КъБР-м и Музыкэ къэрал театрым мэкъуауэгъуэм и 8-м къыщызэIуахащ «Къэбэрдей-Балъкъэрыр - илъэси 100» ебланэ дунейпсо кинофестивалыр, республикэм и къэралыгъуэр къызэрыунэхурэ илъэси 100 зэрырикъум траухуар. Зэхыхьэр УФ-м ЩэнхабзэмкIэ и министерствэмрэ КъБР-м и Правительствэмрэ я дэIэпыкъуэгъуу ирагъэкIуэкI.
ЗЭХЫХЬЭР гукъинэжу къызэIуахащ. Ар ирагъэкIуэкIащ фестивалым и художественнэ унафэщI, КъБР-м гъуазджэхэмкIэ щIыхь зиIэ и лэжьакIуэ, продюсер, артист, сценарист, киновед Новожилов Сергей, Къэбэрдей, Балъкъэр къэрал лъэпкъ драмэ театрхэм я актрисэхэу Къуэшокъуэ Регинэрэ Гуртуевэ Лейлэрэ. Музыкэ театрым и пэIущIэ пэшым и алэрыбгъу плъыжь лъагъуэм техьащ Урысей Федерацэмрэ Къэбэрдей-Балъкъэрымрэ театрымрэ киномкIэ я артистхэр. Апхуэдэхэщ КъБР-м и Музыкэ къэрал театрым, Къэбэрдей, Балъкъэр къэрал лъэпкъ драмэ театрхэм я артистхэр, УФ-м и цIыхубэ артистхэу Чернов Юрэрэ Пашутин Александррэ, УФ-м щIыхь зиIэ и артисткэ Сташенкэ Оксанэ сымэ, нэгъуэщIхэри.
Зэхыхьэм кърихьэлIахэм Iэгуауэ ин хуаIэтащ Молдовэ Республикэм и цIыхубэ артисткэ, «Табор уходит в небо» фильм цIэрыIуэм Радэ и ролыр щызыгъэзэщIа актрисэ Томэ Светла-нэ. Музтеатрым и утыкум абы тыгъэ щыхуащIащ IэкIэ ягъэхьэзы-ра шылэхъар дахэ.
- ФIыщIэ фхузощI! Тхьэмахуэ зыбжанэ хъуауэ гукъыдэжыншэу сыщытами, нобэ дэрэжэгъуэ сиIэщи, сынасыпыфIэу зызолъытэж! Фи бзылъхугъэхэр щэныфIэщ, зэкIужщ, цIыхухъухэр гуапэщ, - жиIащ Томэ Светланэ.
Зэраубзыхуам тету, фестивалым и программэм хыхьэу, къэралитхум (Урысейм, Армением, Беларусым, Къыргъызым, Къэзахъстаным) я режиссёрхэм траха художественнэ фильм пщыкIутI къагъэлъэгъуэнущ.
Зэхуэсхэм хэтынухэмрэ абыхэм зыкърезыгъэхьэлIэнухэмрэ Iэмал яIэщ урыс, дунейпсо кинофестивалхэм щагъэлъэгъуа, саугъэт нэхъыщхьэхэр къыщызыхьа фильмхэм еплъыну. Апхуэдэхэщ «Дорога в Эдэм», «Ми- шень», «Тыгын Дархан», «Клоун - это я» фильмхэр, документхэр зи лъабжьэ «История советского плаката. История спонтанного потребления», «Уходящая натура. Портрет режиссёра Ахадова» фильмхэр.
- Киногъуазджэр фIыуэ зылъагъухэм IэмалыфI фиIэщ кинотеатрхэм иджыри щамыгъэлъэгъуа кино нэхъыфI пщIы бжыгъэхэм ди фестивалым фыщеплъыну, - жиIащ КъБР-м щэнхабзэмкIэ и министр Къумахуэ Мухьэдин. Кинофестивалым зыкърезыгъэхьэлIахэми, Къэбэрдей-Балъкъэрым исхэми, Урысейм и щIыпIэхэм къикIахэми сынывохъуэхъу насып, гуапагъэ, ехъулIэныгъэ фиIэну!
Фестивалым художественнэ фильмхэм къадэкIуэу концертхэр, пшыхьхэр, актёр Iэзагъэм- кIэ мастер-классхэр къыщызэрагъэпэщынущ. Щэнхабзэ зэхыхьэ гуапэм хьэщIэ лъапIэу къытхуеблэгъащ театрымрэ киномрэ я актёрхэр, музыкантхэр, УФ-м и цIыхубэ артисткэ Немоляевэ Светланэ, Урысейм щIыхь зиIэ и артисткэ Мороз Дарье, Шацкая Нинэ, Суховей Светланэ, Семёновэ Екатеринэ, Набиев Ив, Мукенди Арсен, Бэрбэч Аскэр, Тодоров Сергей, Гладков Григорий, Лачинэ Иринэ, Алмазов Олег, Головушкин Михаил, Карташов Дмитрий, Ермак Дмитрий, Колосов Максим, Межулис Андрей, Адаменкэ Григорий, Шкляев Влад сымэ, нэгъуэщIхэри.
Кинофестивалыр мэкъуауэ-гъуэм и 12-м зэхуащIыжынущ. Фигу къэдгъэкIыжынщи, УФ-м и Президент Путин Владимир 2018 гъэм Iэ щIидзащ Къэбэрдей-Балъкъэрым и къэралыгъуэр илъэси 100 зэрырикъур 2022 гъэм Iэтауэ зэрагъэлъэпIэнум теухуа унафэм. Абы ехьэлIа зэхыхьэ нэхъыщхьэхэр мы гъэм фокIадэм и пэхэм ирагъэкIуэкIынущ.