Турист IэнатIэм зрагъэужь

Санкт-Петербург щекIуэкI XXV Дунейпсо экономикэ форумым хэту КъБР-м и Iэтащхьэ КIуэкIуэ Казбекрэ «Ростуризм»-м и унафэщI ­Догузовэ Заринэрэ лэжьыгъэ IуэхукIэ зэхуэ­-защ. Ахэр тепсэлъыхьащ Къэбэрдей-Балъкъэр Республикэм турист IэнатIэм зегъэужьынымкIэ щыIэ хэкIыпIэхэм.

Туристхэм я бжыгъэр кIуэ пэтми нэхъыбэ зэ­рыхъур къэплъытэмэ, гулъытэ зыхуэщIыпхъэу ­къонэж курортхэм я инфраструктурэр егъэфIэ­кIуэныр, хьэщIэщ пэшхэм къыхэгъэхъуэныр, апхуэдэуи а унэтIыныгъэмкIэ къыхалъхьэ жэрдэм­хэр дэIыгъыныр. Къэбэрдей-Балъкъэр Респуб­ликэм и Правительствэм и унафэкIэ, а Iуэхугъуэ­-хэм сом мелуан 250-рэ хухахащ.
«Мы илъэсым зэрыщIидзэрэ ди деж щыIащ цIыху мин 300-м нэблагъэ, ар нэгъабэ и апхуэдэ лъэхъэнэм зэрыхъуам нэхърэ процент 25-кIэ нэхъыбэщ. Ди щIыналъэр жыджэру хэтщ туризмэм зегъэужьынымкIэ щыIэ программэхэм я нэхъыбэм. Къалэн нэхъыщхьэу къытпэщылъхэм ящыщщ модульнэ хьэщIэщхэр къызэгъэпэщыныр. Ар «Ростуризм»-м и гъусэу дгъэзэщIэну ди мурадщ», - щыжиIащ КъБР-м и Iэтащхьэ КIуэкIуэ ­Казбек и телеграм-каналым.
ЗэIущIэм щытепсэлъыхьащ курортым зыщызыгъэпсэхухэм я шынагъуэншагъэр къызэгъэпэ­щы­ным пыщIа Iуэхухэми. Апхуэдэу бадзэуэгъуэм и 1-м щегъэжьауэ къару игъуэтынущ инструктор-гъуэгугъэлъагъуэхэм, нэгузыужьаплъэхэр къызэзыгъэ­пэщхэм, туристхэр къезышэкI-зэдзэкIакIуэхэм я лэжьыгъэм кIэлъыплъыным теухуа унафэм. «А унафэм къигъэув псори щагъэзэщIэнущ Къэ­бэрдей-Балъкъэрым и курортхэми», - къыхигъэщащ республикэм и Iэтащхьэм.