КъБР-м и Правительствэм хэтхэм я зи чэзу зэхыхьэ иригъэкIуэкIащ абы и УнафэщI Мусуков Алий. ЗэIущIэм хэтащ КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и Правительствэм и УнафэщIым и къуэдзэ Хъубий Марат, УФ-м и Президентым и лIыкIуэу Ипщэ Федеральнэ округым щыIэм и аппаратым и федеральнэ инспектор нэхъыщхьэу КъБР-м щыIэ Мэкъуауэ Тимур сымэ.
ЗэIущIэм Iуэхугъуи 9-м щыхэплъащ, зэхъуэкIыныгъэхэр халъхьащ Правительствэм и унафэ зыбжанэм я проектхэм.
Нэхъыщхьэу зи гугъу ящIахэм ящыщщ Къэбэрдей-Балъкъэрым и бюджетыр 2022 гъэм и япэ илъэс ныкъуэм зэрагъэзэщIам теухуа правительствэ унафэм и проектыр. КъБР-м финансхэмкIэ и министрым и къуэдзэ Калабеков Азэмэт зэрыжиIамкIэ, къызэднэкIа илъэс ныкъуэм республикэм хэхъуэу иIащ сом мелард 27,6-рэ. Ар 2021 гъэм и япэ илъэс ныкъуэм диIам нэхърэ процент 26-кIэ нэхъыбэщ.
- Республикэ бюджетым и хэхъуэр илъэс псом тещIыхьауэ къапщтэмэ, мазих блэкIам процент 52,6-кIэ къыдэхъулIащ. Налог хэхъуэр процент 52-рэ мэхъу, ар ахъшэу сом меларди 7-м щIегъу. Республикэм ахъшэу къигъэсэбэпам и гугъу пщIымэ, ар сом мелард 27,4-рэ хъуащ.
Езым ди хэхъуэмрэ дотацэмрэ я фIыгъэкIэ - сом мелард 15,3-рэ, къытхуаутIыпщ ахъшэмрэ федеральнэ мылъкум къыхэкIамрэ сом мелард 12,1-рэ мэхъу. Къэдгъэсэбэпа мылъкум щыщу къытхуаутIыпщамрэ федеральнэ бюджетым къыхэкIамрэ – сом мелард 12,1-рэ мэхъу. Къытхэхъуамрэ къэдгъэсэбэпамрэ зэплъытмэ, къытхэхъуар сом мелуани 192-кIэ нэхъыбэщ.
КъБР-м лэжьыгъэмрэ цIыхухэм социальнэу къащхьэщыжынымкIэ и министр Асанов Алим правительствэ зэIущIэм хэтхэм я пащхьэ кърихьащ Донбассым щекIуэкI дзэ Iуэху хэхахэм хэту уIэгъэ хъуахэмрэ хэкIуэдахэмрэ я унагъуэхэм къэрал дэIэпыкъуныгъэ етыным теухуауэ КъБР-м и Iэтащхьэм ищIа унафэр зэрагъэзэщIэну щIыкIэр. Асановым зи гугъу ищIа IуэхугъуиплIри даIыгъащ.
ЗэIущIэм и кIэухым КъБР-м и Iэтащхьэм и Администрацэм и УнафэщI Къуэдзокъуэ Мухьэмэд и пщэ къралъхьа къалэн гуапэр зэфIигъэкIащ – Урысей Федерацэм и Жылагъуэ палатэм и фIыщIэ тхылъыр КъБР-м и Правительствэм и УнафэщI Мусуков Алий къыхуагъэфэщати, иритыжащ.
