КъБР-м и Правительствэм щекIуэкIащ КъБР-м и муниципалитетхэм я зэгухьэныгъэм и зэIущIэ. Абы щытепсэлъыхьащ республикэм и цIыхухэр зыхуэныкъуэ Iуэхутхьэбзэхэр етынымкIэ къалэхэм, щIыналъэхэм я администрацэхэмрэ КъБР-м социальнэ дэIэпыкъуныгъэмкIэ и органхэмрэ зэрызэдэлажьэм. ЗэIущIэр «КъБР-м и муниципалитетхэм я совет» зэгухьэныгъэм и гъэзэщӀакӀуэ унафэщI Маслов Николай иригъэкIуэкIащ.
КъБР-м лэжьыгъэмрэ социальнэ дэIэпыкъуныгъэмкIэ и министрым и къуэдзэ Романовэ Еленэ мы Iуэхум теухуауэ къэпсэлъащ.
- Министерствэм ирегъэкIуэкI республикэм и цIыху щхьэхуэхэм ахъшэкIэ зэрадэIэпыкъу льготэ зиIэхэр ящIэным теухуа зэIущIэхэр. Социальнэ дэIэпыкъуныгъэмкIэ IуэхущIапIэхэр япыщIащ республикэм и къалэхэмрэ щIыналъэхэмрэ я администрацэхэм. Ди министерствэм и нэIэ щIэтщ пIалъэкIэ къэрал къулыкъум пэрытахэм я пенсэр, хеящIэу лэжьахэм мазэ къэс иратыну ахъшэр, къэрал саугъэт зратахэм я улахуэм мазэ къэс худыщIагъу сом бжыгъэр гъэбелджылыныр. Муниципалитетхэм ящIыгъуу лэжьыгъэ идогъэкIуэкI хуэмыщIауэ псэухэмрэ зи закъуэ псэухэмрэ ядэIэпыкъуным теухуауэ. Апхуэдэу зыдэIэпыкъур 489-рэ мэхъу. Псоми зэхэту илъэсым иратащ сом мелуани 6-рэ мин 48-рэ. Лэжьыгъэхэр йокIуэкI цIыху щхьэхуэхэм псэупIэ зэрагъэпэщын папщIэ субсидиекIэ защIэгъэкъуэным теухуауэ. ХуэмыщIауэ псэухэм зыщIагъэкъуэн папщIэ, социальнэ хуэIухуэщIэр зи къалэнхэр ядолажьэ щIыналъэхэм, къалэхэм, къуажэхэм я администрацэхэм. Мы гъэм и мазибгъум къриубыдэу апхуэдэ субсидие иратащ унагъуэ хуэмыщIауэ е зи закъуэу псэу пенсионеру 1826-м. Абы текIуэдащ сом мелуан 43-рэ мин 826-рэ. Мазибгъум къриубыдэу компенсацэ ялъысащ цIыху мин 74-рэ 451-м. Зэхэту, зи гугъу тщIы пIалъэм субсидиеу, сабий ахъшэу, социальнэ дэIэпыкъуныгъэу сом меларди 8-рэ мин 727-рэ яIэрыхьащ цIыху мин 264-м.
Iуэхум теухуауэ зэIущIэм къыщыпсэлъащ Урысейм и социальнэ фондым КъБР-м щиIэ IуэхущIапIэм социальнэ программэхэмкIэ и къудамэм и унафэщIым къуэдзэ Шуваловэ Викторие. Ар тепсэлъыхьащ республикэм льготэ зиIэу щыпсэухэм гулъытэ хуащIыным теухуауэ ягъэзащIэ лэжьыгъэм. КъытеувыIащ цIыху щхьэхуэхэр я узыншагъэр щрагъэфIакIуэ-зыщагъэпсэху санаторэхэм льготэкIэ зэрагъакIуэм.
- Санаторэхэм догъакIуэ я узыншагъэм теухуауэ къэрал социальнэ дэIэпыкъуныгъэ зратхэм я регистрым хатхахэр. ЗыгъэпсэхуакIуэ кIуэнухэм хъыбар къат езыхэр IуэхущIапIэм къекIуалIэу, МФЦ-м зыщрагъэтхыу е «Госуслуги» сайтымкIэ. Зызыгъэпсэхуну хуейхэм путёвкэ пщIэншэхэр чэзууэ ялъос, зыщрагъэтха пIалъэм тещIыхьауэ. 2023 гъэм Урысейм и социальнэ фондым КъБР-м щиIэ IуэхущIапIэм зэгурыIуэныгъэ яриухылIащ «Голубые ели», «Долинск», «Машук», «Центр союз», «Анапа», «Бирюза», «Илона» зыгъэпсэхупIэхэм, академик Бурденкэ и цIэр зезыхьэ санаторэм. 2021 гъэм республикэм и цIыхухэм яIэрыхьащ путёвкэ 1013-рэ, 2022-м - 943-рэ, дызэрыт илъэсым и щIышылэм щегъэжьауэ фокIадэ пщIондэ - 308-рэ, - жиIащ абы.
Тэрч щIыналъэм и администрацэм и унафэщIым и къуэдзэ Алъхъэс Аскэр тепсэлъыхьащ Iуэхум теухуауэ щIыналъэм щыIэ щытыкIэм.
- ЦIыхухэм социальнэ Iуэхутхьэбзэ яхуэщIэнымкIэ республикэ центрым Тэрч щIыналъэм щиIэ къудамэм щолажьэ цIыхуи 127-рэ. Ахэр жьы хъуахэмрэ ныкъуэдыкъуэхэмрэ щакIэлъыплъ стационарым щолажьэ е апхуэдэхэм я унэхэм кIуэурэ Iуэхутхьэбзэ щыхуащIэ.
Гугъуехь хэхуа унагъуэ 18-м КъБР-м и Правительствэм и фондым щыщ мылъкукIэ дэIэпыкъуащ, сом мелуан 1-рэ мин 420-рэ ихьу. «Социальнэ политикэ» Iуэхугъуэм тету щхьэхуэу дэIэпыкъуащ цIыху 22-м. Абы текIуэдащ сом мин 276-рэ. УIэгъэ хъуа зауэлI 12-м трагуэшащ сом мелуани 2-рэ мин 900-рэ. Мобилизацэм хиубыдахэм я унагъуэхэм мазэ къэс и чэзум ират дэтхэнэми сом мин 25-рэ, - къыхигъэщащ абы.
ЗэIущIэм хэтхэр зытепсэлъыхьа IуэхугъуэхэмкIэ Iэмал щхьэхуэхэр къагъэсэбэпыну, мардэ пыухыкIахэм тетыну зэгурыIуащ.
