УсакIуэшхуэм и щIыхькIэ

ЩэнхабзэмкIэ фонд Вэрокъуэ Владимир и цIэр зезыхьэм, «Словесная руда» усэ пшыхь иджыблагъэ щекIуэкIащ. Зэхыхьэр къызэрагъэпэщащ Тхылъыр фIыуэ зылъагъухэм я зэгухьэныгъэмрэ ЩэнхабзэмкIэ фондымрэ, «Читающий Нальчик» Iуэхум хыхьэу. 

ЩэнхабзэмкIэ фондым щызэхуэсат Тхылъыр фIыуэ зылъагъухэм я щIалэгъуалэ клубым хэтхэр - усакIуэхэу Щомахуэ Дарье, Рамонов Алан, Мазуренкэ Маринэ, уэрэдытх икIи уэрэджыIакIуэ Жолдашев Анзор сымэ. КъищынэмыщIауэ, Осетие Ищхъэрэ-Аланиемрэ Дагъыстэнымрэ къикIа хьэщIэхэу усакIуэ Зубаировэ Индирэрэ Хамицевэ Лаурэрэ.
ЗэIущIэр иригъэкIуэкIащ ЩэнхабзэмкIэ фондым и унафэщI Мэкъуауэ Лиуазэ. Абы къыщыпсэлъащ усакIуэ, драматург, «Горянка» газетым и редактор нэхъыщхьэ Къаныкъуэ Заринэ, усакIуэхэу Болатов Юрусланрэ Кудаевэ Лилиерэ. Абыхэм къыхагъэщащ усакIуэ щIалэгъуалэр я IэдакъэщIэкIхэм удахьэхыу къызэреджэр, тхэным гупыж зэрыхуащIар зэрыфIыр.
- ЩIалэгъуалэр литературэм, усыгъэм, художественнэ тхыгъэхэм дедгъэхьэхынырщ ди къалэныр, - жеIэ Мэкъуауэ Лиуазэ. – Тхылъыр IэкIэ пIыгъыу уеджэмрэ гаджеткIэ уеджэмрэ зэхуэдэкъым. Тхылъыр щыпIыгъкIэ и купщIэр нэхъ зыхыбощIэ. Аращ щIэблэм я деж нэхъыщхьэу нэтхьэсыну дызыхуейр.