Республикэм и зауэлIхэр щыгъупщэркъым

Къэбэрдей-Балъкъэрыр яужь итщ зауэ Iуэху щхьэхуэм хэтхэм хурагъэшэну псапэхуэщIэхэм. 

КIуэкIуэ Казбек иригъэкIуэкIащ иджыблагъэ езыр зылъыгъуэза, зауэ Iуэху щхьэхуэм хэт ди щIалэхэмрэ республикэр зыдэIэпыкъу Херсон областым щыпсэухэмрэ я Iуэху зыIутым щытепсэлъыхьа зэIущIэ. Абы хэтащ КъБР-м и Правительствэм и УнафэщIым и япэ къуэдзэ Къуныжь МуIэедрэ Правительствэм и УнафэщIым и къуэдзэ Хъубий Маратрэ. 
Республикэм и Iэтащхьэм унафэ ищIащ зауэлIхэмрэ абыхэм я командирхэмрэ къызэрелъэIуа псори зэрагъэпэщыну. Мыгувэу ахэр зыхуэныкъуэ машинэхэри, Iэмэпсымэхэри, хьэпшыпхэри хьэзыр хъунущ. Респуб­ликэм зэрегъэпэщ абы иригъэшэну ерыскъыхэкIхэр, псыхэр, хьэпшыпхэр, медицинэ хуэIухуэщIэхэр, зыхуэныкъуэ нэгъуэщI зыгуэрхэр. 
«Мэрем кIуам дгъэхьэзыра псапэхуэщIэхэр ди щIалэхэм яIэрыхьакIэщ. Псоми ди зэхуэдэ а къалэн лъапIэм хьэрычэтыщIэхэри, къулыкъущIэхэри, цIыхубэри, цIыху щхьэхуэхэри хэпщIауэ къокIуэкI. ЗыкъытщIэзыгъэ­къуахэм, ди лIыхъужьхэм ди къэралыр яхъумэну ядэIэ­пыкъу псоми фIыщIэ яхузощI», - жиIащ КIуэкIуэ Казбек. 
Республикэм и Iэтащхьэр къулыкъущIэхэм епсэлъащ Херсон областым хыхьэ Скадовск, Каланчак, Голопристанск муниципальнэ щIыналъэхэм зэрадэIэпы­къуну щIыкIэм теухуауи. КIуэкIуэ Казбек нэхъ пасэу щIыпIэ администрацэхэм я унафэщIхэм щаIущIам щыгъуэ, ахэр дызэрыт зэманым нэхъ зыхуэныкъуэхэр яубзыхуауэ щытащ. 2023 гъэм и кIуэцIкIэ инфраструктурэр зэрагъэпэщыжынущ, мыхьэнэ зиIэ IуэхущIапIэхэри зыхуей ­хуагъэзэжынущ.