Унэжьхэм цIыхухэр къыщIагъэIэпхъукI

КъБР-м и Правительствэм и УнафэщI Мусуков Алий дыгъуасэ зи чэзу зэIущIэр иригъэ­кIуэкIащ. Абы Iуэхугъуи 10-м щIигъум щыхэплъащ.

ЗэIущIэм къыщащтащ «Къэ­бэрдей-Балъкъэр Республикэм и бюджетыр тезыгуашэхэмрэ ар къызыIэрыхьэхэмрэ яхуэгъэза къэрал къэпщытэныгъэр зэре­кIуэкIым 2022 гъэм щIэуэ халъ­хьэнум теухуауэ» КъБР-м и Правительствэм и унафэм и проектыр.
«КъБР-м щыпсэу цIыхум и къэрал дэфтэрхэр зэратх щIы­-кIэр къызэгъэпэщыным теухуа­уэ» КъБР-м и Законым халъхьэ зэхъуэкIыныгъэхэм къытеувыIащ КъБР-м экономикэ зыужьыныгъэмкIэ и министр Рахаев Борис. Абы зэрыжиIамкIэ, дэфтэрым халъхьэ зэхъуэкIыныгъэр теу­хуащ Къалэн куэд зыгъэзащIэ центрхэм я Iуэхутхьэбзэхэм Iуэхугъуэ зыбжанэ зэрыдыщIагъум, сабий къалъхуам и щыхьэт тхы­лъымрэ цIыхур дунейм зэрехыжам теухуа дэфтэрымрэ гъэхьэ­зырыныр яхэту.
КъБР-м и Правительствэм и унафэкIэ арэзы техъуащ Мэкъу­мэш IэнатIэр, промышленнос­тыр, сатур, щIыуэпс хъугъуэфIыгъуэхэмрэ бжыгъэ зыужьыныгъэмрэ зэпIэзэрыту лэжьэныр къызэгъэпэщынымкIэ опера­-тивнэ штабым цIыхуитI - Вете­ринар, фитосанитар кIэлъыплъы­ныгъэмкIэ федеральнэ IэнатIэм и управленэу Меркъул Дмитрийрэ ЩIыуэпсыр къызэрагъэсэ­бэпым кIэлъыплъынымкIэ федеральнэ IэнатIэм и Кавказ Ищхъэрэ щIыналъэ IуэхущIапIэм и унафэщIым и къуэдзэм и къалэнхэр зыгъэзащIэ Шевченкэ Тамарэрэ - хагъэхьэным.
Республикэ унафэщIхэм къащтащ «2022 - 2025 гъэхэм Къэбэрдей-Балъкъэр Республикэм жьы хъуа и унэхэм цIыхухэр къыщIэгъэIэпхъукIын» республикэ программэм арэзы техъуэным теу­хуауэ» КъБР-м и Правительствэм и унафэм и проектыр. КъБР-м ухуэныгъэмрэ псэупIэ-коммунальнэ IэнатIэмкIэ и министр Бэрбэч Алим зэрыжиIамкIэ, я мурадыр ущыпсэу мыхъуну унэхэм цIыхухэр 2025 гъэм фокIадэм и 1-м ирихьэлIэу къыщIагъэIэп­хъукIынырщ. 2017 гъэм щIышы­лэм и 1-м къыщыщIэдзауэ 2021 гъэм щIышылэм и 1 пщIондэ фэ­тэр куэду зэхэт унэу 19 кхъахэу ­къалъытащ (псори зэхэту метр зэбгъузэнатIэ 15613-рэ мэхъу). Абыхэм я пэш 623-м щIэс цIыху 1823-рэ къыщIагъэIэпхъукIынущ 2025 гъэ пщIондэ.
- Программэм хэхуа унэхэр Налшык къалэ округым, Нарт­къалэ (Аруан район), Солдатскэ жылэм (Прохладнэ район) дэтщ. Лэжьыгъэхэр IыхьиплIу гуэшауэ къызэдгъэпэщынущ: 2022 -        2023 гъэхэм метр зэбгъузэнатIэ 1880-м къыщIэдгъэIэпхъукIынущ, 2023 – 2024 гъэхэм - метр зэбгъузэнатIэ 5386-м, 2024 - 2025 гъэхэм - метр зэбгъузэнатIэ     4738-м, 2025 гъэм - метр зэбгъу­зэнатIэ 3607-м. Псоми зэхэту мы Iуэхум сом зы мелардрэ мелуани 179-рэ мин 700-рэ текIуэдэнущ, - жиIащ министрым.
Мусуков Алий къызэхуэсахэм ягу къигъэкIыжащ жьы хъуа унэ­хэм къыщIэгъэIэпхъукIыным ­теухуауэ ипэкIэ зэлэжьа про­граммэр илъэсищкIэ нэхъ пасэу зэрызэфIагъэкIар икIи абы и фIыгъэкIэ а Iуэхур гугъуехь хэ­мылъу республикэм нэхъ щIэхыу зэрыщызэфIахыфынур дыщIигъуащ.
ЗэIущIэм къыщащтащ 2023 - 2024 гъэхэм къриубыдэу техно­логие, есэп щIэныгъэхэм хуэ­гъэза «Точка Роста» центрхэм хуэ­дэхэр республикэм и къуа­жэхэмрэ къалэ цIыкIухэмрэ дэт курыт еджапIэхэм къыщы­зэIу­хы­ным теухуа Iэмалхэр зэра­убзыху унафэм и проектыр. ­КъБР-м цIыхухэр егъэджэнымкIэ, щIэныгъэмрэ щIалэгъуалэм я Iуэху­хэмкIэ и министр Езауэ Анзор жиIащ, проектым зэрыщаубызхуамкIэ, республикэм и муниципальнэ щIыналъитхум «Точка Роста» еджапIэу 24-рэ къызэ­рыщызэрагъэпэщынур. А Iуэхум текIуэдэнущ сом мелуан 36-рэ. Республикэ бюджетым щыщу абы халъхьэнущ сом мин 360-рэ.
Республикэ унафэщIхэр арэзы техъуащ Курыт еджапIэхэмрэ ­балигъ ныбжьым нэмысахэм я IуэхущIапIэхэмрэ щызэфIах Iуэху­тхьэбзэхэр цIыхухэм пщIэн­шэу ягъуэтыным, апхуэдэуи абыхэм зэрыщрагъаджэ тхылъ­хэм, зэрыщагъэджэгу хьэпшып­хэм текIуадэр къызэгъэпэщы­ным теухуауэ муниципальнэ ­районхэм я бюджетхэм субвенцэхэр 2022, 2023 – 2024 гъэхэм зэрытрагуашэм халъхьэ зэхъуэ­кIыныгъэхэм. Министрым къы­зэры­хигъэщамкIэ, дэфтэрым къыщыгъэлъэгъуа Iуэхухэм 2022 гъэм - сом мелуан 14-рэ мин 46-рэ, 2023 гъэм сом мелуан 29-рэ мин 493-рэ текIуэдэнущ.
ЗэIущIэм къыщащтащ «Къэ­бэрдей-Балъкъэр Республикэм физическэ щэнхабзэмрэ спортымрэ зыщегъэужьын» КъБР-м    и къэрал программэм халъхьэ зэхъуэкIыныгъэхэм ятеухуауэ ­КъБР-м и Правительствэм и уна­фэм и проектыр.
Республикэм и Правитель­ст­вэм игъэбелджылащ Донбассым щекIуэкI Iуэхухэм я къалэн щагъэзащIэу КъБР-м IэщэкIэ зэ­щIэузэда и IэнатIэхэм я лэ­жьакIуэ 29-м фэбжь зэрагъуэтам къы­хэкIыу, республикэ бюджетым щыщ ахъшэкIэ зэрызыщIагъэ­къуэнур. КъБР-м лэжьыгъэмрэ социальнэ дэIэпыкъуныгъэмкIэ и министрым и къуэдзэ Ацкъан Ратмир зэрыжиIамкIэ, дэфтэ­-рыр ягъэхьэзыращ щIыпIэ уна­фэр зезыхьэ IуэхущIапIэхэм зыкъызэрыхуагъэзам къыхэкIкIэ ­КъБР-м и Iэтащхьэм къащищIа пщэрылъым тету.