Донбассым къыхихыр Къэбэрдей-Балъкъэрым къыдищтэнущ

 КIуэкIуэ Казбек Донецк, Луганск цIыхубэ республикэхэм, Херсон, Запорожье областхэм щыпсэухэм а щIыналъэхэр Урысей Федерацэм гухьэным теухуауэ референдум ирагъэкIуэкIыну мурад зэращIар зэрадиIыгъыр къигъэнэIуащ. IэIэтым нышэдибэ (фокIадэм и 23-м) сыхьэти 7-м щIидзауэ, фокIадэм и 27 пщIондэ екIуэкIынущ. ЩIыналъэхэм ис цIыхубэм я гукъыдэжыр къызэрагъэлъагъуэ щIыкIэр дунейпсо мардэмрэ ООН-м и уставымрэ тету йокIуэкI.

«Дэ дуней псом и гулъытэр зыхуэгъэза, тхыдэр лъэны­къуэщIэкIэ зыунэтI къэхъукъащIэм дыхиубыдащ икIи дри­щыхьэтщ. Донецк, Луганск цIыхубэ республикэхэмрэ Хер-         сон, Запорожье областхэмрэ щыпсэухэмрэ я унэ екIуэ­лIэжыну, лъэпкъ куэду зэхэт Урысей щэджащэм щыщ хъужыну хуейщ. Дунейм щекIуэкI политикэми, экономикэми зэ­рызихъуэжым лъабжьэ хуэхъу, къэгъазэ зимыIэж къэхъу­къащIэ ин дыдэхэм я щапхъэщ ар. ИкIи а Iуэху мытыншым ­Урысейр текIуэныгъэр и Iэпэгъуу хэтщ!» - жиIащ КIуэкIуэ Казбек.
КъБР-м и унафэщIым къыхигъэщащ: «Референдумым ­щIимыдзэ щIыкIэ, къухьэпIэ политикхэм япэ зыкърагъэщри, абы къигъэнэIуэнухэр къабыл зэрамыщIынур ягъэIуащ, Урысейм Iэщэр къыхуагъэдалъэу. Ауэ щыхъукIэ, украин щIэп­хъаджащIэхэм цIыхубэ мамырым псэупIэ иратыркъым, яу­кIахэмрэ уIэгъэ ящIахэмрэ я бжыгъэр хохъуэ, сабийхэри яхэту. А гупым къагурыIуэркъым илъэси 8 хъуауэ я Iэщэм имыгъэIурыщIэфа Донбассыр зыми зэрыщымышынэжыр. Псэуну зэрыхуитырщ абыхэм къыхахыр, апхуэдэ хуитыныгъэ яIэщ. ИкIи цIыхухэм ди къэралым щыщ хъуну гукъыдэж зэращIар, УФ-м къыгухьэну зэрыхуейр къагъэлъагъуэмэ, урысей цIыхубэми ар ядиIыгъынущ».
ЩIыналъэм и унафэщIыр тепсэлъыхьащ референдумым и екIуэкIыгъуэр Урысей армэм «хуит ящIыжа щIыпIэхэр ­ихъумэу, ди къуэшхэм мамыр гъащIэ зэтраухуэнымкIэ зы­щIигъэкъуэн папщIэ», хэхауэ дзэм щраджэ пIалъэм зэрыте­хуам.
 «Хэхауэ дзэм ираджэн Iуэхур ди республикэми щокIуэкI. Дэ дыдоIыгъ ди Президент Путин Владимир Владимир и къуэм и дэтхэнэ унафэри. Зауэ Iуэху щхьэхуэм зэрыщIидзэрэ, ­лIыгъэмрэ хахуагъэмрэ я щапхъэ ди зауэлIхэм Iэзагъ къагъэлъагъуэу яхъумэ Урысейм и шынагъуэншагъэмрэ Дон-         бас­сым щыщ цIыхубэ мамырымрэ.
Къэбэрдей-Балъкъэрыр псапэхуэщIэ лэжьыгъэхэми жы­джэру хэуващ. ЩIыналъэм иджыри зэпигъэуакъым цIы­хубэмрэ дзэм хэтхэмрэ ядэIэпыкъун Iуэхур, ахэр зыхуейхэр яхуэ­зышэ машинэхэр яутIыпщ зэпытщ. Херсон областым хыхьэ Скадовскэ щIыналъэм социальнэ ухуэныгъэхэмрэ инфраструктурэмрэ щызэфIэувэжынымкIэ дыдоIэпыкъу, щIы­пIэр къэралым къыбгъэдэкI дэIэпыкъуныгъэм пыщIа, и цIыхубэр хъума хъун папщIэ», - жиIащ  КIуэкIуэ Казбек, хуит ящIыжа щIыналъэхэм зэракъуэтыр къыхигъэщу.