Чэфу рулым дэтIысхьэныр шынагъуэщ

Урысей МВД-м Шэджэм районым щиIэ къудамэм, ОГИБДД-м и лэжьакIуэхэм къызэрагъэпэщри, КъБР-м щыIэ Урысей ФСИН-м Управленэм и район IэнатIэм и лэжьакIуэхэр ящIыгъу яхуэзащ УФ-м и УК-м и 264.I статьям ипкъ иткIэ суд зытрщIыхьа шоферхэм.
- Мыпхуэдэ зэхьэзэхуэр щытеухуэжар хабзэм тетын, чэфу рулым удэтIысхьэ зэрымыхъуныр къагурыгъэIуэнымрэ нэхъ Iейм щыхъумэнымрэщ, - къыхигъэщащ Урысей МВД-м Шэджэм районымкIэ и къудамэм и ОГИБДД-м и унафэщIым и къалэнхэр пIалъэкIэ зыгъэзащIэ полицэм и капитан Тхьэмокъуэ Валерий.
Ведомствэм и лэжьакIуэхэм жаIащ чэфу рулым дэтIысхьам къуэдышхуэ зэрапшынынум, я суд зэращIэнум, чэфу рулым мызэ-мытIэу зэрыдэтIысхьам къыхэкIыу машинэр зэжригъэкIуэну хуимтыныгъэ зэрамыIэнум къинэмыщIауэ, хьэкъыу япхыкIын зэрыхуейр ар зыжьэхэуами я узыншгъэмрэ гъащIэмрэ ихьынкIэ зэрыхъхунур.
Хабзэр къызэпызыудахэр еплъащ гъуэгу-транспорт къэхъукъащIэхэм кърикIуэхэр къыщыгъэлъэгъуа видеороликхэм, зэпкърахащ ахэм я щхьэусыгъуэхэр.
- Дэтхэнэ гъуэгу-транспорт къэхъукъащIэри (ДТП) унагъуэм, лъэпкъым я дежкIэ гуауэшхуэщ, цIыхум и къэкIуэнумрэ и гъащIэмрэ зыкъутэщ, - жаIащ видиеороликым щытепсэлъыхьым ГИБДД-м и лэжьакIуэхэм. Абыхэм зэIущIэм хэтахэр къыхураджащ зыхуэсакъыну, хабзэм тетыну, рулым чэфу дэмытIысхьэну.