ЗыгъэпсэхупIэхэм заужь, дунейм къыщацIыху

УФ-м и Правительствэм и УнафэщIым и къуэдзэ Чернышенкэ Дмитрий иригъэкIуэкIащ Туризмэм и зыужьыныгъэмкIэ комиссэм хэтхэм я зэIущIэ. 

Абы хэтащ ТуризмэмкIэ федеральнэ агентствэм и уна­фэщI Догузовэ Заринэ, а Iуэхур зи нэIэ щIэт министерствэхэм я лIыкIуэхэр, «Туризм.РФ» корпорацэм и генераль­нэ унафэщI Суханов Сергей, Къэрал Думэм Туризмэмрэ турист инфраструктурэмрэ зегъэужьынымкIэ и комитетым и унафэщI Тарбаев Сангаджи, щIыналъэхэм я Iэтащхьэхэр, нэгъуэщIхэри. 
Къызэхуэсахэр тепсэлъыхьащ «Туризмэмрэ хьэщIагъэ ехынымкIэ» лъэпкъ проектыр къэралми, щхьэхуэу хэгъэгухэми гъэзэщIа зэрыщыхъум, апхуэдэуи «Туризм.РФ» корпорацэм иригъэкIуэкIа лэжьыгъэхэр къапщытащ. 
«Туризмым ехьэлIауэ щыIэ къэрал дэIэпыкъуныгъэхэр - лъэпкъ проектым хыхьэ чартерхэр, грантхэр, кешбек прог­раммэхэр - дызэрыт илъэсым Урысейм и щIыналъэ псоми жыджэру къыщыхалъхьащ. Турист кэшбекымкIэ программэ къудейр цIыху мелуан 1,6-м къагъэсэбэпащ. «Туризм.РФ» корпорацэм инфраструктурэр егъэфIэкIуэнымкIэ лэ­жьэн щIидзащ. Дызэрыт зэманым инвестицэ проект 53-рэ щIыналъэ 27-м щыдгъэзэщIэну дубзыхуакIэщ», - жиIащ  Чернышенкэ Дмитрий.
Вице-премьерым къыхигъэщащ «Туризмэмрэ хьэщIагъэ ехынымкIэ» лъэпкъ проектым и фIыгъэкIэ пандемием къиша гугъуехьхэм пэщIэтыфам къыщымынэу, турист Iуэхум зрагъэужьынуи зэрыхунэсар. 
«Илъэс къакIуэм ди мурадщ а лъэпкъ проектыр дэнэ щIы­пIи щыдгъэзэщIэну, цIыхухэми хьэрычэтыщIэхэми дадэIэ­пыкъуну», - дыщIигъуащ Догузовэ Заринэ. 
«Туризм.РФ» корпорацэм и генеральнэ унафэщI Суханов Сергей къыхигъэбелджылыкIащ туризмэм зегъэужьыным хэгъэгу псори инвесторхэри жыджэру зэрыхэтыр. 
Къэбэрдей-Балъкъэр Республикэм и инвестицэ проект нэхъыщхьэхэм ящыщщ федеральнэ мыхьэнэ зиIэ «Налшык» зыгъэпсэхупIэмрэ «Iуащхьэмахуэ» турист комплексымрэ. Лъэпкъ проектхэм япкъ иткIэ а зыгъэпсэхупIэхэм заужь, Урысей Федерацэм къыщацIыху, туризм IэнатIэм щекIуэкI къызэгъэпэщыныгъэ лэжьыгъэхэр йофIакIуэ.