IэщIагъэ дахэм и Iэужьхэр

Урысейм щыпсэу лъэпкъхэм я щэнхабзэ щIэинхэр хъумэным и илъэсым хыхьэу, ПащIэ Бэчмырзэ и цIэр зезыхьэ республикэ Сабий библиотекэм щрагъэкIуэкIащ «Национальный женский головной убор» мастер-классыр.

Зэхыхьэ гуапэм ирагъэблэгъащ Налшык къалэм и гимназие №1-м и 5-нэ классым и еджакIуэхэр. Библиотекэм и лэжьакIуэхэр ныбжьыщIэхэм яхутепсэлыъхьащ УФ-м и Президентым и УнафэкIэ мы гъэр Урысейм ис лъэпкъхэм я цIыхубэ гъуазджэмрэ щэнхабзэ щIэинхэр хъумэнымрэ я илъэсу зэрагъэувар.

ЕджакIуэхэр лъэпкъ фэилъхьэгъуэхэм я тхыдэм хагъэгъуэзащ. Пасэ зэманым адыгэ фащэм щIыгъуа пыIэ телъыджэхэр  я плъыфэкIэ, лъагагъкIэ, щIыкIэкIэ лIэужьыгъуэ зыбжанэу зэрызэщхьэщыкIыр, ахэр бзылъхугъэр зыщыщ лIакъуэмрэ зэрыт ныбжьымрэ елъытауэ зэрахьэу зэрыщытар гъэщIэгъуэн ящыхъуащ. Хъыджэбз цIыкIухэр кIэлъагъэплъащ адыгэ цIыхубз пыIэхэр зэрагъэхьэзырым. НыбжьыщIэхэм тхылъымпIэ щхъуэкIэплъыкIэм апхуэдэ пыIэхэр къыхащIыкIащ икIи тхыпхъэхэмкIэ ягъэдэхэжащ. Зэхыхьэм хэтахэм лъэпкъ тхыпхъэ дахэхэмкIэ гъэдэха, дуней псом щафIэгъэщIэгъуэн дэзыхьэх адыгэ цIыхубз фащэмрэ абы  щIыгъу пыIэхэмрэ нэгъуэщIынэкIэ иригъэплъащ,  пасэрей IэщIагъэ дахэм дихьэхыпэни къахэкIынри хэлъщ.