Уэрэд жыIэкIэ гъэщIэгъуэн

Зи тхьэкIумэ зэхимыххэм я урысейпсо зэгухьэныгъэм и Къэбэрдей-Балъкъэр къудамэр къызэрызэрагъэпэщрэ илъэс 85-рэ зэрырикъур иджыблагъэ ди республикэм щагъэлъэпIащ.

ЩоджэнцIыкIу Алий и цIэр зезыхьэ Къэбэрдей къэрал драмэ театрым къыщызэрагъэпэща пшыхьым хэтащ Зи тхьэкIумэ зэхимыххэм я урысейпсо зэгухьэныгъэм и тхьэмадэ Иванов Станислав, КъБР-м лэжьыгъэмкIэ,  цIыхухэр IэнатIэкIэ къызэгъэпэщытынымрэ социальнэ дэIэпыкъуныгъэкIэ и министр Асанэ Алим сымэ.

А пшыхьым концерт гъэщIэгъуэн щагъэлъэгъуащ «Поющие руки» фIэщыгъэм щIэту бзагуэхэмрэ зи тхьэкIумэм зэхимыххэмрэ я къэфакIуэ, уэрэджыIакIуэ гупым.

Пермь къикIа мы гупым я закъуэщ ди къэралым апхуэдэу щыIэр. Абыхэм мызэ-мытIэу Президентым и грантыр къыхуагъэфэщащ, ахэр УФ-м и мызакъуэу, хамэ къэрал куэдым къыщацIыху.

Гупым я гъусэу утыкум зыкъыщагъэлъэгъуащ Прохладнэ щIыналъэм хыхьэ Приближнэ къуажэм дэт школ-интернатым щеджэ цIыкIухэм. Абыхэми къафэ, уэрэд зыбжанэ ягъэзэщIащ.

«Поющие руки» гупым хэтхэр ныбжьыщIэ цIыкIухэм къащытхъуащ, абыхэм ягъэзэщIа уэрэдхэмрэ къафэхэмрэ зэрыгугъум емылъытауэ, фIы дыдэу къехъулIауэ жаIэу.

- Илъэс куэд щIауэ ди интернатым щыхудогъаджэ Iэрэ IэпэкIэ уэрэд жыIэным,- жиIащ интернатым и унафэщI Лавров Вячеслав. - Пэжым ухуеймэ, абыхэм профессионал инхэр ядэлажьэркъым, апхуэдэ Iэмал дызэримыIэм къыхэкIыу. Езы сабийхэм яфIэфIщи, нэгъэсауэ зэрагъащIэ армыхъу. Ди деж щеджэ цIыкIухэм ар тегъэупIэфI яхуохъу. КъищынэмыщIауэ, а цIыкIухэм утыку итыныр къызэрымыкIуэу яфIэфIщи, щIэх-щIэхыурэ концерт дот.

Драмэ театрым щекIуэкIа пшыхьым цIыху куэд екIуэлIат. Абы еплъа дэтхэнэми, зэрагъэщIэгъуэн ямыщIэу, телъыджэ ящыхъуат утыкум ит цIыкIухэм я Iэзагъымрэ дахэу зыкъызэрагъэлъагъуэмрэ. Абыхэм уащеплъкIэ, «Псэ зиIэм, уэрэд жеIэ», - жыIэгъуэр щхьэхуимыту уигу къокIыж. Пэжу, уэрэдыр къыщежьэр псэращ, армыхъу, Iэпэрэ IэкIэ уэрэд жызыIэхэм я гупсысэр щхьэ зыхэтщIэрэ бзагуэбзэ зымыщIэхэм?!