Лидский Михаил и дерс гуимыхужыр

Кавказ Ищхъэрэм ГъуазджэхэмкIэ и институтым гъуазджэхэмкIэ и колледжым иджыблагъэ щекIуэкIащ Мэзкуу дэт къэрал консерваторием и доцент, Пианистхэм я VIII урысейпсо зэпеуэм и лауреат Лидский Михаил и концерт закъуэр.

Бетховен Людвиг и сонатэхэр зи лъабжьэ фортепианэ пшыналъэр фIыуэ зылъагъуэхэм IэмалыфI яIащ дуней псом щыцIэрыIуэ артист цIэрыIуэм и концертым зрагъэхьэлIэу едэIуэну, епсэлъылIэну, и дерсхэм акъыл къыхахыну.

«Бетховен и сонатэхэр пианинэм кърагъэкIыну тегушхуэр куэд дыдэ хъуркъым, апхуэдизкIэ ар гугъущ икIи гъэзэщIэгъуейуэ гъэпсащи. Ауэ абы тебгъэкIуадэ къарумрэ лэжьыгъэмрэ пщIэшхуэ яIэщ. Зихуэдэ щымыIэ Бетховен и пшыналъэр пианинэм зэщыкъуэ къыхэмыкIыу къизыгъэкI, уеблэмэ къэубыдыгъуей дыдэу щыт пшыналъэ зэблэкIыпIэхэр дауэ къигъэIуа жыпIэу зэкIэлъызыгъакIуэ артистым и концертыр классикэ макъамэр фIыуэ зылъагъухэм я дежкIэ тыгъэшхуэщ», – жа1ащ зэхахар хьэлэмэтлажьэ къызыщыхъуа, макъамэ лIэужьыгъуэ куэд зэхэзыха егъэджакIуэхэм.

«КъБР-м и симфоние оркестрым сыт хуэдиз концерт имытми, зы блэдмыгъэкIыу докIуэ, апхуэдэ дыдэу макъамэ зэхьэзэхуэу ди щIыналъэм щекIуэкIхэми зыхэдгъэныркъым, – жеIэ «Урысейм и гугъапIэ» урысейпсо цIыхубз жылагъуэ зэгухьэныгъэм и къудамэу ди щIыналъэм щыIэм и унафэщI Черновэ Аленэ. – Дэ дыхуейщ къытщIэхъуэ щIалэгъуалэм дунейпсо гъуазджэм и хъугъуэфIыгъуэр зыхащIэу, ар ялъытэу, пщIэ хуащIу щытыну, иужь дитщ ныбжьыщIэ нэхъыбэ мыпхуэдэ Iуэхухэм къыхэтшэну. Мыпхуэдэ Iэмалыр, цIыхушхуэм и дерс гуимыхужхэм уедэIуэныр зэзэмызэ дыдэщ къыщыпхуихуэр, абы зыхэбгъэкIыж зэрымыхъунур фIы дыдэу зыхыдощIэ. Арыххэуи, IэщIагъэлIхэм къыхалъхьэ мыпхуэдэ жэрдэм дахэхэм дапэджэжыныр жылагъуэ лэжьакIуэхэм ди къалэну къыдолъытэ».

Лидский Михаил и цIэр, пэж дыдэу, макъамэ дунейм фIыуэ щащIэ. Фортепианэ пшыналъэм зиужьыным абы хуищIа хэлъхьэныгъэр къызэрымыкIуэу инщ.

Артист цIэрыIуэм и концертхэр ди къэралым и щIыпIэ куэдым щитащ икIи фIы дыдэу къыгуроIуэ абы цIыхухэр зыщIигъэдэIу псэкупсэ къэгъэщIыгъэхэм блэкIыр къызэремыкIуэлIэнур, ауэ фIэфIу едаIуэм и псэм телъыджэхэр къызэщигъэуфыну зэрыщытыр. Сыт хуэдэ концертми и псэм щыщ Iыхьэ къыщызынэ Лидский Михаил Къэбэрдей-Балъкъэрым и щыпэ къакIуэщ, ауэ игъэлъэгъуа концерт закъуэм игъуэта щIэупщIэри гулъытэншэ ищIакъым. «Фортепианэ пшыналъэр щхьэхуэныгъэ зыкъом зиIэ макъамэ къэгъэщIыгъэщ. Ар псоми яфIэфIщ, абы псори дехьэх жыпIэмэ егъэлея хъунущ. Ауэ ныщхьэбэрей пшыхьыр хьэлэмэт къысщыхъуащ. КъекIуэлIа цIыхум и бжыгъэракъым си гур хэзыгъэхъуар, едэIуам щIалэгъуалэр ебэкIыу зэрыщытаращ. Абы гугъапIэ къыдет макъамэм и къалэн нэхъыщхьэр – дахагъэр дунейм тепщэ щыщIыныр – хьэкъ зыщызыщIыжын щIэблэ дахэ къытщIэувэнымк1э. Хуит сыкъэфщIи, щIалэгъуалэм пщIэ зэрыфхуэсщIыр жызвгъэIэ», – къыхигъэщащ Лидскэм.

Лидский Михаил ита концерт закъуэм пшыналъэм и мызакъуэу, псалъэмакъ купщIафIи цIыхухэр щригъэдэIуащ, къызыщIэупщIэхэми жэуап яритыжащ. КъызэрыщIэкIымкIэ, Михаил и ныбжьыр илъэситху ирикъуа къудейт пианинэм макъамэ къригъэкIыу щыхуежьам, илъэс 13-м иту оркестрым и гъусэу утыку япэу къихьащ, илъэс 15-м хыхьауэ арат езым и щхьэзакъуэ концертыр щигъэхьэзырам.

Лидскэм къригъэкI макъамэхэмрэ пшыналъэхэмрэ зытет дискхэр ди къэралым и мызакъуэу, хамэ хэкухэми пщIы бжыгъэкIэрэ къыщыдокI, бгъэдэлъ щIэныгъэр емышыжу щIалэгъуалэм ябгъэдилъхьэу узэщIакIуэ лэжьыгъэшхуэ ирегъэкIуэкI, Мэзкуу дэт консерваторием профессор Воскресенский Михаил и унафэм щIэту къыщызэрагъэпэща, фортепианэмкIэ кафедрэм илъэс куэд хъуауэ и егъэджакIуэщ.

Лидский Михаил Пианистхэм я VIII урысейпсо зэпеуэм и япэ саугъэтыр, Прокофьев Сергей и ЕтIуанэ концертыр 1эзэу зэригъэзэщIам папщIэ МакъамэмкIэ Урысейпсо Хасэм и саугъэт нэхъыщхьэр къыхуагъэфэщащ.

Къыхэгъэщын хуейщ Лидский Михаил концертыр итын ипэ къихуэу ГъуазджэхэмкIэ колледжым и студентхэм лекцэ къазэрыхуеджар. Ар теухуат макъамэмкIэ щIэныгъэ зэзыгъэгъуэт еджакIуэхэм иджырей гъащIэм и фIыпIэхэр зэрызрагъэщIыфыну, абыкIэ есэныгъэхэр зэрызыIэрагъэхьэфыну щIыкIэхэм.