Унафэхэм хоплъэж

КъБР-м и Правительствэм хэтхэм я зи чэзу зэIущIэ иригъэкIуэкIащ Мусуков Алий. Абы хэтащ КъБР-м и Прави­тельствэм и УнафэщIым и къуэдзэхэу Къуныжь МуIэед, Хъубий Марат, УФ-м и Президентым и лIыкIуэу Ипщэ Федеральнэ округым щыIэм и аппаратым и федеральнэ инспектор нэхъыщ­хьэу ­КъБР-м щыIэ Мэкъуауэ Тимур сымэ. 

ЗэIущIэм Iуэхугъуэ 15-м щIигъу щызэпкърахащ, зэхъуэкIыныгъэхэр халъхьащ Правительст­вэм и Унафэ зыбжанэм я проектхэм. 
КъБР-м экономикэ зыужьыныгъэмкIэ и министр­ Рахаев Борис Къэбэрдей-Балъкъэр Рес­публикэм «Информационное общество» и къэрал программэм зэхъуэкIыныгъэхэр хэлъ­хьэн зэрыхуейм теухуа законым и проектыр ­утыку кърихьащ. Министрым къызэрыхигъэщамкIэ, ар зэпхар тхьэмахуэ къакIуэ «Моя провинция» къыхуеджэныгъэм щIэту, Телевизионнэ ­фильм­хэмрэ нэтынхэмрэ я XXIII урысейпсо фес­тиваль, Радиом и XVI урысейпсо фестиваль, Прессэм и XVI урысейпсо фестиваль Налшык къалэ къызэрыщызэрагъэпэщынум, зэ­рыщ­рагъэкIуэкIынум текIуэдэну мылъкур къы­хагъэ­кIын хуейщи аращ. 
«Къэбэрдей-Балъкэр Республикэм и бюджетым къыхэкIыу «КъБР-м и ШэсыпIэ фонд» мыкоммерцэ зэгухьэныгъэм субсидие етыным теухуауэ щыIэ правительствэ унафэм зэхъуэ­кIыныгъэ хэлъхьэн зэрыхуейм и гугъу ищIащ Рахаевым. Ар ди республикэр мы гъэм «Производительность труда» лъэпкъ проектым зэры­хы­хьам епха Iуэхущ. Республикэ мылъкум къы­хэкIыу «КъБР-м и ШэсыпIэ фондым» сом ме­луани 6,5-рэ хуаутIыпщынущ, лъэпкъ проектыр гъэзэщIэным трагъэкIуэдэну. 
КъБР-м лэжьыгъэмрэ социальнэу къащхьэ­щыжыныгъэмкIэ и министр Асанов Алим правительствэ зэIущIэм хэтхэм я пащхьэ кърихьащ цIыхухэм ядэIэпыкъуным пыщIа Iуэхугъуэ зыбжанэ. Ахэр КъБР-м и Iэтащхьэм ищIа унафэм тету, унагъуэ хуэмыщIахэмрэ Донбассым щекIуэкI дзэ Iуэху хэхахэм хэтхэм я унагъуэхэмрэ къэрал дэIэпыкъуныгъэ етыным епхащ. Асановым зи гугъу ищIа Iуэхугъуихри къызэдащтащ. 
ЗэIущIэм и кIэухым Къэбэрдей-Балъкъэр Республикэм и Правительствэм и фIыщIэ тхылъхэр иратащ мы махуэхэм зи илъэсищэр зыгъэлъэпIа Архив къулыкъущIапIэм и лэжьакIуэ пашэхэм. Абыхэм ехъуэхъуащ Мусуков Алий икIи къызэ­рызэрагъэпэщрэ зы лIэщыгъуэ хъуа къэрал IуэхущIапIэм ди республикэм ис лъэпкъхэм я дежкIэ мыхьэнэшхуэ зэриIэр, ди блэкIам теухуа дэфтэр, сурэт, тхыгъэ куэд зыхуей хуэзэу зэрыщахъумэр жиIащ.