Анэдэлъхубзэхэмрэ лъэпкъ литературэхэмкIэ Нал-шык къалэ махуитIкIэ щекIуэкIа олимпиадэхэр дыгъуасэ зэфIэкIащ. Ар къызэзыгъэпэщари езыгъэкIуэкIари Къэбэрдей-Балъкъэр Республикэм ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и министерствэрщ, щызэхэтар ЕгъэджакIуэхэм я IэщIагъэмрэ щIэныгъэмрэ щыхагъахъуэ центрырщ. АнэдэлъхубзэмкIэ яIэ щIэныгъэр наIуэ ящIыну олимпиадэм цIыхуи 130-м щIигъу къекIуэлIащ.
Олимпиадэхэр IыхьитIу зэхэтт - тхыбзэ лэжьыгъэрэ жьэрыIуатэ гъэунэхуныгъэу. Дэтхэнэ зы Iыхьэми еджакIуэхэм къалэн щаIащ анэдэлъхубзэмкIэ яIэ есэныгъэри лъэпкъ литературэмкIэ зрагъэгъуэта щIэныгъэри хэIу-щIыIу щащIыну.
Тхыбзэ Iыхьэри пкъыгъуитIу зэхэухуэнат. Япэ пкъыгъуэр къеджэныгъэ (диктант) жыпхъэм итт. Абдеж къыщыIэта хъуа Iуэхугъуэм зрагъэужьыжу, гупсысэрэ купщIэкIэ пэджэжу етIуанэ пкъыгъуэм псалъи 100 нэхърэ мынэхъ мащIэу цIыкIухэм тхыгъэ (сочиненэ) къыпагъэувэжын хуейуэ къалэн яIэт. Ауэ щыхъукIэ етIуанэ пкъыгъуэр къызэрыгуэкIтэкъым - абы Iэмалыншэу зэкIэщIэпч мыхъу псалъэ зэхэжыхьахэр, псалъэжьхэр, жыIэгъуэ гъэщIэгъуэнхэр хэбухуанэурэ птхын хуейт. Абы къищынэмыщIауэ, еджакIуэхэм я къалэнт къыщIэдзапIэрэ кIэухымрэ зэзыпх фIэщыгъэри зы хъуа текстым къыхуагъуэту фIащыну.
Текстхэр тхыдэм, лъэпкъ гъащIэм, цIыху зэхущытыкIэхэм, дыкъэзыухъуреихь дунейм ятеухуауэ щытащ.
Тхэныгъэм къищынэмыщIауэ, бзэхабзэм ехьэлIа Iуэхугъуэ зыбжани зэпкърахын хуейуэ олимпиадэм къигъэувырт. Ахэр зытеухуакIэ зэщхьэщыкIырт. Псалъэм папщIэ, псалъэр макъкIэ зэрызэхэткIэ щызэпкърах, псалъэр зэрызэхэт пкъыгъуэкIэ щагъэнахуэ, псалъэухар пкъыгъуэкIэ щызэпкърах, псалъэ зэхэжыхьахэм я мыхьэнэр къыщаIуатэ, Iуэхугъуэ пыухыкIахэм псалъэжьхэр къыщыхуагъуэт лэжьыгъэхэр хэтащ.
Олимпиадэм къыщыхалъхьа лэжьыгъэхэр гъэзэщIэ- ным сыхьэтищым нэблагъэкIэ яужь итащ цIыкIухэр.
Тхыбзэ лэжьыгъэхэр щызэфIэкIым, цIыкIухэр етIуанэ махуэм жьэрыIуатэ гъэунэхуныгъэхэм хэтыну кърагъэблэгъащ. Къыхэгъэщын хуейщ зэпеуэм хэтахэр 9-11-нэ классхэм щIэс ныбжьыщIэхэр ару зэрыщытыр. ЕтIуанэ махуэм класс къэс ирата лэжьыгъэр я гъэпсыкIэкIэ зэщхьэщы-кIырт.
9-нэ классым щIэс цIыкIухэм зэрагъэпэщын хуей къэпсэлъэныгъэр Iуэхугъуитхуим тещIыхьауэ щытащ. Дэтхэнэ зымкIи цIыкIухэм яIэ гупсысэр, ар я нэгу къызэрыщIэувэр, Iуэху зэхэмыбз гуэр хэлъмэ, зэфIэхыкIэ хъунумкIэ къэпсэлъэну Iэмал къаритырт. 10-нэ классым щIэсхэр сурэтым-рэ къызэгъэпэщакIуэхэм абы хуащIа фIэщыгъэмрэ зэрипхыу къэпсэлъэн хуейуэ я къалэнт. Ауэ щыхъукIи, къэпсэлъэныгъэр къызэрыгуэкI псалъэмакъ мыхъуу, монолог жыпхъэм иту, къыхуеджэныгъэ, къыхуэгъэушыныгъэ, гупсысэ пыухыкIам ухуэзышэ псалъэ зэгъэпэщауэ щытын хуейт. 11-нэ классым щIэсхэм яIа къалэныр нэхъ гугъуу къыщIэкIынщ. Зэи зэрымылъэгъуа ныбжьыщIэхэр зэрыцIыхуу нэIуаси зэхуэхъун, псалъэмакъри зэIэпахыу зэпсэлъэн хуейт. Мы лэжьыгъэр икIи гъэщIэгъуэнт, икIи хьэлъэт. Арами, цIыкIухэм яхузэфIэкIащ зэпцIу хуежьа я гупсысэкIэм балигъ бгъэдыхьэкIэ халъхьэу екIуу а къалэныр кърахьэлIэн. ГурыIуэгъуэт, я еплъыкIэхэм щыщIэныгъэ гуэр яIэми, гуращэ пыухыкIам зэрытелажьэр, къапэщылъ Iуэхугъуэхэм ирипIейтейми, сытри къазэрыдэхъунумкIэ гурыщхъуэ зэрамыIэр. НыбжьыщIэхэм я пащхьэ къис къэпщытакIуэхэм дзыхь кърагъэзым хуэдэу, еджакIуэ цIыкIухэр зэIухауэ псэлъащ, къалэн яIэри ящымыгъупщэу зэрызэфIахынум хущIэкъуащ.
МахуитIкIэ екIуэкIа зэпеуэхэм къыхалъхьа лэжьыгъэр зэрыщыту еджапIэ программэхэм техуэрт, мащIэу гъэгугъуауэ, еджакIуэхэм я гупсысэр игъэпхъэру.
Олимпиадэм и Iыхьэхэм еджакIуэхэм къыщахьа бал-лхэр къэпщытакIуэхэм щхьэхуэ-щхьэхуэу ягъэувыжакIэщ. КърикIуахэр зэхалъхьэжа нэужь, олимпиадэм и къызэгъэпэщакIуэхэм абы щытекIуахэмрэ къыщыхэжаныкIа-хэмрэ я цIэ-унагъуэцIэр министерствэм и сайтым кърагъэувэнущ.
УзыщыгуфIыкIын Iуэхущ зэхьэзэхуэм къыхыхьа сабий-хэм я бжыгъэр зэрымымащIэр. Абы гугъэ къыует анэдэлъхубзэхэм я пщIэр къызэремыхуэхынумкIэ, абыкIэ зрагъэгъуэт щIэныгъэмрэ есэныгъэхэмрэ кIуэ пэтми заубгъуу зэрекIуэкIынумкIэ. Шэч хэлъкъым, анэдэлъхубзэхэмкIэ екIуэкI олимпиадэхэм сабийхэм къыдалъхуа бзэм гулъытэ хэха зэрахуригъэщIым, я зэчийм зэрызригъэужьым.
КъызэгъэпэщакIуэхэм зэрыжаIэмкIэ, дяпэкIэ анэдэлъхубзэхэмрэ лъэпкъ литературэхэмкIэ ирагъэкIуэкIыну зэпеуэхэм еджапIэ программэхэм къарит щIэныгъэр зыгъэкуу, джэгукIэ Iэмал зыхэлъ, къызэрымыкIуэ бгъэдыхьэкIэхэр зэбэкI лэжьыгъэхэр хэтынущ.
