IуэхущIапIэм и оркестрыр

Музыкэ театрыр – илъэс 55-рэ!

Музыкэ театрым и оркестрыр лъэщщ, иджыпсту цIыху 35-38 хэтщи, мыр мыхьэнэншэщ, зыпэрыт Iуэхум фIыуэ хищIыкIыркъым хужыпIэну зы цIыхуи щылажьэркъым. Илъэс куэдкIэ абы и дирижёр нэхъыщхьэу щыта Щэбэтыкъуэ Натбий иужькIэ а къулыкъур хуагъэфэщауэ зыхуей хуэзэу зэрехьэ Щэбэтыкъуэ Заур. IэнатIэ куэдми хуэдэу гукъеуэ нэхъ ин дыдэу яIэр я улахуэр зэрымащIэмрэ абы и зэранкIэ музыкэ школ къэзыух куэд я IэщIагъэм зэрыримылажьэмрэщ.

Оперэхэмрэ опереттэхэмрэ я закъуэкъым оркестрыр зэлэжьыр, сыт хуэдэ концерти хуэщIынущ, хуэгъэдэхэнущ. Узэрыгушхуэ хъун защIэщ Iуэху дахэ зылэжь гупым хэтхэр, ауэ псом хуэмыдэжщ илъэс куэд щIауэ зи лэжьыгъэм хуэпэжхэу Вялкэ Сергей, Лэфыщ Катеринэ, Брухно Ольгэ, Къущхьэ Аслъэн, Атэлыкъ Къэралбий сымэ.

ГурыфIыгъуэхэм къыдэкIуэу уигу щIэныкъуэн гукъеуи яIэщ оркестрым хэтхэм. Псалъэм папщIэ, макъамэ Iэмэпсымэхэр ярикъуркъым. ИтIанэ, ахъшэ нэхъыбэ къыщахьри, музыкантхэм ящыщ куэд ди республикэм и къэрал филармонием щылажьэмэ нэхъ къащтэ. Ар икIи гурыIуэгъуэщ: псэун, я унагъуэр япIын хуейкъэ?!

Зытхыжар КIУЭКIУЭ ХьэIишэтщ.
Поделиться: