ЛъэхъэнэщIэ къытпоплъэ

2014 гъэм иужькIэ ди къэралым къыщыхъуахэм куэдым урагъэгупсыс. Псом япэу абыхэм дезыхулIэри мы упщIэ къызэрыгуэкIырщ: дэ дагъэлъэщыну КъухьэпIэм зэкIэлъыкIуэу, зым нэхърэ адрейр нэхъ ткIиижу къытхуигъэув санкцэхэм? Абы ират жэуапхэр зэщхьэщокI, арщхьэкIэ я мыхьэнэкIэ зэтохуэ: дэ а удынхэм дапэщIэтыфынущ, гугъу дехьми. ЕпIэщIэкIыу къыщIагъэкIыу щIадзэ ди жагъуэгъу къэралхэм къытпаубыда хьэпшыпхэр, пкъыгъуэхэр, машинэхэр, н.къ. Хэбгъэзыхьмэ, дызыхуэкIуэ илъэсым цIыху къызэрырашэкI кхъухьлъатэхэр ящIу щIадзэжынущ Ар хъарзынэщ, ауэ нэгъуэщI упщIи къыкъуокI: дэнэ атIэ ахэр иджыри къэс здэщыIар? Блыным натIэкIэ уеуэн хуей ар зэригъэузынур къэпщIэн папщIэ?
Сигу ихужыркъым Урысейм и Совет Нэхъыщхьэм и УнафэщIу щыта Хасбулатов Руслан къиIуэтэжауэ щытар: «Правительствэ сыхьэтым» къедгъэблэгъат УФ-м финанхэмкIэ и министр Ковалев Валентин. Депутатхэм ящыщ зыр щIэупщIащ: «Мэкъумэш IэнатIэм сыт хуэдэ зыужьыныгъэ игъуэтыну?» И жэуапым псори къигъэуIэбжьащ икIи игъэдыхьэшхащ: «Дэ абы зедгъэужьын Iэху зетхуэнукъым. Дыхуейкъым -щIыдагъэмрэгазымрэ къыщIэтхыр дрикъунущ». Дыхьэшхыным и пIэкIэ, къэпсэлъапIэм ирахуу щIахун хуеящ апхуэдэ IэщIагъэлIыр».
Ауэ зэрыжиIам хуэдэу хъуащ: фабрикэ, завод минхэр зэхуищIыжащ, губгъуэхэр зэщIэкIэжащ. Къэунэхуа «реформатор ныбжьыщIэхэм къэралым экономикэр ирагъэтIысэхащ. Иджы ахэр къанэ щIагъуэ щымыIэу утыкум икIыжащ, ауэ я Iэужьхэр къэнащ. Аращ дэ зызыужьа къэралхэм я экэномикэм депха щIэхъуар. ДыщифIым щыгъуэ абы гу лъыттэртэкъым, иджы, мис дыIууащ.
Пэжщ, дунейм зы къэрали теткъым езым ей закъуэкIэ псэууэ. АрщхьэкIэ къищэхур нэхъыбэхукIэ и Iуэхухэр нэхъ йокIакIуэ.
Зы щапхъэ закъуэ дэ нэхъ тпэгъунэгъуу. Куэд щIакъым ди жагъуэгъу ерухэм иджы яхыхьа Польшэм и деж мыIэрысэхэр куэду къыщытщэхуу зэрыщытар. Я гугъу тщIыххэнкъым нэгъуэщI ерыскъыхэкIхэм. Абы щыгъуэми, колхозхэр зэхакъутэжати, къуажэдэсхэр Iуэхуншэт. Хьэуэ, зыгуэрхэм елэжьырт, арщхьэкIэ кърахьэлIэм текIуадэр нэхъ лъапIэти, нэгъуэщI къэралхэм кърашхэм уасэкIэ япэхъуртэкъым. Тыкуэнхэм Iаххэр, зэрыгурыIуэгъуэщи, нэхъ пудхэрт.
Ди къэралхэр зэрызыщыIейуэ, къэралым и гупэр хуигъэзащ мы IэнатIэм: теплицэхэр яухуащ, жыгхэр хасащ. А лэжьыгъэр иджыри и гуащIэгъуэу йокIуэкI. АтIэ, слIожь? Ди Къэбэрдей-Балъкъэрым и закъуэ къет ди къэралым пхъэщхьэмыщхьэу къыщрахьэлIэм и Iыхьэ щанэр. Хадэхэр зэрахьэ дунейм щынэхъыфI пщалъэхэм къакIэрымыхуу. Нэхъыщхьэращи, иджы гулъытэшхуэ хуащI хъуащ хъумапIэхэри ухуэным.
АтIэ, алъандэрэ дэнэ здэщыIар? Мыпхуэдэ зэфIэкIым лъэIэсын папщIэ ди къэралитIыр зэщыIеин хуейт.
 «ГъущI куэбжэ зиIэ гъущI мастэ щощIэ», - жаIэ. СССР-м и зэманым къэралым зэригъакIуэрт псори: танкхэм къыщыщIэдзауэ иджы къамыгъэсэбэпыж хьэфэтегъэкIхэм нэсу. Иджы дэ диIэщ хьэрычэтыщIэ лэжьыгъэ курытми мащIэми пэрыт цIыхухэр. Абыхэм ягъэхьэзырыфынущ цIыхухэр махуэ къэс зыхуей хъу куэд. Дауи, металлургиер, энергетикэр машинэхэр щIыныр, щIэныгъэ къэхутэныгъэхэр егъэкIуэкIыныр зи пщэ дэлъын хуейр езы къэралырщ, абы ахэр къыхуренэж, ауэ хьэрычэтыщIэхэр хуит хуащIын я къару дэхуэнухэр. ИтIанэ ди тыкуэнхэм щIэлъынур ди цIыхухэр къыщIагъэкIхэрщ. Ар ищхьэмкIэ къащыгурыIуэжауи къыщIэкIынущ.

Поделиться:

Читать также: