ДахагъэмкIэ тхьэмахуэ

Москва, ДахагъэмкIэ и тхьэмахуэм хыхьэу, «Манеж»-м и пэш Нэхъыщхьэмрэ ВДНХ-м и «Урысей» лъэпкъыбэ выставкэмрэ (павильон 75-м) и лэжьыгъэщIэхэр иджыблагъэ щигъэлъэгъуащ Къэбэрдей-Балъкъэрым щыщ дизайнер Уэркъуасэ Каринэ. Ар къызэригъэпэщащ УФ-м и Правительствэм модэмкIэ и фондыр и дэIэпыкъуэгъуу. 

ДахагъэмкIэ тхьэмахуэм зэхуишэсащ Урысейм, Бразилием, Китайм, Индонезием, Коста-Рикэ, нэгъуэщI къэралхэм я лIыкIуэхэр. Гъэлъэгъуэныгъэм ди къэралым и къалэ 48-м (Астрэхъан, Воронеж, Волгоград, Екатеринбург, Ивановэ, Иркутск, Медвежьегорск, Дон Iуфэ Iус Ростов, Тюмень, Якутск, нэгъуэщIхэми) я лэжьакIуэхэм я IэдакъэщIэкIхэр утыку къыщрахьащ. Нэхъ гукъинэж ящыхъуахэм ящыщщ Налшык къалэм щыщ Уэркъуасэ Каринэ игъэлъэгъуа KADELI брендым щыщ фэилъхьэгъуэхэр. Каринэ и IэдакъэщIэкI цIыхубз щыгъынхэр (бостейхэр, кIэстумхэр) нэгъуэщIхэм къащхьэщыкIырт я теплъэкIи, зэрыда щIыкIэкIи, щэкIкIи. 
Къалэ мэрием и Iэтащхьэм и къуэдзэ Сергунинэ Наталье зэрыжиIамкIэ, ДахагъэмкIэ етIуанэ тхьэмахуэм хэтащ Москва щыпсэу, абы и хьэщIэ цIыху мин 60-м нэблагъэ. Зэхыхьэм ИнтернетымкIэ щеплъащ цIыху мелуани 5-м щIигъу. 
Фэилъхьэгъуэ щIэщыгъуэхэр ягъэлъэгъуащ стилист, визажист щэ бжыгъэхэм ягъэдэха модель мини 4-м щIигъум. Къэралым и дизайнер 70-м, хамэ къэралым къикIа дизайнер 13-м я IэдакъэщIэкIхэм зыхагъэгъуэзащ. ВДНХ-м щагъэлъэгъуащ IэщIагъэлIхэмрэ модэмкIэ школхэм я студентхэмрэ я лэжьыгъэхэр. Апхуэдэхэт ДизайнымкIэ Лъэпкъ институтым, Косыгин А. Н. и цIэр зезыхьэ Урысей къэрал университетым, Москва и художественно-промышленнэ институтым, брендингымрэ дизайнымкIэ METRICS Онлайн-Академием щеджэхэм я IэдакъэщIэкIхэр. 
Зэхыхьэм и хьэщIащ Италием и актрисэ Мути Орнеллэ, абы ипхъу уэрэджыIакIуэ, модель Ривелли Найке, Голливуд блокбастерхэм я вагъуэ Цзи Лили. Хамэ къэралхэм къикIа хьэщIэхэм Урысей выставкэм я нэ къыщыфIэна фэилъхьэгъуэхэм, вакъэхэм щыщ здашащ. Къыхэбгъэщ хъунущ мы выставкэм сом мелуани 150-м щIигъу и уасэ хьэпшып зэрыщащар. 
ДахагъэмкIэ модэм и тхьэмахуэм егъэджэныгъэ программэм хыхьэу IэщIагъэлI 39-рэ къэпсэлъащ. Нэхъыщхьэу абыхэм зи гугъу ящIар лъэпкъ фэилъхьэгъуэхэм я тхыдэрщ, иджыпсту щIэупщIэ зиIэ щыгъынхэрщ. 
КъыжыIапхъэщ, ДахагъэмкIэ тхьэмахуэм къэрал 19-м (Сербием, Хьэрып Эмират Зэгуэтхэм, Индием, Тыркум, Мароккэ, нэгъуэщIхэми) щыщ журналистхэр зэрыщылэжьар.