КъБР-м и Правительствэм и УнафэщIым дыгъуасэ зи чэзу зэIущIэр иригъэкIуэкIащ.
Абы къыщащтащ КъБР-м и Правительствэм и акт щхьэхуэхэм зэхъуэкIыныгъэхэр хэлъхьэным теухуауэ КъБР-м и Правительствэм и унафэм и проектыр. КъБР-м экономикэ зыужьыныгъэмкIэ и министр Рахаев Борис жиIащ законопроектымкIэ зэхъуэкIыныгъэ зэрыхалъхьэр республикэм Къалэн куэд щагъэзащIэ и центрхэм къэрал, муниципальнэ Iуэхутхьэбзэхэр зэрыщыхуащIэм и фIагъым хэгъэхъуэным, апхуэдэуи административнэ мардэхэр нэхъ мащIэ щIынымкIэ комиссэм и къызэгъэпэщыкIэм.
КъищынэмыщIауэ, Рахаевым утыку кърихьащ «Зыуэ щыт федеральнэ хъыбарегъащIэ регистрым къыщыхьахэр зэрагъэбелджылы Iуэхухэр къэщтэным теухуауэ» КъБР-м и Правительствэм и унафэм и проектыр. Къэпсэлъам зэрыжиIамкIэ, федеральнэ регистрым къыщагъэлъэгъуэнущ Урысей Федерацэм щыпсэухэм, хамэ къэралхэм къикIауэ зэпымыууэ ди къэралым щыIэхэм, апхуэдэуи УФ-м щыщу нэгъуэщI къэралхэм щыпсэухэм ятеухуа тхыгъэхэр. Псалъэм папщIэ, абы итынущ цIыхум и цIэ-унэцIэр, адэцIэр, къыщалъхуар, и унагъуэр, дзэ къулыкъум щыIа-щымыIар, нэгъуэщI куэди. Апхуэдэуи «Къэрал Iуэхутхьэбзэхэр» порталым щаIэ напэкIуэцIым зэрихьэфыну- ри абы щIыгъунущ, дэтхэнэми идентификацэ бжыгъэ щхьэхуэ иIэнущ (пхъуэж мыхъуу). Регистрыр зи нэIэ щIэтынур Федеральнэ налог IэнатIэрщ, ар псори зыхуей хуэгъэзауэ ягъэхьэзырын хуейщ 2025 гъэм дыгъэгъазэм и 31 пщIондэ.
Республикэ унафэщIхэр арэзы техъуащ «КъБР-м и Правительствэм и акт щхьэхуэхэм зэхъуэкIыныгъэхэр хэлъхьэнымрэ КъБР-м и Правительст-вэм 2018 гъэм дыгъэгъазэм и 21-м къыдигъэкIа и унафэ №257-ПП-мрэ 2021 гъэм мэкъуауэгъуэм и 18-м къищта унафэ №134-ПП-мрэ къару ямыIэжу къэлъытэным теухуауэ» КъБР-м и Правительствэм и унафэм и проектым.
ЗэIущIэм арэзы щытехъуащ гъуэгухэм ехьэлIа лэжьыгъэхэр 2022 гъэм ягъэзэщIэн папщIэ, республикэ бюджетым къыхэкIыу муниципальнэ щIыналъэхэм субсидиехэр зэрытрагуашэм теухуауэ КъБР-м и Правительствэм и унафэм и проектым. КъБР-м транспортымрэ гъуэгу IэнатIэмкIэ и министр ДыщэкI Аслъэн жиIащ субсидиехэр зратыну муниципальнэ щIыналъэхэм щыхэплъэм къызэралъытар нэхъапэIуэкIэ хуаутIыпща ахъшэр къызэрагъэсэбэпа щIыкIэр, абы тещIыхьауэ Налшык къалэ округыр къызэрыхахар.
Республикэ унафэщIхэр арэзы техъуащ УФ-м Узыншагъэр хъумэнымкIэ и министерствэм, ФIэкIыпIэ зимыIэ медицинэ страхованэмкIэ федеральнэ фондым, КъБР-м и Правительствэм медицинэ дэIэпыкъуныгъэр пщIэншэу цIыхухэм къызэрыхузэрагъэпэщ щIыналъэ программэр 2022 гъэм, 2023 - 2024 гъэхэм зэрагъэзэщIэнум теухуа я зэгурыIуэныгъэм и проектым.
ЗэIущIэм къыщащтащ «Къэбэрдей-Балъкъэрым и щэнхабзэр» КъБР-м и къэрал программэм зэхъуэкIыныгъэхэр хэлъхьэным и IуэхукIэ» КъБР-м и Правительствэм и унафэм и проектыр.
- Дэфтэрым хэтлъхьэ зэхъуэкIыныгъэхэр зэхьэлIар КъБР-м и Iэтащхьэм театр гъуазджэм хухих ахъшэ саугъэтыр зратым и бжыгъэр 3-м къыщыщIэдзауэ 4-м нэгъэсынырщ. Ухуэныгъэ лэжьыгъэм къыщагъэсэбэпхэм я уасэм зэрыхэхъуар къэлъытауэ, щэнхабзэмкIэ IуэхущIапIэхэр зэгъэпэщыжыным УФ-м и Правительствэм и гъэтIылъыгъэ фондым щхьэхуэу къыхухигъэкIащ сом мелуани 9-рэ мин 746,75-рэ. Ар зыхуэгъэзар Налшык къалэм дэт НыбжьыщIэ театрыр зэгъэпэщыжынырщ.
- 2022 гъэм «Моя провинция» урысейпсо фестивалыр зэрекIуэкIынум зыхуэгъэхьэзырынымкIэ къызэгъэпэщакIуэ комитетым хэтхэр убзыхуным теухуауэ КъБР-м и Правительствэм и унафэм къыщыгъэлъэгъуахэр гъэзэщIэным хыхьэу, ди мурадщ телевиденэм щытрах фильмхэмрэ нэтынхэмрэ я 23-нэ урысейпсо зэхьэзэхуэр едгъэкIуэкIыну, ар Къэбэрдей-Балъкъэрыр къызэрыунэхурэ илъэси 100 щрикъум ирихьэлIэу къызэдгъэпэщыну. Абы къыхэкIыу къыхэтлъхьа проектымкIэ бюджет ахъшэр щIэрыщIэу ятыдогуэшэж «Къэбэрдей-Балъкъэрым и щэнхабзэ», «Хъыбархэм елэжь жылагъуэ» къэрал программэхэм, - жиIащ КъБР-м щэнхабзэмкIэ и министр Къумахуэ Мухьэдин.
КъБР-м и Правительствэм и унафэм и проектищыр теухуауэ щытащ КъБР-м къарукIэ зэщIэузэда и IэнатIэхэм я лэжьакIуэхэм ящыщу Донбассым щекIуэкI Iуэхухэм я къалэн щагъэзащIэу фэбжь зыгъуэтахэм, гугъуехь хэхуахэм ахъшэкIэ защIэгъэкъуэным. КъБР-м лэжьыгъэмрэ социальнэ дэIэпыкъуныгъэмкIэ и министр Асанов Алим зэрыжиIамкIэ, дэфтэрхэр ягъэхьэзыращ КъБР-м и Iэтащхьэмрэ Правительствэм и УнафэщIымрэ я пщэрылъкIэ.
ЗэIущIэм къыщащтащ «КъБР-м и туризмэм зегъэужьыным хуэгъэзауэ субсидиехэр зэрат щIыкIэм арэзы техъуэным теухуауэ» КъБР-м и Правительствэм и унафэм и проектыр.
- УФ-м и Правительствэм 2022 гъэм накъыгъэм и 22-м къыдигъэкIа унафэм тету, федеральнэ бюджетым къыхэкIащ республикэм и туризмэм ехьэлIа инфраструктурэр егъэфIэкIуэным теухуа жылагъуэ жэрдэмхэр ядэIыгъыным хуэгъэзауэ сом мелуан 62-рэ, кемпингхэмкIэ къызэгъэпэщыным - сом мелуан 84-рэ, туризм инфраструктурэм зегъэужьынымкIэ къэрал программэхэр гъэзэщIэным - сом мелуани 108-рэ. Дэфтэрым къыщыдгъэлъэгъуащ ахъшэ зыхухах Iуэхухэмрэ субсидиехэр къэзыхьынухэр зэрагъэбелджылы щIыкIэмрэ, - къыхигъэщащ КъБР-м зыгъэпсэхупIэхэмрэ туризмэмкIэ и министр ЩоджэнцIыкIу Мурат.
