Налшык дэт Лъэпкъ музейм иджыблагъэ къыщызэIуахащ «Янтарный берег России» фIэщыгъэм щIэт гъэлъэгъуэныгъэ.
Мэзышым (янтарым) къыхэщIыкIа хьэпшыпи 170-м щIигъу утыку къызэрырахьам къищынэмыщIауэ, сурэттех Iэзэ Покровский Станислав Балтие и щIы Iыхьэ бгъузэу псым хыхьэм триха сурэт дахэхэм я гъэлъэгъуэныгъэ къыщызэрагъэпэщат абы.
Мыбы къыщыгъэлъэгъуащ балтие мэзышыр къызэрыхъуар, абы лIэщIыгъуэ бжыгъэкIэ къикIуа гъуэгуанэм, зэрелэжьам, къыхащIыкIыу щытахэм щытопсэлъыхь.
Ижь-ижьыж лъандэрэ мэзышым къару хэлъу къалъытэрти, ар цIыхухэм зэрызэкIэралъхьэнум яужь иту хьэпшып зэмылIэужьыгъуэхэм хагъэтIысхьэрт. Дыгъэм и къару зыхэлъу къалъытэ мы мывэм гулъытэ хуомыщIу ублэкIыфыркъым.
Мы гъэлъэгъуэныгъэми аращ, нэр щызэблож, узэплъынур къыпхуэмыщIэу. Мэзышхэр зэхагъэувэурэ къыхащIыкIа сурэтхэр, вазэхэр, пхъуантэ цIыкIухэр, сыхьэтхэр, шэху уэздыгъэ зрагъэувэхэр, дэтхэнэ хьэпшыпми дыгъэпсыр къекIыха хуэдэщи, нэр пфIатхьэкъу. Апхуэдэу, мы гъэлъэгъуэныгъэм утыку къыщрахьащ мэзыш, хьэпIацIэщыгъэхэмкIэ гъэщIэрэщIа щIыIутелъ щыгъынхэр.
Мэзыш зыхэлъ хьэпшып Калининград дэт комбинатым 1960 - 1980 гъэхэм куэду къыщыщIагъэкIыу щытащ. Абыхэм мы гъэлъэгъуэныгъэм гулъытэ щхьэхуэ щыхуащIащ. Телъыджэщ ахэр я щIыкIэкIи я дахагъкIи.
Мы гъэлъэгъуэныгъэм цIыхур щымащIэтэкъым, къызэрыщIэкIамкIэ, щIэми жьыми фIыуэ ялъагъу мэзышыр, абы къекIуэлIа куэдым яIэт а мывэр зыхэс хьэпшып, зимыIэхэри, шэч хэмылъу, мы гъэлъэгъуэныгъэм щехъуэпсащ. Лъэпкъ музейм и пэшым утыку къыщрахьахэр Калининград дэт музейм щахъумэ хьэпшыпхэм щыщ Iыхьэ цIыкIущ.
Урысейм ЯнтарымкIэ и музейм и лIыкIуэхэм Лъэпкъ музейм тыгъэ къыхуащIащ я IуэхущIапIэм щызэхуэхьэса хьэпшыпхэм я сурэтылъэ.
