Гъуазджэм къыхуигъэщIа щIалэ

ЦIыху цIэрыIуэхэр

КъБР-м щIыхь зиIэ и артист, театр, цирк лэжьакIуэ Сэралъп Роберт ящыщщ театрымрэ киномрэ къыхуигъэщIахэм.

1967 гъэм мэкъуауэгъуэм и 2-м Налшык къалэм къыщалъхуащ ар. КъызэрыгуэкI щIалэ цIыкIухэм хуэдэу, Роберт кхъухьлъатэзехуэ хъуну щIэхъуэпсу щытащ. ИужькIэ тхыдэм дихьэхащ. И къуэш нэхъыжь Бэгърат КъБКъУ-м щылажьэ ЩIалэгъуалэ театрым репетицэ щыздишам, а лэжьыгъэм апхуэдизкIэ зэщIишати, Тепляков Валентин артист IэщIагъэм хуигъасэ гупхэм яхыхьащ. ЕхъулIэныгъэхэр иIэу курыт еджапIэм щIэс Роберт студие лэжьыгъэм апхуэдизкIэ зэщIишати, еджэныр IэщIыб ищIырт. Курыт еджапIэр къыщиухым ирихьэлIэу, 1988 гъэм, Щукиным и цIэр зезыхьэ театр училищэм и лIыкIуэхэр къэкIуащ я деж щрагъэджэнухэр къыхахыну. Абы щыгъуэм Роберт зыщIэтIысхьэну театр еджапIэм егупсысырти, экзаменхэр тыншу щитым, псори езыр-езыру зэхуэхъуащ. ИужькIэ Къэрал кином и режиссёр курс нэхъыщхьэр къыщиухащ Митта Александр и мастерскойм.

ЩоджэнцIыкIу Алий и цIэр зезыхьэ Къэбэрдей къэрал драмэ театрым щылэжьащ ар япэщIыкIэ. ИужькIэ и ныбжьэгъухэу Теувэжыкъуэ Владимир, Качев Заур, Тэмазэ Лиуан, Шакманов Магомед сымэ я гъусэу къызэIуихащ щIэупщIэ ин зиIа «Баттерфляй» театрыр. Абы щагъэува спектаклым Москва щекIуэкIа япэ международнэ клоунадэ фестивалым ещанэ увыпIэр къыщихьащ, утыку къихьа гуп 80-м щIигъум я лэжьыгъэм ефIэкIри. Къэзан къалэм 1995 гъэм щекIуэкIа фестивалым абы и нэкIуIупхъуэр нэхъыфIу къыщалъытащ икIи япэ увыпIэр къыщылъагъэсащ. КъэпщытакIуэ гупым я нэхъыщхьэу щыта, клоун цIэрыIуэ Полунин Вячеслав Роберт иригъэблэгъащ «Снежное шоу» лэжьыгъэм. Полуниным и проектым илъэс 12-кIэ хэтащ ар. Бродвейм (Нью-Йорк) и театрхэм ящыщ зым Полуниным и гъусэу щылэжьащ.

КъищынэмыщIауэ, Сэралъпым 2007 гъэм къызэригъэпэщауэ щытащ «Черкесский круг» проектыр. Абы адыгэхэм я IуэрыIуатэри, лъэпкъ къафэхэри, макъамэхэри, фэилъхьэгъуэхэри щызэхэухуэнат. Адыгэхэм я мызакъуэу, Кавказым щыпсэу лъэпкъ псоми я щэнхабзэм гулъытэ щыхуащIырт. Кавказ Ищхъэрэм, Урысейм я къалэ куэдми хамэ къэралхэми щагъэлъэгъуащ а лэжьыгъэр. Нью-Йорк и Продюсерхэм я зэгухьэныгъэр къызэрызэрагъэпэщрэ илъэс 55-рэ щрикъум ирихьэлIэу, 2012 гъэм щекIуэкIа конференцым махуитIкIэ щагъэлъэгъуащ «Черкесский круг»-м и концерт, Къалмыкъ Юрэ и цIэр зезыхьэ «Адыгэхэр» щэнхабзэ фондым и фIыгъэкIэ. Балъкъэр Казбек зи художественнэ унафэщI «Хьэтхэр» ансамблым и къэфакIуэхэр къыщыфэрт абы. ЩIэупщIэ ин зиIа Iуэхум хэлэжьыхьащ Цопанов Алан, Увыж Анзор, Сэралъп Мадинэ, Урыс Вячеслав сымэ.

Кинематографиеми и зэфIэкI щеплъыжащ Сэралъп Роберт. Фильм куэдым щыджэгуа актёрым и роль нэхъыщхьэхэмрэ къызэрыгуэкIхэмрэ къехъулIауэ къалъытащ. Ар щыджэгуащ «Азиат», «Тест Роршаха», «Ангел», «Запасной инстинкт», «Сокровище», «Аттракцион», «Упражнения в прекрасном», «Кто, если не я», «Узлы» фильмхэм, нэгъуэщIхэми.

- Гъуазджэм хуэсщIыфыну хэлъхьэныгъэр си лъэпкъ щэнхабзэмрэ анэдэлъхубзэмкIэ хуэсщIыну си мурадщ. Ди лъэпкъым и лъым хэт къафэхэр сфIэфIщ. Абыхэм адыгэхэм я щэнхабзэмрэ хабзэмрэ ухагъэгъуазэ, - жеIэ Роберт. – Щукиным и цIэр зезыхьэ училищэм дыщыщIэсым ди диплом лэжьыгъэ хъуар «Кабардинский цирк» спектаклырщ. ХьэкIэкхъуэкIэхэмрэ псэущхьэхэмрэ я ролхэр дгъэзащIэрт. Сэ ажэгъафэм и ролыр къыслъысат. Театреплъхэр щыщIэкIыжкIэ, языныкъуэхэр зэрыгуфIэм, адрейхэр зэрыгъым сригъэгупсысат махуэр пщIэншэу зэрызмыгъэкIуам. ЦIыхухэр нэхъ насыпыфIэ, гуапэ, щабэ зэрыхъум зыгуэркIэ хэлъхьэныгъэ зэрыхуэсщIым дамэ къыстригъакIэрт!

Сэралъпым театрымрэ киномрэ щиIэ зэфIэкIхэр къалъытащ. 1993-1994 гъэхэм Къэбэрдей-Балъкъэрым и актёр нэхъыфI хъуауэ щытащ ар. «Святая Анна» кинофестивалым и щIыхь тхылъыр къратащ, «Посвящается Саше Лазинскому…» и курс лэжьыгъэм папщIэ.