагъуэу къегъапцIэ. Зэ еплъыгъуэкIэ, ныбжьыщIэр Iуэху гуэрым иужь итщ, и ныбжьэгъухэм я деж Iулыдж щиIэщ, цIыхубэм яхэтщ, и Iуэхухэр хъарзынэу докI. Ауэ а псори гъэпцIагъэщ, цIыхур къыщIигъэщIа гъащIэ пэжым пэIэщIэ зыщIщ. 
И щхьэпагъымрэ и дахагъымрэ я фIыгъэкIэ дуней пэжым бгъурыува виртуальнэ дунейм зэ мыхъуми зэ, Iэмал имыIэу, къыхедзыж зи гупсысэкIэр иджыри нэсу зэфIэмыува сабийр.
…Ауэ ар философие и лъэныкъуэкIэ узытепсэлъыхьын хуей Iуэхугъуэ инщ.