Илъэс 300 ирокъу

Къэбэрдей-Балъкъэрым и Iэтащхьэ КIуэкIуэ Казбек республикэм и прокуратурэм щылажьэхэмрэ и ветеранхэмрэ хъуэхъу псалъэкIэ захуигъэзащ, ди къэралым и прокуратурэр къызэрызэрагъэпэщрэ илъэс 300 зэрырикъум теухуауэ.

«Къэралымрэ жылагъуэмрэ зэпIэзэрыту къызэтегъэнэнымрэ хабзэр щызегъэкIуэнымкIэ шэсыпIэу къэув къулыкъущIапIэм и мыхьэнэр ин дыдэщ. Ар зи IэнатIэхэм къагъэлъагъуэ зэкIэлъыгъэкIуагъэмрэ пэжагъымрэ, Iэзагъэу ябгъэдэлъымрэ лэжьыгъэм зэрыхащIыкIымрэ куэду елъытащ цIыхухэм я хуитыныгъэхэр хъума зэрыхъунури, хабзэр къызэпызыудхэр жэуапым и чэзум ешэлIэнри, Iулъхьэ зэIэпызыххэм япэщIэтынри, нэгъуэщI абы хуэдэ Iуэхугъуэу жылагъуэм зэран хуэхъухэр къызэнэкIынри, - щыжеIэ республикэм и Iэтащхьэм Интернетым щиIэ и напэкIуэцIым тридза и тхыгъэм.
«Урысей Федерацэм и прокуратурэм и къудамэу Къэбэрдей-Балъкъэрым щыIэм щылажьэхэри къэралым къыщыхъу-къыщыщIэхэм жыджэру зэрыпэджэжыр дэркIэ нэрылъагъущ. Шэч хэлъкъым, ахэр зи къулыкъум хуэпэжу япэ итахэм пхаша лъагъуэм зэрырикIуэми, зыпэрыт IэнатIэм къащищI къалэнхэр, пщIэрэ-щхьэрэ яIэу зэрагъэзащIэми, республикэр хабзэм тетыныр къызэрызэрагъэпэщми, - дыкъыщоджэ зи гугъу тщIа тхыгъэм.
«Фызыпэрыт IэнатIэм къыфщищI къалэнхэр нэгъэсауэ и чэзум вгъэзэщIэным гурэ-псэкIэ яужь фызэритым папщIэ фIыщIэ фхуэтщIу, къыхыдогъэщ хабзэр хъумэным, жылагъуэр зэпIэзэрыту псэуным теухуауэ КъБР-м и прокуратурэм щылажьэхэм, фызыпэрыт къулыкъум къитIасэу, фи пщэ къыдалъхьэ къалэнхэр дяпэкIи къызыхуэтыншэу зэрывгъэзэщIэнур ди фIэщ зэрыхъур, - къыхегъэщ КIуэкIуэ Казбек и тхыгъэм.