ЩIалэгъуалэр трегъэгушхуэ

«Урысейм и щIалэгъуалэ» агентст­вэм и къэпщытакIуэ гупыр мы махуэхэм хоплъэ «ЩIалэгъуалэм я щIыналъэ» зэпеуэм къагъэхьа программэхэм.

Нобэ утыкум кърахьащ Къэбэрдей-Балъкъэрым икIахэм я программэр. Республикэм и Iэтащхьэ КIуэкIуэ Казбек ар ядиIыгъащ икIи Iуэхум тригъэгуш­хуащ. Абы зэIущIэм хэтхэм защыхуигъа­зэм къыхигъэщащ, къэралым и Президентым и унафэм и фIыгъэкIэ, «Урысейм и щIалэгъуалэ» агентствэм и ­дэ­Iэ­пыкъуныгъэкIэ, республикэм щIа­­лэгъуалэ политикэм жыджэру зэрызыщиужьыр. КIуэкIуэ Казбек ди ныбжьы­щIэхэм ехъуэхъуащ зэпеуэм ехъулIэныгъэхэр щызыIэрагъэхьэну.
Къэбэрдей-Балъкъэрым къыбгъэ­дэкIыу зэпеуэм хэтщ республикэм щIалэгъуалэ IуэхухэмкIэ и министр Лу Азэмэт зи пашэ, районхэм, жылагъуэ зэгухьэныгъэхэм я лIыкIуэхэр, ап­хуэдэуи сыт хуэдэ Iуэхуми хуэжыджэр ныбжьыщIэхэр зыхэт гуп.
Зэпеуэр хуэунэтIащ къэралым и щIыналъэ псом дежкIи зыуэ щыт щIалэ­гъуалэ политикэр пхыгъэкIыным. Программэм хохьэ иджырей инфраструктурэм зегъэужьыныр, Iуэху щхьэпэхэм телэжьэныр, абыхэм щIалэгъуалэ нэхъыбэ къыхэшэныр, ныбжьыщIэ зэчиифIэхэм я зэфIэкIхэр зрагъэхъулIэ­фы­нымкIэ Iэмалхэр къахузэгъэпэ­щыныр. ЩIалэгъуалэ политикэм къа­хуигъэув унэтIыныгъэ нэхъыщхьэхэмкIэ зэIущIэ 40-м щIигъу, щIалэ­гъуалэ цент­ру 5 къызэIуахыну я мурадщ. Апхуэдэ центрхэр щыIэнущ Налшык, Тыр­ныауз, Май, Шэджэм ­къалэхэм, Анзорей къуа­жэм. Программэм и къалэн нэхъыщхьэр щIалэ­гъуалэм ядэлэ­жьэ­нымкIэ Iуэхугъуэ куэд къызэ­щIэ­зыу­быдэ IэнатIэ щхьэ­хуэ 2025 гъэм ирихьэлIэу къызэгъэ­пэщынырщ. 
Фигу къэдгъэкIыжынщи, нэгъабэ екIуэкIа зэпеуэм Къэбэрдей-Балъкъэрым и программэр балл нэхъыбэ зыхуагъэува урысей хэгъэгуипщIым ящыщ зы щыхъуауэ щытащ, абы ипкъ иткIи, 2023 гъэм щIалэгъуалэ центрхэр къыщызэрагъэпэщ Налшык, Нарткъалэ, Къэщкъэтау.