КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ зэмылIэужьыгъуэхэм щытепсэлъыхьа зэIущIэ.
КъБР-м и инфраструктурэ проектым теухуауэ ялэжь Iуэхухэм зэхъуэкIыныгъэхэр зэригъуэтым и гугъу ищIащ КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим. Ар теухуауэ щытащ УФ-м и федеральнэ мылъкум щыщу инфраструктурэ проектхэр ягъэзэщIэн папщIэ щIыналъэхэм 2023 гъэм трагуэшэну бюджет кредитым. Министрыр къытеувыIащ КъБР-м къат куэду зэтет унэхэр зыхуей хуэгъэзэнымкIэ щыIэ программэм игъуэта зэхъуэкIыныгъэхэм. ЩIыналъэ программэм хагъэкIыжащ кхъахэ хъуауэ къалъыта унитху, апхуэдэуи, фэтэритху нэхъыбэ зыхэмыт унэ зэтет 56-рэ. Программэм щIэуэ хагъэхьащ къат куэду зэтет унэ 54-рэ.
2017 гъэм щIышылэм и 1-м щегъэжьауэ 2022 гъэм щIышылэм и 1-м къриубыдэу кхъахэу къалъыта къат куэду зэтет унэхэм я бжыгъэм зэрызихъуэжми тепсэлъыхьащ министрыр. Кхъахэ хъуа унэхэм я фондым къыхэхъуэнущ метр зэбгъузэнатIэ 1862,6-рэ: Янтарнэ къуажэм щыIэ къат куэду зэтет унитIрэ Псыкуэд щыIэ зы унэрэ. Абыхэм щопсэу цIыхуи 132-рэ. Зыри зыщымыпсэу фэтэрхэр кхъахэ хъуа унэхэм зэрахэтым къыхэкIыу, фондым хагъэкIыжащ метр зэбгъузэнатIи 109,7-рэ. Кхъахэ хъуа унэхэм я фондым хэту къабжащ унэ 63-рэ. Ар метр зэбгъузэнатIэ 32361-рэ мэхъу.
Республикэм и къэрал мылъкум хэта IуэхущIапIитI щIыналъэ мылъкум хагъэхьэжащ: сом мелуан 489,5-рэ и уасэ Iэмэпсымэрэ техникэкIэ къызэгъэпэща, Аруан щIыналъэм, Нарткъалэ, Свободэ уэрамым тет школымрэ Бахъсэн щIыналъэм хыхьэ Куба къуажэм Къалмыкъым и уэрамым тет, сом мелуан 382,7-рэ и уасэ Iэмэпсымэрэ техникэкIэ къызэгъэпэща школымрэ. Абы тепсэлъыхьащ КъБР-м щIы, мылъку зэхущытыкIэхэмкIэ и министр Тэхъу Аслъэн.
2022 гъэм республикэм и къэрал мылъкур зэрагъэзэщIам къытеувыIащ КъБР-м финансхэмкIэ и министр Лисун Еленэ.
2022 гъэм республикэм къыхэхъуащ сом мелард 64,8-рэ. Налог, мыналог хэхъуэхэр сом мелард 16,2-рэ, зымыгъэзэж мылъкур сом мелард 48,6-рэ мэхъу.
- Хэхъуэр нэхъыбэу къызыпэкIуахэм ящыщщ илъэс кIуам хьэрычэт мащIэм-рэ курытымрэ хэтхэм, я щхьэ хуэлэжьэжхэм папщIэ субсидиеу сом ме-ларди 3-м щIигъу республикэм зэритар. Зыхуей хуэгъэза унэ ухуэным хуаунэтIащ сом меларди 7,8-рэ. Ар хуэдитхукIэ нэхъыбэщ 2021 гъэм а Iуэхум хухахауэ щытам нэхърэ. Бюджет IуэхущIапIэхэм хьэпшыпхэр къащэхунымрэ Iуэхутхьэбзэ щхьэхуэхэр зыIэрагъэхьэнымрэ сом мелуани 7,6-рэ ихьащ, - жиIащ Лисун Еленэ.
2022 гъэм КъБР-м къигъэсэбэпа мылъкур сом мелард 63,1-рэ мэхъу. Процент 98,3-кIэ гъэзэщIа хъуащ ар. Нэхъыбэу мылъку трагъэкIуэдащ егъэджэныгъэм, медицинэм, цIыхухэм я щыIэкIэ -псэукIэр егъэфIэкIуэным. Улахуэм ихьащ сом мелард 16, социальнэ дэIэпыкъуны- гъэм - сом мелард 17. Апхуэдэ дэIэпыкъуныгъэр яIэрыхьащ республикэм и цIыху мини 3-м щIигъум.
2023 гъэмрэ дызыхуэкIуэ 2024 - 2025 илъэсхэмрэ ФIэкIыпIэ зимыIэ медицинэ Iуэхутхьэбзэм и мылъкум теухуауэ щыIэ зэхъуэкIыныгъэхэр зэIущIэм къыщигъэнэIуащ КъБР-м узыншагъэр хъумэнымкIэ и министр Къалэбатэ Рустам.
ЗэхъуэкIыныгъэхэр нэхъыбэу тещIыхьащ фондым къыхэхъуэ ахъшэм зэрызихъуэжымрэ ар къызэрагъэсэбэпыну Iэмалхэмрэ.
- Фондым и мылъкур нэхъыбэ ящIащ Iуэхугъуэ зыбжанэм. 2022 гъэм къамыгъэсэбэпу къэнащ сом мелуани 176,9-рэ. ФIэкIыпIэ зимыIэ медицинэ страхованэм мыналог мылъкуу къыхэхъуащ сом мелуани 5,247-рэ. Апхуэдэу мылъку къыпэкIуащ республикэм щымыщ медицинэ IуэхущIапIэхэм егъэбыдылIа цIыхухэм медицинэ Iуэхутхьэбзэ зэрыратам, - къыхигъэщащ Къалэбатэм.
КъБР-м лэжьыгъэмрэ социальнэ дэIэпыкъуныгъэмкIэ и министр Асанов Алим игъэбелджылащ къулыкъум пэрыту хэкIуэдахэм я унагъуэхэмрэ гугъуехь пэщIэхуа цIыхухэмрэ ядэIэпыкъуным теухуа проект зыбжанэ.