ЗыгъэлъэщынымкIэ дэIэпыкъуэгъухэр

19 июня, 2022 - 13:44

XXV Дунейпсо экономикэ форумым Къэбэрдей-Балъкъэр Республикэмрэ «Промсвязьбанк» ПАО-мрэ зэрызэдэлэжьэнум теухуа зэгурыIуэныгъэ щызэращIылIащ. Абы щыхьэт те­хъуэ дэфтэрым Iэ щIадзащ КъБР-м и Iэтащхьэ КIуэкIуэ Казбекрэ «Промсвязьбанк» ПАО-м и унафэщI Фрадков Пётррэ.

«Къэбэрдей-Балъкъэр Республикэм инвестицэ и лъэны­къуэкIэ и Iуэхухэр зэIузэпэщу щытын папщIэ, щIыналъэ, феде­ральнэ программэхэр, мыхьэнэшхуэ зиIэ проектхэр гъэзэщIэ­- ным хуэгъэза зэгурыIуэныгъэхэр иджыри зэтщIылIэнымкIэ, Iуэхугъуэ пыухыкIахэр дубзыхунымкIэ нобэрей зэгурыIуэныгъэр икъу­кIэ къытщхьэпэжынущ, ар ди зэдэлэжьэныгъэм и лъабжьэ быдэу къоув», - къыхигъэщащ КIуэкIуэ Казбек.
«Къэбэрдей-Балъкъэр Республикэм и социальнэ, экономикэ зэпIэзэрытыныгъэр дэIыгъыным хуэунэтIауэ ягъэзэщIа Iуэху­гъуэхэмкIэ щыIэ зэзыгъэуIу штабым хэтщ ПСБ-р. Шэч къытес­хьэркъым, банкым республикэм хуищIэну кредит-финанс Iуэху­тхьэбзэ зэхуэмыдэхэр абы и экономикэр адэкIи нэхъри гъэлъэ­щынымкIэ дэIэпыкъуэгъу зэрыхъунум», - жиIащ Фрадков Пётр.
ЛъэныкъуитIыр тепсэлъыхьащ адэкIэ зэрызэдэлэжьэнум: ­ПСБ-р хэтынущ социальнэ мыхьэнэшхуэ зиIэ проектхэу респуб­ликэм щагъэзэщIэнухэм, апхуэдэуи дэIэпыкъуэгъу хъунущ иджырей банк технологиехэмрэ инфраструктурэмрэ зегъэу­жьынымкIэ. Зэдэлэжьэныгъэр хуэунэтIауэ щытынущ хьэры­чэ­тыщIэ Iуэху мащIэмрэ курытымрэ кредиткIэ къызэгъэпэщыным, ипотекэр тыншу цIыхухэм яIэрыхьэныр егъэфIэкIуэным. ЗэгурыIуэныгъэм къызэрыщыгъэлъэгъуамкIэ, цIыхухэр псэупIэкIэ къэзэгъэпэщынымкIэ программэр гъэзэщIэнымкIэ ирагъэкIуэкI Iуэхухэм банкыр хэтынущ.
КIуэкIуэ Казбек и телеграм-каналым щыжиIэжащ зэIущIэр зэрекIуэкIамрэ абы кърикIуамрэ икIи банкым и унафэщIым ­фIы­щIэ хуищIащ «ПСБ-р - сабийхэм» урысейпсо спорт проект» со­циальнэ проектым хэту хьэблэ баскетболым и центр яухуэнымкIэ жэрдэм къызэрыхилъхьам папщIэ. Ар Налшык къалэ 2-нэ ­Тамань дивизэм и цIэр зезыхьэ и уэрамым тетынущ. Зэраубзы­хуамкIэ, 2022 гъэм и шыщхьэуIу мазэм и кIэм ирихьэлIэу цент­рыр къызэIуахыну я мурадщ икIи ар хуэгъэпсауэ щытынущ Къэбэр­-дей-Балъкъэр Республикэр къызэрызэрагъэпэщрэ илъэси 100 зэры­рикъум.

  • 10 просмотров
Поделиться: