Фэеплъ гъуэзэджэ

Ткаченкэ Андрей и цIэр зе­зыхьэ СурэтыщI гъуазджэхэмкIэ музейм щагъэлъагъуэ сурэт куэд зэхуэзыхьэса, псапащIэ, щIэныгъэмрэ гъуазджэмкIэ Петровскэ академием хэта, «Эльбрусские новости» газетым и редактор ­нэхъыщхьэм и къуэдзэу щыта Ха­джиев Даниял къыщIэна ­лэ­жьыгъэхэр. «Мир - крутая ­тропа» выставкэм хагъэхьащ ­СССР-м и художникхэм я лэжьыгъэхэр. 

- Къэбэрдей-Балъкъэрым и художник куэд нэгъуэщI щIыналъэхэм къыщацIыхуащ икIи ди сурэтыщIхэм я лэжьыгъэ мымащIэ хъума хъуащ Хаджиевым и фIыгъэкIэ, - жиIащ КъБР-м щэнхабзэмкIэ и министрым и къуэдзэ Карчаевэ Iэминат зэхыхьэр къы­щызэIуихым. Даниял и пхъумрэ и къуэмрэ фIыщIэ яхуэфащэщ я адэм и фэеплъ выставкэр къы­зэрызэрагъэпэщам папщIэ.
КъБР-м и СурэтыщIхэм я зэгухьэныгъэм и унафэщI Къаны­къуэ Жаннэ къыхигъэщащ Ха­джиев Даниял республикэм и ­гъуазджэм хэлъхьэныгъэфI зэ­ры­хуищIар, а лэжьыгъэхэр ялъагъуху езыри зэращымыгъупщэнур.
Выставкэм хагъэхьащ Ефи­менкэ Николай, Остряков Александр, Бахчеван Валентинэ, Курбанов Валерэ, Поляков Алек­сандр, нэгъуэщIхэми я сурэтхэр. Художник 35-м я Iэ­да­къэщIэкI лэжьыгъи 100-м ­щIигъу къызэ­щIеу­быдэ гъэлъэ­гъуэныгъэм. Бак­куев Владимир, Ефименкэ ­Николай, Поляков Александр Ха­джиевым тращIыкIа сурэтхэри ­хагъэхьащ выставкэм.
Хаджиев Даниял ипхъу Марьям жиIащ выставкэр илъэситI и пэкIэ, я адэр илъэс 70 щрикъум ирихьэлIэу, къызэрагъэпэщэну зэ­рамурадар. Абы утыку кърихьащ Миненков Сергейрэ Левандовс­кий Сергейрэ зэдатха «Мир - крутая тропа“ тхылъыр. Абы хагъэ­хьащ Хаджиевым и Iыхьлыхэм, благъэхэм, ныбжьэгъухэм, къэ­зы­цIыхуу щытахэм я гукъэкIыжхэр. Тхылъыр къыдагъэкIат Хаджие­выр дунейм ехыжу мазэ зыбжанэ дэкIа нэужь. Зэдэлъху­зэ­шыпхъу­хэм я мурадщ Даниял и хъуэпсапIэр - Iуащхьэмахуэ щIыналъэм Бгы лъагэ галерее къыщызэIуа­хыныр - зрагъэхъулIэну. 
Къэбэрдей-Балъкъэрым, къэ­ралым и нэгъуэщI щIыналъэхэм я сурэтыщI цIэрыIуэхэм жанр зэ­мылIэжьыгъуэхэм ящыщ я IэдакъэщIэкIхэр къызэщIаубыдэрт Хаджиевым къызэригъэпэщ выс­тавкэхэм хигъэхьэнухэр къы­щыхихкIэ. Зыхэдэни иIэт: псори зэхэту лэжьыгъэ 1500-м щIигъу зэхуихьэсат абы илъэс 40-м къриу­быдэу.
Даниял литературэмрэ макъамэмрэ фIыуэ хищIыкIми, нэхъыбэу зытелэжьар сурэтыщI ­гъуазджэрат. Коллекционерым зэхуихьэс лэжьыгъэхэм я фIыгъэкIэ, Кавказым и мызакъуэу, Москва, Санкт-Петербург къалэхэм, Урысейм и нэгъуэщI щIы­налъэхэм щыпсэухэм Къэбэрдей-Балъкъэрым и сурэтыщI нэхъыф­I­хэм я лэжьыгъэхэм зыхагъэгъуа­зэрт. Гупсысэ зыщIэмылъ, дахагъэ зыхыумылъагъуэ яхэткъым абы къыщIэнахэм.
Фэеплъ выставкэр шыщхьэуIум и 13 пщIондэ лэжьэнущ.

Сурэтыр Къарей Элинэ трихащ.