Музейм и жэщ

СурэтыщI ГъуазджэхэмкIэ Ткаченкэ Андрей и цIэр зезыхьэ музейр иджыблагъэ хэтащ «Музейм и жэщ» урысейпсо Iуэхум.

Хабзэ хъуауэ илъэс къэс къызэрагъэпэщ зэхыхьэм, мы гъэми (хэтыну, еплъыну) цIыху куэд къызэрекIуэлIар жиIащ зэIущIэр къыщызэIуихым музейм и къудамэм и унафэщI Леонтьевэ Нинэ. Пшыхьыр ирагъэкIуэкIыну кърагъэблэгъахэм ящыщ сурэтыщI КIыщ Мадинэ («Alira» студием щолажьэ) пкъынэкIэ (хна) цIыхуфэм сурэт зэрытращIэм теухуауэ жиIам цIыкIуи ини яфIэгъэщIэгъуэну едэIуащ. «Alira» студием и унафэщI Марзаевэ Иринэ скульптурэ къызыхащIыкI пластилиным узэрырилэжьэнур, апхуэдэ хьэпшыпхэр дыщэпскIэ зэралэжыр яригъэлъагъуащ къызэхуэсахэм. СурэтыщI Керженцевэ Екатеринэ сурэтхэр ину къыпщызыгъэхъу IэмалхэмкIэ мастер-класс иригъэкIуэкIащ.
Кавказ Ищхъэрэм ГъуазджэхэмкIэ институтым и студентхэм, ГъуазджэхэмкIэ сабий школ №1-м щеджэхэм концерт щатащ пшыхьым. Абыхэм ягъэзэщIащ Урысейм, Кавказым, музейм, анэм, лъахэм теухуа уэрэдхэмрэ усэхэмрэ.
Пшыхьым хэта псоми иратащ СурэтыщI гъуазджэхэмкIэ Ткаченкэ Андрей и цIэр зезыхьэ музейм къыбгъэдэкI фIыщIэ тхылъ.
Музейм и лэжьакIуэхэм «Урысей зэкъуэт» политикэ партым къыбгъэдэкIыу иратащ «Урысейм ис лъэпкъхэм я щэнхабзэ Iэужьыр хъумэным зэрытелажьэм папщIэ» фIыщIэ тхылъхэр.