Нобэ

ЩIыр игъущыкIынымрэ уэгъумрэ ебэныным и дунейпсо махуэщ. ООН-м и Ассамблее Нэхъыщхьэм къищта унафэм ипкъ иткIэ ягъэлъапIэ 1995 гъэм къыщыщIэдзауэ.

Исландие Республикэм и къэралыгъуэм и махуэщ
Румынием и лъэпкъ авиацэм и махуэщ
Армением щагъэлъапIэ Авиацэм и махуэр
1565 гъэм Идар Темрыкъуэ и къуэ Мамстрыкъу Москва кIуащ.
1885 гъэм Нью-Йорк кхъухькIэ нэсащ США-р зэрыгушхуэ фэеплъ нэхъ гъэщIэгъуэнхэм ящыщ, а къэралым и дамыгъэ нэхъыщхьэхэм хабжэ Хуитыныгъэм и статуер. Ар америкэ революцэр илъэсищэ щрикъум франджыхэм а къэралым тыгъэ хуащIауэ щытащ.
1925 гъэм къэрал 37-м я лIыкIуэхэм Швейцарием и Женевэ къалэм Iэ щытрадзащ зауэхэм щхъухь зыхэлъ, цIыхур зымыгъэбауэ пкъыгъуэхэр къыщамыгъэсэбэпыным теухуа протоколым.
1930 гъэм япэ тракторыр къыщыщIагъэкIащ Сталинград дэт заводым.
1940 гъэм Горьковскэ областым хыхьэ Мещеры къуажэм «дыжьын уэшх» къыщешхат. XVI-XVII лIэщIыгъуэхэм зекIуа дыжьын ахъшэ жьгъей миным нэблагъэ уэшхым кърилъэсэхат.
1940 гъэм советыдзэхэр Латвиемрэ Эстониемрэ ирашащ.
1941 гъэм Германием IэщэкIэ зэщIэузэда и дзэхэм я унафэщI нэхъыщхьэм унафэ ищIащ мэкъуауэгъуэм и 22-м и пщэдджыжьым «Барбаросса» планыр гъэзэщIэным яужь ихьэну.
1955 гъэм япэу уэгум ихьащ цIыхухэр къызэрырашэкI Ту-104 кхъухьлъатэ лъэщыр.
1961 гъэм Налшык экраныбгъуэ зиIэ «Восток» кинотеатрыр къыщызэIуахащ.
1967 гъэм Китайм щагъэунэхуащ я япэ атомнэ бомбэр.
1903 гъэм къалъхуащ совет усакIуэ, драматург, Лениным и щIыхькIэ ягъэувауэ щыта саугъэтыр зрата Светлов Михаил (и унэцIэ дыдэр Шейнкманщ).
1929 гъэм къалъхуащ СССР-м спортымкIэ щIыхь зиIэ и мастер, дунейм шахматымкIэ и чемпион Петросян Тигран.
1940 гъэм къалъхуащ КъБР-м щIыхь зиIэ и артист, «Кабардинка» ансамблым и къэфакIуэу щыта КIэш Фёдор.
1942 гъэм къалъхуащ Мысырым и вице-президенту щыта, дипломат, жылагъуэ лэжьакIуэ цIэрыIуэ, Нобель и саугъэтыр зрата Мохаммед эль-Барадеи.
1962 гъэм къалъхуащ УФ-м и цIыхубэ артисткэ, Урысейм и Къэрал саугъэтыр тIэунейрэ зыхуагъэфэща Захаровэ Александрэ.

Дунейм и щытыкIэнур

«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус 23 – 24-рэ, жэщым градус 17 - 18 щыхъунущ.

Лъэпкъ Iущыгъэ:
Гъусэ бзаджэ пщIыгъуу мыщэм уемыбэн.