УФ-м и цIыхубэ артист, театрымрэ киномрэ я актёр ТIыхъужь Алий къызэралъхурэ илъэси 105-рэ ирокъу.
Луначарскэм и цIэр зэрихьэу Москва дэт институтыр къиухыу Къэбэрдей-Балъкъэрым къигъэзэжа иужь, Къэбэрдей драмэ театрым лэжьэн щыщIидзат. Езы Алий и мызакъуэу, адыгэ театрым дежкIэ гъащIэщIэм, лъэбакъуэщIэм и щIэдзапIэт ар. Дауи, лъэпкъ театрыр куэдкIэ нэхъ къулейсызу щытынут, а артист телъыджэр хэмытамэ. Абы игъэзэщIа роль бжыгъэншэхэм ящыщу дэтхэнэри гулъытэ зыхуэщIыпхъэщ, дэтхэнэми образ нэс къыхищIыкIащ. тIыхъужь Алий артист Iэзагъыу хэлъам щымыгъуазэ зы адыги щыIэу къыщIэкIынкъым, абы къыдэкIуэу а артистым хэлъа цIыхугъэ иным теухуауэ и ныбжьэгъухэмрэ лэжьэгъухэмрэ жаIэжым гур хагъахъуэ. И актёр зэфIэкIым зыкIи емыфэгъуэкI цIыхугъэ, зэхэщIыкI, акъылыфIагъ бгъэдэлъащ.
ЩоджэнцIыкIу Алий и цIэр зезыхьэ Къэбэрдей къэрал драмэ театрым и гугъу щащIкIэ, япэу уи нэгу къыщIэувэр абы илъэс куэдкIэ щылэжьа артист телъыджэхэу ТIыхъужь Алийрэ ДыщэкI КIунэрэщ. Пэжщ, адыгэм артистыфIхэмкIэ Тхьэр къытхуэупсат, ауэ а тIум хуэдэу гуимыхужу лъэпкъ театрыр зыгъэбжьыфIар зырызщ. ТIыхъужьым и гушыIэхэр цIыхубэм къахуэнауэ нобэми кърахьэкI. Ар и теплъэкIи, хьэлкIи, псэлъэкIэкIи зэрыщыту театрым къыхуигъэщIам хуэдэт. Алий утыкум щыджэгуртэкъым, щыпсэурт, дунейм къызэрыгуэкIыу зэрытетым хуэдэу, утыкум къихьэрти, пэшым щIэсхэм зэм я гум къишхыдыкIырт, зэм я щыуагъэхэм гу лъаригъэтэжырти, а псори гушыIэм хуигъэкIуэжу, псэкIэ гъунэгъу яхуэхъурт. ГушыIэм къаруушхуэ зэриIэм псори дыщыгъуазэщ, ауэ а гушыIэр зытхым хилъхьэ къарум хуэдитI къэзыIуатэм дыщIегъуж. Алий мэгъу къару гуэр хэлъым хуэдэу, пэшым щIэсхэм я гулъытэр зэщIишэрт. ЗыцIыхуу щытахэм зэрыжаIэмкIэ, ар гушыIэшхуэ зыхэлъ цIыхут, арагъэнт абы апхуэдизу дахэу и ролхэр щIигъэзащIэр. Насыпыр куэду егуэш, ауэ артист насыпыр сыт жыпIэмэ, ар цIыхубэм зэхащIыкIыу фIыуэ ялъагъунырщ. ТIыхъужь Алий и зэфIэкI лъагэм, артист насыпым и щыхьэтщ абы и цIэр ноби зэрыпэрытыр, игъэзэщIа ролхэм траха видеонэтынхэм къытрагъэзэжурэ цIыхухэр зэреплъыр, еплъыхукIи, я гукъыдэжыр къызэриIэтыр.
Илъэс 30-м щIигъуауэ «Ныбжьэгъухэм я гушыIэ» («Улыбка друзей») фIэщыгъэм щIэту гъэ къэс ди щIыналъэм щрагъэкIуэкI ТIыхъужь Алий и цIэр зезыхьэ фестиваль, ауанымрэ гушыIэмрэ я махуэм, мэлыжьыхьым и 1-м, техуэу. Абы кърагъэблагъэ Кавказ Ищхъэрэм и театрхэм я артист пажэхэр.
Къэбэрдей-Балъкъэр Республикэр къызэрызэрагъэпэщрэ илъэси 100 щрикъум, Урысейм ис лъэпкъхэм я щэнхабзэм и Iэужьым и илъэсым, РСФСР-м, КъБАССР-м я цIыхубэ артист ТIыхъужь Алий къызэралъхурэ илъэси 105-рэ щыхъум ирихьэлIэу, ТIыхъужь Алий и цIэр фIащащ Нартан дэт ЩэнхабзэмкIэ унэм.
ТIыхъужь Алий и цIэр лъэпкъым игъэлъапIэр, и Iэужьыр ихъумэр пэжщ. Абы и цIэр нобэми дэ къытхэзыгъэтыр и лэжьыгъэм хуиIа лъагъуныгъэрщ, ирихьэлIа къару иным и джэрпэджэжырщ.
