Къэрал унафэм тету

Къэбэрдей-Балъкъэрым и Iэтащхьэ КIуэ­кIуэ Казбек КъБР-м и Правительствэм и Унэм дыгъуасэ щригъэкIуэкIащ КъБР-м Экономикэ, жылагъуэ зыхъумэжыныгъэмкIэ и со­ветым и зэхуэс ин. Абы къыщаIэта Iуэхугъуэ нэхъыщхьэхэм ящыщщ Урысей Федерацэм и Президент Путин Владимир къэралым и цIыхухэр хэхауэ дзэм ираджэным теухуауэ ищIа унафэр щIыналъэм щыгъэзэщIэныр.

ЗэIущIэм хэтащ КъБР-м и Парламентым и УнафэщI Егоровэ Татьянэ, КъБР-м и Прави­тельствэм и УнафэщI Мусуков Алий, УФ-м и ­Президентым Кавказ Ищхъэрэ федеральнэ щIыналъэм щиIэ Полномочнэ лIыкIуэм и ап­паратым и федеральнэ инспектор нэхъыщхьэ Мэкъуауэ Тимур, КъБР-м и дзэ комиссар подполковник Пахомов Дмитрий, республикэм и министерствэхэм я пашэхэр, щIыпIэ администрацэхэм я Iэтащхьэхэр, хабзэхъумэ, кIэ­лъыплъакIуэ, IэщэкIэ зэщIэузэда къарухэм я лIыкIуэхэр.
Зэхуэсым зэрыщыжаIамкIэ, дзэм ираджахэм я япэ гупыр дыгъуасэ яшащ зыщагъэсэну, Iуэхум щыхуагъэхьэзырыну щIыпIэм. ЩIыналъэм и гъэзэщIакIуэ органхэр, щIыпIэхэм унафэ щызезыгъакIуэхэр дзэ комиссариатхэм ядэла­жьэ зэпытщ. Унафэ псори къащтэ, властым и федеральнэ IэнатIэхэу ди республикэм щыIэ-хэм я пашэхэмрэ республикэм и дзэ комисса­риатымрэ я гъусэу.
- Дзэм ираджа цIыхухэм зэгурыIуэныгъэкIэ къулыкъур езыхьэкIхэм социальнэ и лъэны­къуэкIэ яIэ шэсыпIэхэм хуэдэ къратынущ. Къэбэрдей-Балъкъэрым икI зауэлIхэмрэ абыхэм я унагъуэхэмрэ социальнэ дэIэпыкъуныгъэ етыным хуэгъэза Iуэхугъуэхэр мыгувэу щIыналъэм къыщызэдгъэпэщынущ, - жиIащ КIуэкIуэ Казбек.
Республикэм и Iэтащхьэм щIыпIэ унафэщI-хэм къалэн ящищIащ дзэм ираджэхэм я адэ-анэ­хэм, Iыхьлыхэм пыщIэныгъэ сыт щыгъуи ­хуаIэу лэжьэну, ахэр зыгъэпIейтей Iуэхугъуэхэр ягъэ­тэмэмын, я упщIэхэм жэуап иратын папщIэ.