ЗыгъэпIейтейхэр къагъэнаIуэ

КъБР-м и Iэтащхьэ КIуэкIуэ Казбек хуэзащ «ЦIыхубэ фронт - Урысейм папщIэ» зэщIэхъееныгъэм и щIыналъэ къудамэу ди республикэм щыIэм и унафэщIхэм. Абы хэтхэм республикэм и Iэтащхьэм и пащхьэ илъэс къэс иралъхьэ щIыналъэм щыпсэу цIыхухэм я дежкIэ мыхьэнэшхуэ зиIэ Iуэхугъуэ зыбжанэ.

ЗэIущIэм хэтащ щIыналъэ штабым и унафэщIхэу Бакаев Евгений, Къылъшыкъуэ Альберт, Попетэ Андрей, Хутуевэ ­Любовь сымэ.
Зытепсэлъыхьа Iуэхугъуэхэм ящыщщ лъэсырызекIуэхэм уэрамхэмрэ гъуэгухэмрэ шынагъуэншэу къыщакIухьынымкIэ щытыкIэр егъэфIэкIуэныр, зи узыншагъэм къимыхьхэм я Iуэхухэр тынш ящыщIынымкIэ ирагъэкIуэкI лэжьыгъэр щIэгъэхуэбжьэныр, 2022 - 2023 гъэхэм къэрал программэм хагъэхьэну я мурад, Прохладнэ къалэм дэт, Пушкиным и цIэр зезыхьэ курыт школым зэгъэпэщыжыныгъэхэр щегъэ­кIуэкIыныр. Апхуэдэуи и гугъу ящIащ Мылъку къегъэщIыныр зи къалэн нэхъыщхьэу щымыт IуэхущIапIэхэр (НКО) дэIыгъыным, цIыхубэ IэпщIэлъапщIагъэм зегъэужьыным, псэу­пIэ-коммунальнэ хозяйствэр къэгъэщIэрэщIэжыным, къалэхэм я экологие щытыкIэм, псы Iуфэхэм, яхъумэ щIыуэпс щIыпIэхэм ухуэныгъэхэр щрамыгъэкIуэкIыным кIэлъы­плъыным, цIыху зэхуэсыпIэхэр хабзэм тету зыхуей хуэгъэзэным теухуа упщIэхэми. 
Урысей цIыхубэ фронтым и лIыкIуэхэм къагъэлъэгъуа Iуэхухэм республикэм и Iэтащхьэр хэплъэнущ министерствэхэмрэ щIыналъэхэмрэ я унафэщIхэр щIыгъуу.