Электроэнергетикэм зегъэужьыным сом мелард 1,6-м щIигъу трагъэкIуэдэнущ

 КIуэкIуэ Казбек иджыблагъэ Москва щыхуэзащ «Россети» акционер зэгухьэныгъэ зэIухам и генеральнэ директор Рюмин Андрей. ЗэIущIэм щытепсэлъыхьащ ди республикэм и электросетхэм зегъэужьынымкIэ щыIэ зэ­фIэкI­хэм, абы хуэунэтIауэ лъэныкъуитIми я къарур зэгъэуIуным, апхуэдэу энергетикэм и IэнатIэр туристхэм я гъэмахуэ зыгъэпсэхугъуэр къыщызэIуахыну лъэхъэнэм зэрыхуэхьэзырым.

КIуэкIуэ Казбек «Россети» акционер зэгухьэныгъэ зэIухам и унафэщI Рюмин Андрей фIыщIэ хуищIащ Къэбэрдей-Балъкъэр Республикэм и экономикэм и дежкIэ мыхьэнэшхуэ зиIэ проектхэр гъэзэщIэнымкIэ щIэгъэкъуэнышхуэ зэрыхъум папщIэ. «Энергетикэм и инфраструктурэ зызыужьа икIи зэблэу къыхэмыкIыу лажьэ зэтегъэувэныр промышленностым, туризмэм, мэкъумэш хозяйст­вэм, транспортымрэ гъуэгухэмрэ зегъэужьынымкIэ шэсыпIэ нэхъыщхьэхэм ящыщ зыщ. Аращ куэдкIэ зэлъытауэ щытынур республикэм инвестицэхэр къызэщIэгъэуIуэнымкIэ, цIыхухэм я псэу­кIэр егъэфIэкIуэнымкIэ иригъэкIуэкIыну лэжьыгъэхэр», - жиIащ Къэбэрдей-Балъкъэр Республикэм и Iэтащхьэм. Абы къыхигъэщхьэхукIащ электросетхэр зезыхьэ компание нэхъ ин дыдэм щIыналъэр зэрыдэлажьэм и мыхьэнэр икъукIэ зэрыиныр.
«ЦIыхухэм я гъэмахуэ зыгъэпсэхугъуэр къыщыблэгъа мы лъэхъэнэм «Россети» зэгухьэныгъэм хэхауэ и нэIэ тригъэтщ курортхэр электрокъарукIэ къызэзыгъэпэщ инфраструктурэр зэрызэрахьэм. А зэманым ирихьэлIэу зыхуей хуэдгъэзэжащ Налшыкрэ Iуащхьэмахуэ лъапэрэ я санаторэхэр, адрей зыгъэпсэхупIэхэр энергиекIэ къызэзыгъэпэщ подстанцхэр. Абы щIыгъуу лэжьыгъэшхуэ зэфIагъэкIащ респуб­ликэм и сетхэр зэблэу къыхэмыкIыу зэрылэжьэным хуэгъэ­хьэзырыным. А Iуэхугъуэхэм адэкIи пащэнущ икIи абыхэм трагъэкIуэдэн папщIэ республикэм мы гъэм сом мелард 1,6-рэ хухэтхынущ. Иджыпсту дэ къытпэщыт Iуэху нэхъыщхьэ дыдэхэм ящыщщ щIэуэ къызэрагъэпэщыж Тырныауз комбинатым и энергетикэ инфраструктурэр зэтегъэувэныр», - жиIащ Рюмин Андрей.
Апхуэдэу псалъэмакъым къыхэщащ электроэнергетикэм иIэ кIэрыхур гъэмэщIэным теухуа Iуэхухэр. Абы папщIэ республикэм и жылагъуэхэм иджырей къызэрабж Iэмэпсымэхэр щагъэув, дунейм и щытыкIэм емылъытауэ энергиер кIэрыхуншэу зыхъумэ кIапсэхэр яукъуэдий.