КъызыхэкIа балъкъэр лъэпкъым щыщхэм нэмыщI, зэрыкъэралуи зэрыгушхуэ щIэныгъэлI щыпкъэу щытащ ди тхыгъэр зытеухуа еджагъэшхуэр. Ар ЩIэныгъэхэмкIэ Урысей Академием и академик цIэрыIуэ, ди лъахэгъу еджагъэшхуэ Энеев Тимур Магомед и къуэрщ. Мы илъэсым илъэси 100 ирокъу а щIэныгъэлI щэджащэр къызэралъхурэ.
Энеевым и сабиигъуэр Москва щыкIуащ. Аращ ар щIэныгъэм и лъагъуэ нэхум щытеувари. Курыт еджапIэм щыщIэса илъэсхэм къыщыщIэдзауэ щIалэ цIыкIур дихьэхыу хуежьащ хьэршым теухуауэ Циолковскэм иIа гупсысэхэм. ЕсэпымкIэ, физикэмкIэ, астрономиемкIэ щIалэ гурыхуэм япэ къиувэ гупым яхэттэкъым. Тимур щIэхъуэпсырт а щIэныгъэ хьэлэмэтхэм нэхъ кууужу щыгъуазэ зищIыну, абыхэм я лъагапIэхэм нэсыну.
Хэку зауэшхуэр ди къэралым и текIуэныгъэкIэ иухуа нэужь, щIалэщIэр иужь ихьащ и хъуэпсапIэхэм ялъэIэсыну. Тимур хузэфIэкIащ къэралым и еджапIэ нэхъыщхьэхэм ящыщу нэхъ цIэрыIуэ дыдэм - Москва дэт къэрал университетым - щIэныгъэ лъагэ щызригъэгъуэтын. Ещанэ курсым щIэсу арат, Энеевым и курс лэжьыгъэм щIэныгъэлI цIэрыIуэхэу Келдыш, Космодемьянский сымэ гу щылъатам. Хьэршым лъатэ ракетэм и гъуэгур убзыхунымрэ ар цIыхум и унафэм щIэгъэтынымрэ теухуат студент Энеевым и япэ къэхутэныгъэ лэжьыгъэр. Ар апхуэдизу щIэныгъэлIхэм яфIэхьэлэмэт хъуати, журнал цIэрыIуэхэм къытрадзащ куэд дэмыкIыу. Энеевым и лэжьыгъэм щыгъуазэ зыхуэзыщIа куэдым жаIащ а щIалэщIэм бгъэдэлъ зэфIэкIыр къызэрымыкIуэу зэрыщытыр, апхуэдэуи абы и япэ къэхутэныгъэм хьэршым епха щIэныгъэм адэкIи зиужьынымкIэ мыхьэнэшхуэ зэриIэр.
Еджэныр къиуха нэужь, Энеевыр 1948 гъэм щIэтIысхьащ МКъУ-м и аспирантурэм. Иджы абы и къэхутэныгъэхэм нэхъри зригъэубгъуат: ахэр тещIыхьат щIыналъэ жыжьэхэр зэпызычыф баллистическэ ракетэхэм я псынщIагъыр убзыхунымрэ зэрылъатэ гъуэгур гъэнэIуэнымрэ. Энеевым и къэхутэныгъэщIэхэм япкъ иткIэ, апхуэдэ ракетэхэр нэхъ жыжьэ лъэтэф хъуауэ щытащ. Апхуэдэ лэжьыгъэ купщIафIэ зи къалэмыпэм къыщIэкIа Тимур и кандидат диссертацэр ехъулIэныгъэкIэ пхигъэкIащ икIи математикэ щIэныгъэхэмкIэ кандидат цIэр къыфIащащ.
ЩIэныгъэхэмкIэ доктор цIэр къыхуагъэфэщэн папщIэ, Энеевым хэхауэ зы лэжьыгъэ гуэри ищIакъым. ЩIэныгъэхэмкIэ Урысей Академием и Президиумым хэтхэм зэдэарэзыуэ а цIэ лъапIэр ди лъахэгъум къыфIащащ абы и IэдакъэщIэкIхэу япэ IэрыщI спутникыр хьэршым утIыпщыным теухуауэ щытахэм папщIэ. Апхуэдэ лъытэныгъэ лъагэр хуэфащэ дыдэт гупсысэ шэщIа, акъылышхуэ зыбгъэдэлъ щIэныгъэлIым.
ЛIэщIыгъуэ блэкIам и 50 гъэхэм Энеев Тимур щылэжьащ РАН-м Стекловым и цIэкIэ иIэ Математикэ институтым. Сыт хуэдэ унэтIыныгъэкIи ядэхъуу, пэрыту ар ядэлэжьащ дунейпсо цIэрыIуагъ зиIэ щIэныгъэлIхэу Келдыш, Годунов, Тихонов, Гельфанд, нэгъуэщIхэми. Езыри цIэрыIуэ щыхъуащ щIэныгъэм и дунейм. Ар хагъэхьащ РАН-м и Президиумым икIи хьэршым епха IэнатIэхэмкIэ абы и къудамэм и унафэщIу, механикэмкIэ, хьэрш ракетэхэр зэпкърылъхьэнымкIэ IэщIагъэлI Iэзэу дунейм тетащ. Энеевыр Лениным и цIэр зезыхьэ Къэрал саугъэтым и лауреатт. Хьэршыр джыным, ар къэгъэIурыщIэным теухуа и къэхутэныгъэхэм папщIэ щIэныгъэлI пажэм къыхуагъэфэщауэ щытащ Ленин, Бэракъ Плъыжь орденхэр.
Еджагъэшхуэм и IэдакъэщIэкIхэм я нэхъыбэр ноби хуолажьэ хьэршым яутIыпщ аппаратхэм я псынщIагъыр къэхутэнымрэ ахэр цIыхум и унафэм щIэгъэтынымрэ. Апхуэдэ и щIэныгъэ лэжьыгъэ купщIафIэхэм папщIэ абы къратащ Цандер Фридрих и цIэр зезыхьэ дыщэ медалыр. Апхуэдэу Энеевыр хуабжьу дихьэхыу щытащ космогонием, астрофизикэм, планетэхэм я зэхуаку щызекIуэ спутник системэ лъэщ зэтеубла зэрыхъуным. Иужьрей илъэсхэми абы елэжьащ. А псори, Эненевым и гъащIэм щыщ нэгъуэщI Iуэхугъуэ хьэлэмэт куэди итщ еджагъэшхуэм и гъащIэмрэ и лэжьыгъэмрэ ятеухуа «Вагъуэмрэ шэху уэздыгъэмрэ я нэху» тхылъ гъэщIэгъуэным. Ар и къалэмыпэм къыпыкIащ балъкъэр тхакIуэ Кучмезовэ Раисэ.
Ди республикэм и цIыхухэр, абы къихъуэ щIэблэр ирогушхуэ Энеев Тимур хуэдэ цIэрыIуэ куэд ди лъахэм къызэригъэщIам. Къыхэдгъэщынщи, Налшык дэт «ДыгъафIэ къалэ» творчествэмкIэ сабий академиер ди щIыналъэм щыцIэрыIуэ еджапIэхэм ящыщщ. IэнатIэм къыхыхьэ Iуэху зехьэкIэщIэ куэд лэжьыгъэм къыщыщагъэсэбэп академием ехъулIэныгъэфIхэр иIэу щолажьэ хьэршым епха щIэныгъэм ди щIыналъэм зыщегъэужьыным хуэгъэпса лабораторэ хьэлэмэт. Илъэс зыбжанэ ипэкIэ абы Энеевым и цIэр фIащащ. Зи къэгъэщIэрэщIыжыныгъэр мы махуэхэм зыгъэлъапIэ балъкъэр лъэпкъым щыщ еджагъэшхуэм и цIэр зезыхьэ лабораторэм гукъыдэжышхуэ яIэу щолажьэ, къэхутэныгъэ хьэлэмэтхэр щрагъэкIуэкI хьэрш щIэныгъэм дихьэх ныбжьыщIэхэм. КъахрырекI абыхэм Энеевым хуэдэу лъэпкъым, ди республикэм я цIэхэр фIыкIэ зыгъэIун IэщIагъэлI щыпкъэ куэд.